ជប៉ុន៖ នៅថ្ងៃចន្ទនេះប្រទេសជប៉ុន បានចាប់ផ្តើមចាក់វ៉ាក់សាំងបង្ការជំងឺ COVID-19 ដល់ប្រជាពលរដ្ឋរបស់ខ្លួន ដែលមានអាយុជាង ៦៥ឆ្នាំ។
មនុស្សចាស់ទាំងនេះ គឺជាក្រុមមនុស្សទី២ នៅក្នុងប្រទេសជប៉ុន ទទួលបានការចាក់វ៉ាក់សាំង បន្ទាប់ពីក្រុមសុខាភិបាល ដែលចាប់ផ្តើមទទួលការចាក់វ៉ាក់សាំងរបស់ពួកគេ កាលពីខែកុម្ភៈកន្លងទៅ។
វ៉ាក់សាំងដំបូង ត្រូវបានអនុញ្ញាតឲ្យចាក់នៅតាមតំបន់ជ្រើសរើសប្រហែល ១២០កន្លែងនៅទូទាំងប្រទេស ស្របពេលដែលជប៉ុន ពន្លឿនយុទ្ធនាការចាក់វ៉ាក់សាំងរបស់ខ្លួន ក្រោយមើលឃើញករណីឆ្លង ហក់ឡើងខ្ពស់នៅតាមតំបន់មួយចំនួន។
នៅថ្ងៃចន្ទនេះដែរ ទីក្រុងតូក្យូ បានចាត់វិធានការរឹតត្បឹតខ្លាំងជាងមុន ដើម្បីប្រយុទ្ធប្រឆាំងការរីករាលដាលឆ្លងជំងឺ COVID-19 ខណៈដែលពួកគេ ពិបាកទប់ស្កាត់វីរុសបម្លែងខ្លួនថ្មី មុនព្រឹត្តការណ៍កីឡាអូឡាំពិក ។
បទបញ្ជាជំងឺ COVID-19 រឹតត្បិតខ្លាំងជាងមុន បានបង្កើតឡើង រយៈពេល៣សប្តាហ៍ ក្រោយបញ្ចប់ការដាក់រដ្ឋក្នុងគ្រាអាសន្ននៅក្នុងរាជធានីមួយនេះ ហើយវានឹងតម្រូវឲ្យអភិបាលទីក្រុងតូក្យូ កាត់បន្ថយរយៈពេលបើកក្លិប កម្សាន្ត និងភោជនីយដ្ឋាន ដាក់ទោសអ្នកបំពានបទបញ្ជា និងផ្តល់ថវិកាលើកទឹកចិត្តដល់អ្នកអនុវត្តន៍តាម។
វិធានការនេះ នឹងបន្តមានសុពលភាពរហូតដល់ថ្ងៃទី១១ ខែឧសភា ខាងមុខ។
សូមបញ្ជាក់ថា មកទល់នឹងពេលនេះ ប្រជាពលរដ្ឋជប៉ុនតិចជាង ១ភាគរយប៉ុណ្ណោះ ដែលទទួលបានវ៉ាក់សាំង បង្ការជំងឺ COVID-19 ៕ អត្ថបទ៖ អៀម សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
