កំពង់ឆ្នាំង ៖ អគារទីចាត់ការ១ខ្នង នៅសាលាបឋមសិក្សាសំរោង ឃុំពោធិ ស្រុកកំពង់លែង ខេត្តកំពង់ឆ្នាំង ជាអំណោយរបស់អង្គការ អ៊ីហ្សីរ៉េតដើស មកពីប្រទេសបារាំង ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី៣០ ខែតុលា ឆ្នាំ២០២២ ក្រោមអធិបតីភាព លោក ហ្វីលីព ប្រធានអង្គការអ៊ីហ្សីរ៉េតដើសប្រទេសបារាំង និង លោក ប៊ុត សប្បាយ ប្រធានក្រុមប្រឹក្សាឃុំពោធិ៍ ។

លោក ប៊ុត សប្បាយ ប្រធានក្រុមប្រឹក្សាឃុំពោធិ៍ និង លោក ជុំ ពិសិទ្ធិ នាយកសាលាបឋមសិក្សាសំរោង បានឱ្យដឹងថា អង្គការ អ៊ីហ្សីរ៉េតដើសគឺជាអង្គការមួយដែលតែងតែបានគាំទ្រលើវិស័យអប់រំ នៅក្នុងមូលដ្ឋានរបស់ឃុំពោធិ៍ ដូចជាការផ្តល់អាហារពេលព្រឹកដល់កុមារនៅក្នុងសលា និង អគារសម្រាប់សិស្សទទួលទានអាហារ ក្រៅពីនេះតែងតែបានជួយផ្គត់ផ្គង់ផ្តល់អំណោយជាសម្ភារៈសិក្សាដល់សិស្សនៅទីនេះ ។ ដែលធ្វើឱ្យសាលាបឋមសិក្សាមួយនេះកាន់តែមានការរីកចម្រើនជាបន្តបន្ទាប់ ។ នេះគឺជាសមិទ្ធផលថ្មីនៃសាលាបឋមសិក្សាសំរោង និង ជាមូលដ្ឋានធនធានដ៏មានសារៈសំខាន់ សម្រាប់ផ្ដល់ឱ្យសិស្សានុសិស្ស លោកគ្រូអ្នកគ្រូដើម្បីផ្តល់នូវសេវាសេវាអប់រំ ប្រកបដោយគុណភាព និង ប្រសិទ្ធភាព នៃតួនាទីសំខាន់ក្នុងការបណ្ដុះបណ្ដាលបំប៉នបន្ថែម​ដល់​ប្រជាពលរដ្ឋ​នៅ​ក្នុង​មូលដ្ឋាន​មាន​ការ​អភិវឌ្ឍន៍​ចំណេះដឹង​ប្រកប​ដោយ​ធនធានល្អប្រសើរបន្ថែមទៀត ។

លោក ហ្វីលីព ប្រធានអង្គការ អ៊ីហ្សីរ៉េតដើសប្រទេសបារាំងបានឱ្យដឹងថា អង្គការ ឬសមាគមន៍របស់​លោក​គឺជាក្រុមមួយ​ដែលបានមូលនិធិពីការ​ចូលរួម​របស់​ប្រជាជន ដែលរស់នៅប្រទេសបារាំង ដែលបានគៀងគរចូលរួមសម្រាប់កសាងនិងអភិវឌ្ឍន៍ធនធានមនុស្សដែលនៅតំបន់ដាច់ស្រយ៉ាល ។

លោកហ្វី លីព បានឱ្យដឹងទៀតថា មូលហេតុដែលលោកសម្រេចចិត្តនាំយកថវិកាមកកសាងហេដ្ឋារចនាសម្ព័ន្ធវិស័យអប់រំ​នៅសាលាបឋមសិក្សាពោធិ៍​នេះ​ដោយ​ពិនិត្យ​មើល​ឃើញ​អំពីភាពចាំបាច់ និង តម្រូវការរបស់សិស្សានុសិស្ស និង លោកគ្រូអ្នកគ្រូ ក្នុងការចូលរួមលើកកម្ពស់ធនធានមនុស្សនៅតំបន់នេះអោយកាន់តែប្រសើរឡើង ។ សមិទ្ធិផលថ្មីនាពេលនេះមិនមែនជាលើកទី១នោះទេ ដែលក្រុមការងារបស់លោកបានជួយនៅសាលាបឋមសិក្សាសំរោងនេះ ។ យកចិត្តទុកដាក់ថែរក្សាអគារទីចាត់ការ និងសមិទ្ធផលនានាឱ្យបានសមស្របនឹងទទួលបាននូវសោភ័ណ្ឌភាព ដើម្បីប្រើប្រាស់ជាឧត្តមប្រយោជន៍សម្រាប់កុមារគ្រប់រូប ដើម្បីទទួលបាន ការអប់រំមានគុណភាពប្រកបដោយសមធម៌ ។

អគារទីចាត់សាលាបឋមសិក្សាសំរោងដែលបានដាក់សម្ពោធនាពេលនេះមានទទឹង៥,៩ម៉ែត្រ និង បណ្តោយប្រវែង៦,៩ម៉ែត្រ ចំណាយអស់ទឹកប្រាក់ជាង៥ពាន់ដូល្លា ។នៅក្នុងឱកាសនោះ អង្គការអ៊ីហ្សីរ៉េតដើសបានចែកអំណោយជាសម្ភារៈសិក្សា និង នំ ដល់សិស្សានុសិស្សផងដែរ ចូលរួមផងដែរ ៕ ហុង វាស្នា