ត្បូងឃ្មុំ៖ ឯកឧត្តម វេង សាខុន ប្រធានក្រុមការងារគណបក្សចុះមូលដ្ឋានស្រុកតំបែរ ខេត្តត្បូងឃ្មុំ និងស្រុកកំពង់សៀម ខេត្តកំពង់ចាម រួមជាមួយសហការី នៅរសៀលថ្ងៃទី២៩ ខែតុលានេះ បាននាំយកអង្ករជាអំណោយ​របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ចែកជូន​ប្រជាពលរដ្ឋ មានជីវភាពខ្វះខាតចំនួន២០០គ្រួសារ ស្ថិតនៅក្នុងបរិវេណសាលាស្រុកតំបែរ ខេត្តត្បូងឃ្មុំ។

មានមតិសំណេះសំណាល ឯកឧត្តម វេង សាខុន បានពាំនាំនូវការផ្តាំផ្ញើសាកសួរសុខទុក្ខ និង​សេចក្ដី​នឹករលឹក​ពី​សម្តេចតេជោ ហ៊ុន សែន ​នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត​មក​ជូន​បងប្អូន​ប្រជាពលរដ្ឋ​ទាំងអស់ ដែលជានិច្ចសម្តេចទាំងទ្វេតែងតែបារម្ភពីសុខទុក្ខប្រជាជនខ្មែរ​យើង​ទាំងអស់ ជាពិសេសចំពោះបងប្អូន ​ដែលកំពុងត្រូវបានប៉ះពាល់ ​និងរងគ្រោះដោយសារជំនន់ទឹក​ភ្លៀង​និងទីទាល់ក្រខ្វះស្បៀង។

ឯកឧត្តម បន្ថែមថា ក្តី​បារម្ភរបស់សម្តេចបានបង្ហាញជូនបងប្អូនប្រជាជន ​តាម​រយៈការ​បញ្ចេញ​ជា​បន្ទាន់នូវស្រូវពូជជាច្រើន ​ពិសេសដំណើរបេសកកម្មរបស់សម្តេចអញ្ជើញចុះជួប និង​សំណេះសំណាល​ជាមួយបងប្អូនប្រជាជនដោយផ្ទាល់នៅខេត្តសៀមរាប​ បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង ​និងខេត្តកំពង់ធំ នាពេលប៉ុន្មានថ្ងៃកន្លងមកនេះ។

ឯកឧត្តមក៏បាន​កោតសរសើរ និងវាយខ្ពស់ចំពោះអាជ្ញាធរពាក់ព័ន្ធទាំងអស់ក្នុងខេត្តត្បូងឃ្មុំ​ដែល​បានរួមគ្នាដោះស្រាយបញ្ហា ​តាមរយៈការជួយសង្គ្រោះ ​ការចែក​ និងការដឹកជញ្ជូនស្រូវពូជ និង​ស្បៀងអាហារដូចជាអង្ករជូនដល់ប្រជាជនដែលខ្វះខាតបានយ៉ាង​មានប្រសិទ្ធភាព និង​ទាន់ពេលវេលា។

ទន្ទឹមនឹងនេះ ឯកឧត្តម ប្រធានក្រុមការងារ ក៏បានស្នើដល់អាជ្ញាធរពាក់ព័ន្ធ និងមន្ត្រីគណបក្ស​ប្រជាជន​កម្ពុជា​នៅស្រុកតំបែរទាំងអស់ត្រូវបន្តយកចិត្តទុកដាក់ជាមួយ​ប្រជាជនជានិច្ច ហើយត្រូវ​បន្ត​ចូលរួម​ដោះស្រាយនូវរាល់បញ្ហា ​ជាពិសេសទុក្ខលំបាក​ និងកង្វះខាតស្បៀងរបស់ពួកគាត់ ដើម្បី​ជួយ​សម្រួលដល់ការរស់នៅ និងជីវភាពរបស់ពួកគាត់ឱ្យបានល្អប្រសើរ។

ឯកឧត្តម បន្ថែមថា នេះគឺជាការតបស្នងសងគុណចំពោះបងប្អូនប្រជាជនយើង ដែលពួក​គាត់​តែងតែ​បានបន្តគាំទ្របេក្ខភាពសម្តេចតេជោ នាយករដ្ឋមន្រ្តី និង​ជាប្រធានគណបក្សប្រជាជនកម្ពុជា​កន្លងមក ​និងបន្តទៅអនាគត់។

ឯកឧត្តមសង្ឃឹម ​និងជឿជាក់ថា​ប្រជាពលរដ្ឋនៃស្រុកតំបែរ និង​ទូទាំង​ខេត្តត្បូងឃ្មុំ​ទាំងអស់ដែលដល់​អាយុបោះឆ្នោត នឹងទៅចុះឈ្មោះបោះឆ្នោតឱ្យបានទាំងអស់គ្នា​ ដើម្បីបានចូលរួមជាកតព្វកិច្ច​ជា​ប្រជាពលរដ្ឋ ​ក្នុងការចូលបោះឆ្នោតជ្រើសតាំងតំណាងរាស្រ្ត ​នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣​ ខាងមុខនេះ ជាពិសេសបោះឆ្នោតគាំទ្រគណបក្សប្រជាជនកម្ពុជា ​ដើម្បីកម្ពុជាបន្តទទួល​បាន​សុខសន្តិភាព ស្ថិរភពសង្គម និងការរីកចំរើនខាងសេដ្ឋកិច្ចបន្តទៀត។

ក្រៅពីអំណោយដ៏ថ្លៃថ្លាដែលជាអង្ករសម្រាប់ចែកជូនប្រជាពលរដ្ឋនារសៀលនេះ​ ក៏មាន​ការឧបត្ថម្ភ​ជាថវិកា ដោយក្នុងម្នាក់ៗទទួលបាន ២ម៉ឺនរៀលផងដែរ។

សូមជម្រាប​ជូនថា អំណោយដ៏ថ្លៃថ្លា ​ដែលជាអង្កររបស់សម្តេចតេជោ និងសម្តេចកិត្តិព្រឹទ្ធបណ្ឌិត​ដែល​បានផ្តល់មកខេត្តត្បូងឃ្មុំ មានចំនួនសរុប ១០០តោន ចែកជូននៅស្រុកតំបែរ ខេត្តត្បូងឃ្មុំ​ទទួលបានចំនួន ១០តោន៕