ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ក្នុងឋានៈជាប្រធានអាស៊ានឆ្នាំ២០២២ បានបញ្ជាក់ថា លោកប្រធានាធិបតីសហរដ្ឋអាមេរិក ចូ បៃដិន នឹងធ្វើដំណើរមកកម្ពុជាដើម្បីចូលរួមកិច្ចប្រជុំកំពូលអាស៊ាន អាមេរិកនៅទីក្រុងភ្នំពេញ នៅប៉ុន្មានថ្ងៃទៀតនេះ។

ក្នុងឱកាសអញ្ជើញសំណេះសំណាល ចែកស្រូវពូជ និងស្បៀងអាហារជូនប្រជាពលរដ្ឋរងគ្រោះដោយទឹកជំនន់នៅខេត្តព្រៃវែង នាព្រឹកថ្ងៃទី៣០ ខែតុលា ដែលជាខេត្តចុងក្រោយនៃវត្តមានរបស់សម្តេចក្នុងការអញ្ជើញចុះចែកស្រូវពូជបែបនេះ សម្តេចតេជោ ហ៊ុន សែន ក៏បានយកឱកាសជំរាបជូនជនរួមជាតិអំពីកិច្ចការជាច្រើននៅចំពោះមុខដែលនៅសល់តែប៉ុន្មានថ្ងៃទៀត សម្តេចនឹងត្រូវដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូលអាស៊ាន និងដៃគូពាក់ព័ន្ធដទៃទៀត ហើយសម្តេចក៏បានប្រកាសថា ឥឡូវនេះសេតវិមានរបស់សហរដ្ឋអាមេរិក បានឆ្លើយតបហើយថា លោកប្រធានាធិបតីសហរដ្ឋអាមេរិក ចូរ បៃដិន នឹងធ្វើដំណើរមកកម្ពុជា ដើម្បីចូលរួមកិច្ចប្រជុំកំពូលអាស៊ាន សហរដ្ឋអាមេរិកនិងអាស៊ីបូព៌ា។

សូមបញ្ជាក់ថា៖ កិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំជាមួយដៃគូពាក់ព័ន្ធដទៃទៀតដែលកម្ពុជាធ្វើជាប្រធានអាស៊ាននៅឆ្នាំនេះនឹងរៀបចំឡើងពីថ្ងៃទី០៨ ដល់ថ្ងៃទី១៣ ខែវិច្ឆិកា។

ទាក់ទិនកិច្ចការអាស៊ានសម្តេចបានបញ្ជាក់ថា សម្តេចមានកិច្ចការបរទេសច្រើនណាស់ដែលត្រូវធ្វើដោយមិត្តភក្តិបរទេសរបស់យើងក៏មានចំនួនច្រើន។ទោះជាយ៉ាងណាជំរាបពីកម្មវិធីនឹងជួបសន្ទនាជាមួយលោកប្រធានាធិបតី អ៊ុយក្រែននៅល្ងាចថ្ងៃទី១ខែវិច្ឆិកា រីឯការអញ្ជើញលោកប្រធានាធិបតីរុស្ស៊ី វ្លាឌីមៀ ពូទីន មកចូលរួមកិច្ចប្រជុំកំពូលដៃគូអាស៊ាននៅថ្ងៃខាងមុខនេះសម្តេចកំពុងរង់ចាំមើលការឆ្លើយតបពីលោកពូទីន៕