ភ្នំពេញ ៖ សមាជិកក្រុមប្រឹក្សាមកពីគណបក្សប្រជាជនកម្ពុជា និងគណបក្សភ្លើងទៀន នៅតាមបណ្ដាឃុំ-សង្កាត់នៃរាជធានី-ខេត្តទាំងអស់ បានផ្តិតមេដៃចេញសារថ្កោលទោសយ៉ាងដាច់អហង្ការ ចំពោះទណ្ឌិតក្បត់ជាតិ៣ជំនាន់ សម រង្ស៉ី ដែលបានប្រមាថយ៉ាងធ្ងន់ធ្ងរ លើព្រះចេស្តាព្រះមហាក្សត្រ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី កាលពីកន្លងទៅថ្មីៗនេះ។

 ក្នុងញត្តិ និងសេចក្តីថ្លែងការណ៍ របស់សមាជិកក្រុមប្រឹក្សាឃុំ-សង្កាត់នានាដែលបានចេញថ្កោលទោសដល់ទណ្ឌិតក្បត់ជាតិបីជំនាន់ សម រង្ស៊ី ដែលបច្ចុប្បន្នកំពុងរត់ចោលស្រុកនេះ បានបញ្ជាក់ស្រដៀងៗគ្នាថាពួកគេ« សូមថ្កោលយ៉ាងដាច់អហង្ការចំពោះការប្រមាថ និងការចោទប្រកាន់ ឥតព្រំដែនម្តងហើយម្តងទៀតរបស់ សម រង្ស៉ី និងបក្ខពួកដល់អង្គព្រះមហាក្សត្រ ជាទីគោរពសក្ការៈសក្ការៈដ៏ខ្ពង់ខ្ពស់បំផុត នៃប្រជាជាតិខ្មែរ»។

 ក្នុងញត្តិបានបន្ថែមថា«យើងខ្ញុំទាំងអស់គ្នា សូមអំពាវនាវឱ្យអាជ្ញាធរមានសមត្ថកិច្ចចាត់វិធានការ ច្បាប់ឱ្យបានម៉ឺងម៉ាត់ជាទីបំផុតទៅលើជនក្បត់ជាតិ៣ជំនាន់និង រត់ចោលស្រុករូបនេះព្រមទាំងបក្សពួកដែលបានចូលរួមចំណែកគាំទ្រចំពោះការប្រមាថអង្គព្រះមហាក្សត្រ ដោយមិនអាចលើកលែងបាននោះឡើយ»។

 សូមបញ្ជាក់ថា សេចក្តីថ្លែងការណ៍ និងញត្តិ ថ្កោលទោសដល់ទណ្ឌិត សម រង្ស៊ីនេះ ពីសំណាក់ក្រុមប្រឹក្សាឃុំ-សង្កាត់ទាំងអស់នៃគ្រប់រាជធានី-ខេត្ត និងក្រុងនេះ គឺបានធ្វើឡើង បន្ទាប់ពីសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានស្នើដល់ថ្នាក់ដឹកនាំកំពូលៗ និងសមាជិក-សមាជិការបស់គណបក្សភ្លើងទៀតទាំងអស់ឲ្យចេញមុខមកពន្យល់ និងបញ្ជាក់ជាសាធារណៈឲ្យបានច្បាស់លាស់ជូនដល់បងប្អូនប្រជាពលរដ្ឋថា តើទណ្ឌិតក្បត់ជាតិ៣ជំនាន់ សម រង្ស៊ី ដែលបានប្រមាថយ៉ាងធ្ងន់ធ្ងរដល់អង្គព្រះមហាក្សត្រនាពេលប៉ុន្មានថ្ងៃនេះថាត្រូវឬខុស ខណៈការប្រមាថដល់អង្គព្រះមហាក្សត្រពីសំណាក់ជនក្បត់ជាតិ សម រង្ស៊ី នេះត្រូវបានបងប្អូនប្រជាពលរដ្ឋ មន្រ្តីរាជកាគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទបានធ្វើការថ្កោលទោសចំពោះជនអនាថារូបនេះ ដែលបាន បានយករាជបល្ល័ងរបស់ប្រជាពលរដ្ឋខ្មែរមកជាន់ឈ្លី និងប្រមាថមើលងាយនោះ។

 ក្រៅពីញត្តិ និងសេចក្តីថ្លែងការណ៍ជាលាយលក្ខណ៍អក្ស ក៏មានបងប្អូនជាសមាជិកក្រុមប្រឹក្សា ឃុំ-សង្កាត់ខ្លះមកពីគណបក្សភ្លើងទៀត ក៏បានចេញវិដេអូឃ្លីបធ្វើការថ្កោលទោសចំពោះជនអនាថា និងជនក្បត់ជាតិបីជំនាន់ ទណ្ឌិត សម រង្ស៊ីនេះផងដែរ៕ អត្ថបទ ៖ បាន ចក់