ភ្នំពេញ៖ គិតត្រឹមយប់ ថ្ងៃទី៣០ ខែតុលា ឆ្នាំ២០២២ ករណីរត់ជាន់គ្នាស្លាប់ នៅក្រុងសេអ៊ូល នៃ​ប្រទេស​សាធារណរដ្ឋកូរ៉េ មានជនបរទេសចំនួន ២៦នាក់ បានស្លាប់បាត់បង់ជីវិត ហើយ​ក្នុង​ចំណោម​ជនបរទេស​ដែលអាជ្ញាធរបានរកឃើញអត្តសញ្ញាណ គឺមិនមានជនជាតិខ្មែរទេ ។

តាមរយៈបណ្ដាញសង្គមហ្វេសប៊ុក លោកជំទាវ ជ្រឹង បុទុមរង្ស៊ី ឯកអគ្គរាជទូតកម្ពុជា ប្រចាំ​នៅ​សាធារណ​រដ្ឋកូរ៉េ បានឲ្យដឹងថា ករណីនេះ ស្ថានទូតខ្មែរប្រចាំនៅកូរ៉េ កំពុងបន្ត​តាម​ដាន​ព័ត៌មាន​បន្ត​ទៀត ដោយយកចិត្តទុកដាក់ ហើយបើបងប្អូនណាមានព័ត៌មាន អំពីការបាត់ដំណឹងមិត្តភ័ក្ដិ ឬ​បងប្អូ​ន​នៅក្នុងហេតុការណ៍នេះ សូមមេត្តាផ្តល់ព័ត៌មានមកស្ថានទូតជាបន្ទាន់ ដើម្បី​ធ្វើ​ការ​អន្តរាគមន៍ ហើយអាចទាក់ទងតាមលេខទូរស័ព្ទ 01075104324 ។

គួរបញ្ជាក់ថា កាលពីយប់ថ្ងៃទី២៩ ខែតុលា មានករណីប្រជ្រៀតជាន់គ្នា នៃពិធីបុណ្យ Halloween ក្នុងទីក្រុងសេអ៊ូល ដោយមានមនុស្សស្លាប់ចំនួន ១៥៣នាក់ ភាគច្រើនមានវ័យ ២០ឆ្នាំ ហើយក្នុងនោះមានជនបរទេសស្លាប់ចំនួន ២៦នាក់ ដែលមានជនជាតិចិន អ៊ីរ៉ង ជប៉ុន រុស្ស៊ី និងអូស្ត្រាលី ៕ អត្ថបទ៖ បាន សុខរិទ្ធិ