ភ្នំពេញ៖ មន្ត្រីនៃក្រសួងទេសចរណ៍ជាច្រើនរូប ត្រូវបានពង្រឹងជំនាញ ការប្រើប្រាស់នូវកម្មវិធីឌីជីថល ដើម្បីធ្វើការងារឲ្យទាន់ភាពសភាពការណ៍ ឆ្លើយតបនឹងការវិវឌ្ឍន៍ថ្មីជាបន្តបន្ទាប់ ក្នុងពេលបច្ចុប្បន្ន និងបម្រើដល់តម្រូវការរបស់ភ្ញៀវទេសចរជាតិ និងអន្តរជាតិ ។
ក្នុងពិធីបិទវគ្គបណ្ដុះបណ្ដាលស្តីពី ការអភិវឌ្ឍសមត្ថភាពមន្ត្រីរាជការ ក្នុងបរិបទឌីជីថល នៅថ្ងៃទី២៨ ខែតុលា ឆ្នាំ២០២២ ឯកឧត្តមបណ្ឌិត ជា បូរ៉ា រដ្ឋលេខាធិការក្រសួងទេសចរណ៍ មានប្រសាសន៍ថា ផ្អែកតាមនិន្នាការពេលបច្ចុប្បន្ន ពិភពលោកកំពុងតែបោះជំហានចូលទៅក្នុងបដិវត្តន៍ឧស្សាហកម្ម៤.០ តាមរយៈការធ្វើបរិវត្តកម្មឌីជីថល (Digital Transformation) ដែលគ្របដណ្ដប់លើវិស័យជាច្រើន រួមទាំងវិស័យទេសចរណ៍ផងដែរ ។
ឯកឧត្តមបន្តថា ស្របជាមួយនឹងការវិវឌ្ឍយ៉ាងឆាប់រហ័សផ្នែកបច្ចេកវិទ្យា និងការកើនឡើង នៃតម្រូវការរបស់ភ្ញៀវទេសចរជាតិ និងអន្តរជាតិ ឌីជីថលូបនីយកម្ម បានក្លាយជាប្រធានបទដ៏សំខាន់នៅក្នុងការអភិវឌ្ឍវិស័យទេសចរណ៍ ហើយចុងក្រោយនេះវិបត្តិជំងឺកូវីដ-១៩ បានក្លាយទៅជាកាតាលីករជំរុញឱ្យការប្រើប្រាស់បច្ចេកវិទ្យា គឺជាដំណោះស្រាយកាន់តែមានភាពចាំបាច់ និងចំពេលវេលាសំដៅធានាឧត្តមភាព ប្រកួតប្រជែងរបស់វិស័យទេសចរណ៍ក្នុងបរិបទ នៃបដិវត្តន៍ឧស្សាហកម្ម ៤.០ ។
រដ្ឋលេខាធិការក្រសួងទេសចរណ៍ បន្ថែមថា ក្នុងន័យនេះ ការគិតគូរអំពីអក្ខរកម្មឌីជីថលនៅក្នុងវិស័យទេសចរណ៍ គឺពិតជាមានសារៈសំខាន់ណាស់ ដើម្បីរួមចំណែកជំរុញការកសាងវិស័យទេសចរណ៍វៃឆ្លាតនៅកម្ពុជា តាមរយៈការទាញយកសក្តានុពលពីការប្រើប្រាស់បច្ចេកវិទ្យា បម្រើដល់ការគ្រប់គ្រង និងការអភិវឌ្ឍវិស័យទេសចរណ៍ ស្របតាមតម្រូវការ និងបរិបទជាក់ស្តែង ជាពិសេសវិស័យឌីជីថលនេះ ក៏ជាគន្លឹះដ៏សំខាន់សម្រាប់កម្ពុជា ទាក់ទាញភ្ញៀវទេសចរអន្តរជាតិ ឱ្យចូលមកកម្សាន្តឡើងវិញផងដែរ ។
ឯកឧត្តម ជា បូរ៉ា បានបន្តទៀតថា សម្រាប់រយៈពេល៥ឆ្នាំខាងមុខ (ឆ្នាំ២០២៣-២០២៨) ក្រសួងទេសចរណ៍បានរៀបចំនូវគោលនយោបាយ និងផែនការសំខាន់ៗ ក្នុងការគ្រប់គ្រង និងអភិវឌ្ឍវិស័យទេសចរណ៍ប្រកបដោយប្រសិទ្ធភាព គុណភាព និងនិរន្តរភាព ជាមួយនឹងចក្ខុវិស័យទាក់ទាញទេសចរអន្តរជាតិឱ្យបានប្រមាណ ៧,៥លាននាក់ និងទេសចរផ្ទៃក្នុងប្រមាណ ១៦លាននាក់ នៅឆ្នាំ២០២៨ ខាងមុខ។
ជាមួយនោះឯកឧត្តម បានជំរុញដល់សិក្ខាកាមទាំងអស់ ត្រូវបន្តការអភិវឌ្ឍសមត្ថភាព ដើម្បីឆ្លើយតបទៅនឹងតម្រូវការការងារ និងការវិវត្តន៍របស់សង្គម ពិសេសការចាប់យកចំណេះដឹងផ្នែកបច្ចេកវិទ្យាឌីជីថល , បន្តចូលរួមផ្សព្វផ្សាយ និងលើកកម្ពស់គុណតម្លៃ និងសក្តានុពល របស់វិស័យទេសចរណ៍ តាមប្រព័ន្ធបណ្តាញសង្គម និងគ្រប់រូបភាព, ត្រូវស្រូបយក និងសម្របខ្លួនទៅនឹងបច្ចេកវិទ្យាថ្មីៗ, ត្រូវប្រើប្រាស់បច្ចេកវិទ្យាឱ្យចំគោលដៅ និងប្រកបដោយការទទួលខុសត្រូវ, ត្រូវយកចំណេះដឹង និងបទពិសោធន៍ ដែលទទួលបានពីវគ្គបណ្តុះបណ្ដាលនេះ ទៅចែករំលែក និងអនុវត្តឱ្យបានល្អត្រឹមត្រូវ, ត្រូវមានស្មារតីប្តេជ្ញាចិត្តខ្ពស់ ក្នុងការបំពេញការងារ ៕ អត្ថបទ៖ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
