ភ្នំពេញ ៖ ក្រសួងកសិកម្ម រុក្ខាប្រមាញ់ និងនេសាទ បានប្រកាសបង្កេីតក្រុមការងារជំរុញផលិតកម្មគ្រាប់ពូជស្រូវ ដែលមានសមាសមន្រ្តីរាជការចំនួន ១៤នាក់ដេីម្បីបំពេញការងារនេះ។

ក្នុងសេចក្តីសម្រេចដែលចុះហត្ថលេខារបស់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្រុមការងារនេះ មានភារកិច្ចដូចជា៖ ជាសេនាធិការរបស់ក្រសួងកសិកម្ម លើដំណើរការផលិតកម្មដំណាំស្រូវ ក្នុង ការរៀបចំផែនការសម្រាប់អភិវឌ្ឍន៍ផលិតកម្មគ្រាប់ពូជស្រូវដើម្បីរួមចំណែកក្នុងយុទ្ធសាស្ត្រកាត់បន្ថយ

ការចំណាយថ្លៃដើមផលិតក្នុងផលិតកម្មដំណាំស្រូវ។

ចាត់ចែងអនុវត្តផលិតកម្មគ្រាប់ពូជស្រូវតាំងពីដំណាក់កាលផលិតពូជគ្រឹះ ពូជចុះបញ្ជី ពូជវិញ្ញាបនបត្ររហូតដល់ស្រូវចំណី, សម្របសម្រួលការងារជាមួយសហព័ន្ធស្រូវអង្ករ និងក្រុមហ៊ុនផ្សេងៗ ដែលកំពុងប្រកបរបរផលិតកម្ម និងអាជីវកម្មស្រូវ អង្ករ, សិក្សា និងធ្វើសារពើភ័ណ្ឌលើទ្រព្យសម្បត្តិនៃគម្រោង Agricultural Quality Improvement Project, សិក្សា និងវាយតម្លៃបរិមាណស្រូវពូជ ដែលត្រូវផ្គត់ផ្គង់ជូនប្រជាពលរដ្ឋ និងអនុវត្តភារកិច្ចផ្សេងៗទៀត ដែលក្រសួងកសិកម្ម រុក្ខាប្រមាញ់ និងនេសាទប្រគល់ជូន។