កណ្តាល៖ ដូចការគ្រោងទុក នៅថ្ងៃទី២៩ ខែតុលានេះ រដ្ឋបាលខេត្តកណ្តាល ចាប់ផ្តើម​បើក​ពិធី​ប្រណាំងទូករយៈពេល២ថ្ងៃ ​នៅមាត់ទន្លេបាសាក់សួនច្បារក្រុងតាខ្មៅ ​ដើម្បីអបអរសាទរ​ព្រះរាជ​ពិធីបុណ្យអុំទូក ​បណ្តែតប្រទីប អកអំបុក ​និងសំពះព្រះខែ ​ខណៈពិធីនេះរដ្ឋបាល​ខេត្តបាន​អាកខាន​រៀបចំចំនួន២ឆ្នាំ ​ដោយសារកូវីដ១៩។

បើតាម លោក ចេង សំអ៊ុល ប្រធានមន្ទីរអប់រំយុវជន​ និងកីឡា ​ខេត្តកណ្តាល ​បានថ្លែងថា នៅក្នុងឆ្នាំ២០២២នេះ រដ្ឋបាលខេត្តកណ្តាល ​បានឯកភាពទទួលទូកចូលរួមប្រកួតមានចំនួន៩២ទូក កើន​ឡើន២៨ទូក បើប្រៀបធៀបការទូកចូលរួមប្រណាំងនៅក្នុងឆ្នាំ២០១៩ កន្លងទៅ។

លោក ចេង សំអ៊ុល បញ្ជាក់ថា ក្នុងចំណោមទូកដែលចូលរួមប្រណាំងទាំង៩២​ទូកនោះ គឺមាន​ទូកចែវ ទូកអុំ អន្តរជាតិ ទូកកាចា ​និងមានកីឡាករ​ កីឡាការិនី ប្រមាណជាង ​ចំនួន ៤៥០០នាក់ និងមាន​កម្លាំងត្រៀម ​ចំនួន ៧៩៦នាក់ ​មកពីបណ្តាខេត្តរាជធានី និងក្រសួងចំនួន៧ រួមមាន​ខេត្តកណ្តាល រាជធានីភ្នំពេញ កំពង់ចាម ព្រៃវែង តាកែវ ​និងខេត្តកំពង់ឆ្នាំង និងក្រសួងការងារ និងបណ្តុះបណ្តាលវិជ្ជាជីវៈ។

បើតាមកីឡាករកីឡាការនី ថ្លែងថា នៅក្នុងឆ្នាំនេះបើទោះកម្ពុជាមិនបានរៀបចំ​ព្រះរាជពិធី​បុណ្យ​អុំទូក តែតាមបណ្តាខេត្តរាជធានីនានា​គឺបានរៀបចំពិធីប្រណាំងទូក តាមទំនៀបទំលាប់​ប្រពៃណី​វប្បធម៌ខ្មែរមានតាំងពីបុរាណកាលមក ហើយសម្រាប់ការចូលរួមពិធី​ប្រណាំង​ទូកនៅ​ក្រុងតាខ្មៅ​នា​ពេលនេះដែរ យើងមានការសប្បាយចិត្តដែលបានបង្ហាញ​សមត្ថភាពទូករបស់​គេដណ្តើម​ជ័យលាភីជាមួយបណ្តាទូកនានាទៀតជាច្រើន។

សូមបញ្ជាក់ថា នៅក្នុងពីធីប្រណាំងទូកក្រុងតាខ្មៅនេះ រដ្ឋបាលខេត្តកណ្តាលបានរៀបចំ​កម្មវិធី​កម្សាន្ត​សប្បាយនានា​ជាច្រើនអមជាមួយរួមមាន៖ ​កម្មវិធីប្រគំដន្ត្រី កម្មវិធីតាំងពិព័រណ៍​ទំនិញ​ក្នុងស្រុក បង្ហោះកូប និងកម្មវិធីតូចៗ ​ដើម្បីបង្កើនភាពសប្បាយរីករាយជាច្រើន​ទៀត​របស់​ប្រជាពលរដ្ឋ៕ អត្ថបទ ស៊ុម សុខជា