ភ្នំពេញ៖ ព្រឹកថ្ងៃទី៣១ ខែតុលា ឆ្នាំ ២០២២ នៅមូលដ្ឋានកងទ័ពជើងអាកាស នាយឧត្តមសេនីយ៍ សឹង សំណាង អគ្គមេបញ្ជាការរង មេបញ្ជាការកងទ័ពជើងអាកាស បានជួបសំណេះសំណាល​ជាមួយមេ​បញ្ជាការរង ស្នងការ ស្នងការរង មេបញ្ជាការមូលដ្ឋានទ័ពអាកាស នាយទាហាន​ចំណុះបញ្ជាការ​ដ្ឋានកងទ័ពជើងអាកាសចំនួន ២២៥ នាក់និងបំពាក់ឋាន្តរសក្តិជូនយោធិន​ចូល​និវត្តន៍ចំនួន ១៣នាក់។

នាឱកាសនោះ នាយឧត្តមសេនីយ៍ សឹង សំណាង អគ្គមេបញ្ជាការរង ​មេបញ្ជាការកងទ័ពជើង

អាកាស​ មានប្រសាសន៍បញ្ជាក់ពីច្បាប់ស្តីពីការអនុវត្តរបបសោធននិវត្តន៍ ​និងសោធនបាត់បង់​សមត្ថភាពការងារចំពោះយោធិនទាំងពីរប្រភេទនៃកងយោធពលខេមរភូមិន្ទ ។ ​បើទោះជា​យ៉ាង​ណាយើងនៅរក្សាគ្រប់គ្រងកម្លាំងយោធិនសំខាន់ៗ​ដែលមានធនធាន​មនុស្ស​ជា​យោធាចារ្យ​សំរាប់ចែករំលែកបទពិសោធន៍ល្អៗ ជូននាយទាហានបន្តវេនស្របតាមគោល​នយោបាយ​រាជ​រដ្ឋាភិបាល ​រក្សាចាស់ ប​ង្កើនថ្មី ​ជាគោលនយោបាយប្រកបដោយប្រសិទ្ធភាព ។

នាយឧត្តមសេនីយ៍ ​ក៏មិនភ្លេចរំលឹកពីគុណតម្លៃ និងគុណបំណាច់របស់យោធិនចូលនិវត្តន៍ដែល​បាន​ចូលរួមចំណែកផ្តួលរំលំ​ និងការពារមិនឲ្យរបបប្រល័យពូជសាសន៍វិលត្រឡប់មកវិញ ជាពិសេស​ចូលរួម​បញ្ចប់សង្គ្រាម ស៊ីវិល និងការអនុវត្តគោលនយោបាយឈ្នះ ឈ្នះ ប្រកបដោយជោគជ័យ​របស់​សម្តេចតេជោ ហ៊ុន សែន នាយករដ្ឋមន្ត្រី។

នាយឧត្តមសេនីយ៍ សឹង សំណាង បានផ្តល់អនុសាសន៍ក្រើនរំលឹកជូនយោធិនចូលនិវត្តន៍​ត្រូវ​ជឿជាក់លើការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ជាអ្នកដឹកនាំកម្ពុជា​ប្រកប​ដោយគតិបណ្ឌិតក្នុងការរកសន្តិភាព ​សេរីភាព​ និងការអភិវឌ្ឍប្រកបដោយចីរភាព៕