ភ្នំពេញ៖ សមាគមគ្រូពេទ្យទារកកម្ពុជា ព្រឹកថ្ងៃទី២៩ ខែតុលា ឆ្នាំ២០២២នេះ បានបើកសន្និសីទ លើកទី៥ ក្រោមប្រធានបទ «ការថែទាំសុខភាពទារកជុំវិញសម្រាល» ដែលមានការចូលរួម​ពី​គ្រូពេទ្យ​គ្រប់ជំនាញ ជាពិសេសគ្រូពេទ្យផ្នែកម្តាយ និងទារកចំនួនជាង ២០០នាក់​ ក្នុងសន្និសីទនេះ ដឹកនាំក្រោមវត្តមានឯកឧត្តមសាស្ត្រាចារ្យ ធា គ្រុយ រដ្ឋលេខាធិការ ​ក្រសួងសុខាភិបាល និង​ជាប្រធានគណៈគ្រូពេទ្យជាតិកម្ពុជា។

លោកជំទាវសាស្ត្រាចារ្យវេជ្ជបណ្ឌិត អ៊ឹម សិទ្ធិការ្យ ប្រធានសមាគមគ្រូពេទ្យទារកកម្ពុជា ប្រធាន​ផ្នែក​ប្រពោធនកម្មទារក និងអគ្គនាយករង ​នៃមន្ទីរពេទ្យកាល់ម៉ែត ​មានប្រសាសន៍ថា ទិវាសន្និសីទក្រោម​ប្រធានបទ «ការថែទាំសុខភាពទារកជុំវិញសម្រាល» ជាប្រធានបទដ៏សំខាន់បំផុតដើម្បីចូលរួម លើកកំពស់សុខាមាលភាពមាតា និងទារក និងកាត់បន្ថយអត្រាស្លាប់របស់ទារក ​នៅប្រទេសកម្ពុជា តាមរយះការផ្សព្វផ្សាយចំណេះដឹងបន្ថែម ​ក៏ដូចជាការបណ្តុះ ​បណ្តាលទាក់ទងទៅនឹង ការថែទាំ​សុខភាព​មាតាពេលមានផ្ទៃពោះ ​ការថែទាំ ​ពេលសំរាល ​និងការថែទាំទារកក្រោយពេលសំរាល។ តាមរយះការបង្ហាញរបស់វាគ្មិនជាតិ​ និងអន្តរជាតិពីការព្យាបាល ពិសេស ចំពោះទារកដែលកើតមក​ខ្សោយ នឹងផ្តល់នូវចំណេះដឹង ​និងបទពិសោធន៍ថ្មីៗ​ បំផុតដល់គ្រូពេទ្យជំនាញទាំងអស់ ដើម្បីយក​ទៅ​អនុវត្តតាមបណ្តាមន្ទីរពេទ្យ របស់ខ្លួន ​ដើម្បីចូលរួមក្នុងការកាត់បន្ថយមរណៈភាពទារក​នៅ​ព្រះរាជា​ណាចក្រកម្ពុជា។

ជាមួយគ្នានោះក្នុងសន្និសីទ ​ក៏មានការធ្វើបទបង្ហាញដោយវាគ្មិនជាតិ និងអន្តរជាតិដែលមកពី​បណ្ដា​ប្រទេស បារាំង និង​សិង្ហបុរី ក្រោមប្រធានបទចម្បងមួយគឺ​ «ការថែទាំសុខភាពទារកជុំវិញ សម្រាល»។

ទន្ទឹមគ្នានោះ ឯកឧត្តមសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល បានថ្លែងថា សមាគម​គ្រូពេទ្យទារកកម្ពុជា ​តែងតែខិតខំ​ក្នុងការរៀបចំអោយ​មានកម្មវិធី នេះឡើងជារៀងរាល់​ឆ្នាំទោះក្នុងបរិបទ​ Covid ក្នុងគុណតំលៃដ៏ធំធេង ​ក្នុងការចែករំលែកនូវបទ ​ពិសោធន៍ថ្មីៗ ​ជឿនលឿន ដល់​សហភាតរៈទាំងអស់ដែលបាន​អញ្ជើញ​ចូលរួម​ក្នុង​ទិវា​សន្និសីទនេះ ក្នុងគោលបំណង​ចូលរួម​អភិវឌ្ឍន៍វិស័យសុខាមាលភាពមាតា ​និង​ ទារកអោយកាន់តែប្រសើរឡើងពីមួយ ឆ្នាំទៅមួយឆ្នាំ ។ ការធ្វើការជាក្រុមនេះ​ អាចជួយកាត់បន្ថយអត្រាមរណៈភាពទារកអោយកាន់តែមាន ប្រសិទ្ធិភាព​បន្តិចម្ដងៗ ​តាមរយះការផ្សព្វផ្សាយចំណេះដឹងបន្ថែម ​ក៏ដូចជាការបណ្តុះបណ្តាលទាក់ទង ទៅនឹង ការថែទាំសុខភាពមាតាពេលមានផ្ទៃពោះ ការថែទាំពេលសំរាល និងការថែទាំទារកក្រោយ ពេលសំរាល។

ជាចុងក្រោយតាងនាមអោយក្រសួងសុខាភិបាល និងជាប្រធានគណៈគ្រូពេទ្យកម្ពុជា ឯកឧត្តម​សាស្ត្រាចារ្យ ធា គ្រុយ សូមថ្លែងអំណរ គុណជាថ្មីម្ដងទៀតដល់សមាគម​គ្រូពេទ្យទារកកម្ពុជា ដែលមាន​លោកជំទាវសាស្ត្រាចារ្យ អ៊ឹម សិទ្ធិការ្យ ​ជាប្រធាន និងសាស្ត្រាចារ្យ Victor Samuel Rajadurai ប្រធានសមាគមគ្រូពេទ្យទារកថ្នាក់តំបន់​ ជាពិសេសក្រោមការដឹកនាំដ៏ឈ្លាសវៃ ប្រកប​ដោយគតិ បណ្ឌិត របស់សម្ដេចអគ្គមហាសេនាបតីតេជោ​ ហ៊ុន សែន នាយករដ្ឋមន្ត្រីនៃព្រះរា​ជា​ណា​ចក្រកម្ពុជា បានយកចិត្តទុកដាក់យ៉ាងខ្លាំងលើសុខុមាលភាពប្រជាជនកម្ពុជាទាំងមូល។ រាជរដ្ឋាភិបាលកម្ពុជា ​បានសម្រេចនូវ​សមិទ្ធផល​សុខាភិបាលធំៗ​ជាច្រើន ជាពិសេសការកាត់​បន្ថយ​អត្រាមរណភាព មាតានិងទារក៕អត្ថបទ រដ្ឋា