ត្បូងឃ្មុំ៖ ឯកឧត្តម វេង សាខុន មានប្រសាសន៍ថា រាជរដ្ឋាភិបាលដឹកនាំដោយសម្តេចតេជោយកចិត្ត​ទុកដាក់យ៉ាង​ខ្លាំង​បំផុត​ចំពោះសុខដុមនីយកម្មសាសនា ​ដើម្បីធានាថាកម្ពុជា​មិន​ប្រកាន់ជាតិ​សាសន៍ និងសាសនា​ណា​មួយកើតឡើងឡើយ។

ឯកឧត្តម បន្ថែមទៀតថា សុខដុមនីយកម្ម​នៃជនជាតិ​ និងសាសនានេះ ​គឺមានសារៈសំខាន់ណាស់​សម្រាប់​សង្គមកម្ពុជាបច្ចុប្បន្ន ​ដើម្បីរស់នៅជាមួយគ្នាប្រកបដោយភាពសុខសាន្ត។

ថ្លែងបែបនេះ ក្នុងឱកាស​ចុះ​ជួបសំណេះសំណាលជាមួយបងប្អូនខ្មែរ-ឥស្លាមជាង ៦០នាក់នៅវិហារថ្នល់កែង ភូមិថ្នល់កែង ឃុំសេដា ស្រុកតំបែរ ឯកឧត្តម វេង សាខុន ប្រធាន​ក្រុមការ​ងារ​គណបក្ស​ចុះ​មូល​ដ្ឋាន​ស្រុក​តំបែរ ខេត្តត្បូងឃ្មុំ និងស្រុក​កំពង់សៀម ​ខេត្តកំពង់ចាម បាន​ពាំនាំនូវក្តីនឹករលឹកពីសំណាក់សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត មកជូនបងប្អូនខ្មែរ-ឥស្លាមយើងទាំងអស់ក្នុងស្រុកតំបែរ។

នាឱកាសនោះ ឯកឧត្តមប្រធានបានអរគុណដល់បងប្អូនខ្មែរ-ឥស្លាមទូទាំងស្រុកតំបែរ​ដែល​បាន​ចូលរួម​ថែរក្សាសុខសន្តិភាព រួមគ្នាជាមួយនិងប្រជាជនកម្ពុជា ​ដោយមិនប្រកាន់សាសនា ហើយ​មាន​ជំនឿជឿជាក់លើការដឹកនាំរបស់សម្តេចតេជោ ​និង​គណបក្សប្រជាជនកម្ពុជា តាំងពីដើមតរៀងមក។

ឯកឧត្តម ប្រធានក៏បានអរគុណ និងវាយតម្លៃខ្ពស់ចំពោះបងប្អូនខ្មែរ-ឥស្លាមទាំងអស់ដែលបាន​ចូលរួម​ចំណែក​ជាមួយរាជរដ្ឋាភិបាលក្នុងការការពារ និងទប់ស្កាត់ការឆ្លងរីករាលដាលជំងឺ​រាតត្បាត​កូវីដ-១៩ ដោយជោគជ័យ​ផងដែរ និងជាពិសេសបានបោះឆ្នោតគាំទ្រគណបក្សប្រជាជន​ដ៏ច្រើន​លើសលុប នាខែមិថុនាកន្លងទៅ។ ភាពជោគជ័យនេះ បានអនុញ្ញាតឱ្យប្រទេសកម្ពុជា​យើងអាច​បើកដំណើរការជាប្រក្រតីឡើងវិញ បន្តបាននូវសុខសន្តិភាព សុវត្ថិភាពសង្គម និងមានលទ្ធភាព​គ្រប់គ្រាន់ក្នុងបន្តស្តារសេដ្ឋកិច្ចជាតិបានយ៉ាងឆាប់រហ័ស។

ក្នុងឱកាសនោះ ឯកឧត្តម វេង សាខុន ក៏បានប្រគល់ជូនថវិកាចំនួន ១លានរៀលទុក​សម្រាប់ប្រើការ​នៅក្នុងវិហារថ្នល់កែង​ ហើយក៏បានឧបត្ថម្ភដល់បងប្អូនខ្មែរ-ឥស្លាមដែលមានវត្តមាននាព្រឹកនេះ ដោយក្នុងម្នាក់ៗទទួលបាន ២ម៉ឺនរៀលស្មើៗគ្នា៕