កោះកុង៖ ប្រធានក្រុមប្រឹក្សាខេត្តកោះកុង និងអង្គភាព មន្ទីរពាក់ព័ន្ធ កាលពីរាត្រីថ្ងៃទី១១ មេសាបានអញ្ជើញចូលរួមកម្មវិធីសូត្រមន្ត ទូងស្គរ និងវាយគង តបនឹងការណែនាំរបស់សម្តេចតេជោ ដើម្បីជាសញ្ញារំលឹកប្រជាពលរដ្ឋឱ្យប្រុងប្រយ័ត្នចំពោះការឆ្លងរីករាលដាលជំងឺកូវីដ១៩។
វត្តមានឯកឧត្ដម កាយ សំរួម ប្រធានក្រុមប្រឹក្សាខេត្តកោះកុង ក្នុងកម្មវិធីបែបពុទ្ធសាសនានេះ ធ្វើឡើងនៅបរិវេណវត្តទេពនិមិត្ត ហៅវត្តថ្មី ដែលរៀបចំដោយព្រះលក្ខណ៍មុន្នី វង្ស ពិជ័យ ព្រះមេគណគណៈធម្មយុត្តនិកាយខេត្ត និងពុទ្ធបរិស័ទចំណុះជើងវត្ត។ ឯកឧត្ដម កាយ សំរួម នៅតែបញ្ជាក់ថា ការទូងស្គរ រគាំង និងវាយគង ជាសញ្ញាផ្សព្វផ្សាយព័ត៌មានដល់ប្រជាពលរដ្ឋ និងពុទ្ធបរិស័ទឱ្យបាន ០៥ដងក្នុង១ថ្ងៃ ដើម្បីបង្កើនការប្រុងប្រយ័ត្នខ្ពស់ពីជំងឺកូវីដ១៩ក្នុងសហគមន៍ ដោយស្នើឱ្យពលរដ្ឋចូលរួមអនុវត្តវិធានការ ៣ការពារ និង ៣កុំ របស់ប្រមុខរាជរដ្ឋាភិបាលកម្ពុជា។ ឯកឧត្ដម ក៏បានបួងសួងដល់បារមីវត្ថុសក្ដិសិទ្ធិ ទាំងឡាយទាំងពួងលើលោកនេះ សូមជួយថែរក្សាដល់ប្រជាពលរដ្ឋក្នុងខេត្តកោះកុង ព្រមទាំងប្រ ជាពលរដ្ឋនៅទូទាំងប្រទេស សូមឲ្យជួបសេចក្តីសុខ សន្តិភាព និងសេចក្តីចម្រើនគ្រប់ៗគ្នាជារៀងរហូត។
ព្រះលក្ខណ៍មុន្នី វង្ស ពិជ័យ ព្រះមេគណគណៈធម្មយុត្តនិកាយខេត្ត មានសង្ឃដីកាថា ទីអារាមវត្តរបស់ព្រះអង្គ បានអនុវត្តការវាយស្គរ និងវាយគងចំនួន ០៥ដងក្នុង១ថ្ងៃ ឆ្លើយតបតាមអនុសាសន៍ណែនាំរបស់សម្ដេចតេជោ ហ៊ុន សែន នាយករដ្ឋមន្ត្រី ដែលបានស្នើឲ្យគ្រប់វត្តអារាមទាំងអស់នៅទូទាំងប្រទេសរៀបចំកម្មវិធីនេះ។ ព្រះអង្គបន្តថា មិនថាវត្តរបស់ព្រះអង្គទេ គឺគ្រប់វត្តអារាមដ៏ទៃទៀតទូទាំងខេត្តកោះ កុង សុទ្ធតែបានរៀបចំកម្មវិធីបែបសាសនាសូត្រមន្ត ហើយអនុវត្តវាយរគាំង និងស្គរ ព្រមៗដូចគ្នាដែរ៕ អត្តបទ៖ ឈឹម មករា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
