ភ្នំពេញ៖ ពិព័រណ៍មុខរបរឆ្នាំ ២០២២ រៀបចំឡើងក្នុងរយៈពីរថ្ងៃ គឺថ្ងៃទី ២៩ និងថ្ងៃទី ៣០ ខែតុលា ឆ្នាំ ២០២២។ ពិព័រណ៍មុខរបរនេះ រៀបចំឡើងក្នុងគោលដៅសំខាន់គឺ​ដើម្បីអោយអ្នកចូលរួម​ទទួល​បាន​ចំណេះដឹង និងបណ្ដុះគំនិតអោយអ្នកចូលរួមបង្កើតមុខរបរដោយខ្លួនឯង។

ពិព័រណ៍មុខរបរឆ្នាំ ២០២២ រៀបចំឡើងនៅទីតាំង Factory Phnom Penh ​សម្រាប់រយៈពេលពីរថ្ងៃ នៅ​ចុងសប្ដាហ៍នេះ ​គឺថ្ងៃទី ២៩ និងថ្ងៃទី៣០ខែតុលាឆ្នាំ ២០២២។

សម្រាប់ថ្ងៃទី២ នៃការរៀបចំពិព័រណ៍នេះ​ លោក សំ កុសល ​ជានាយកប្រតិបត្តិក្រុមហ៊ុន Baksey Media ​ជាអ្នករៀបចំអោយមានពិព័រណ៍នេះឡើងលើកឡើងថា ​នេះអាចជាពិព័រណ៍លើកទី ១ សម្រាប់កម្ពុជា ​ដែលខុសពីពិព័រណ៍ដទៃ។

លោកបញ្ជាក់ថា ពិព័រណ៍នេះ ពុំមែនជាពិព័រណ៍ដែលលក់ត្រឹមផលិតផលនោះទេ តែពិព័រណ៍នេះ​គឺ​រៀបចំឡើងក្នុងគោលដៅសំខាន់ ​និយាយពីមុខរបរ ​បញ្ជាក់ពីប្រភេទមុខរបរ ​និងមានការរៀបចំនូវ​ការ​ចែករំលែកដឹងផ្ទាល់ពីម្ចាស់អាជីវកម្ម ក្រុមហ៊ុន​ ពីបទពិសោធន៍ ក៏ដូចជាភាព​ជោគជ័យ​របស់ខ្លួន។

លោក បន្តថា អ្នកចូលរួមត្រូវស្វែងយល់និងចាប់យកពីគំនិតនៅពីក្រោយផលិតផល​ដែល​ដាក់​បង្ហាញ ​នោះគឺគំនិតក្នុងការបង្កើតមុខរបរផ្ទាល់ខ្លួន​ ដែលមានភាពឆ្នៃប្រឌិត ​សម្រាប់ខ្លួនឯង។ លោក​លើកឡើងដែរថា ​សម្រាប់ថ្ងៃទី២នេះ ​គឺលោកបង្ហាញនូវប្រភេទមុខរបរចំនួន ១០ ជាប្រភេទមុខរបរថ្មី ហើយមុខរបរខ្លះពុំត្រូវការនូវជំនាញស្មុគស្មាញនោះទេ។

ក្នុងព្រឹត្តិការណ៍ពិព័រណ៍នេះ មានក្រុមហ៊ុនប្រមាណ ៦០ ចូលរួមដាក់បង្ហាញផលិតផលនៅតាមស្តង់​អាជីវកម្មរៀង​ៗខ្លួន​ ក៏ដូចជាមានការចែកសៀវភៅពាក់ព័ន្ធនឹងការធ្វើជំនួញជាច្រើនក្បាល នឹង​សិក្ខាសាលា​ចែករំលែកបទពិសោធន៍អាជីវកម្មពីមានវាគ្មិនជាតិអន្តរជាតិជាច្រើនរូបផងដែរ៕ អត្ថបទ៖ គឹមហុក