ភ្នំពេញ៖ ក្រសួងផែនការ បានប៉ាន់ប្រមាណថា អាចមានគ្រួសារក្បែរភាពក្រីក្រប្រមាណក្រោម ៦០ម៉ឺនគ្រួសារ ដែលនឹងអាចទទួលអត្ថប្រយោជន៍ ​ពីកម្មវិធីឧបត្ថម្ភសាច់ប្រាក់ជូនគ្រួសារងហានិភ័យ ក្នុងអំឡុងសម្ពាធអតិផរណា។

ឯកឧត្តម កែវ អ៊ូលី ប្រធាននាយកដ្ឋានអត្តសញ្ញាណកម្មគ្រួសារក្រីក្រ ​នៃក្រសួងផែនការ លើកឡើង​បញ្ជាក់ថា ក្នុងរយៈពេលប្រមាណជាងកន្លះខែមកនេះ ​មន្រ្តីជំនាញក្រសួងផែនការ និងមន្រ្តីមក​ពី​ក្រសួងស្ថាប័នពាក់ព័ន្ធ ​បាននឹងកំពុងចុះ​សម្ភាសន៍​កំណត់គ្រួសារទទួលផលទាំងនោះ។

ឯកឧត្តម បញ្ជាក់ថា ការកំណត់អត្តសញ្ញាណគ្រួសារក្បែរភាពក្រីក្រនេះ គឺមានមាន​លក្ខខ័ណ្ឌ​ច្បាស់លាស់​ក្នុងការជ្រើសរើសសម្រាប់ការសម្ភាស។ ទី១គឺផ្អែកលើថវិកា ​និងកាឡូរីក្នុង​ម្ហូប​អាហារ​សម្រាប់មនុស្សម្នាក់ៗ ​និងផ្តោតទៅលើភាពងាយរងគ្រោះមួយ ​ក្នុងចំណោមភាពងាយរងគ្រោះចំនួន ៥។ ភាពងាយរងគ្រោះទាំង៥ ចំណុច គឺសំដៅលើគ្រួសារដែលមានសមាជិក​ជាជនមានពិការភាព មាន​ចាស់ជរា មានកុមារតូច ​មានសមាជិកជាកុមារទាំងអស់​ និងគ្រួសារដែលមានមេគ្រួសារជាស្រ្តី។

បើផ្អែកលើជំរឿនប្រជាជនឆ្នាំ ២០១៩ ​ការយកបន្ទាត់ភាពក្រីក្រ គុណនឹង១, ៥ គឺមានពលរដ្ឋ​ក្បែរភាពក្រីក្រ ​ប្រមាណ ៦០ម៉ឺនគ្រួសារ។ ​តែចំនួនជាក់ស្ដែងអាចតិចជាងនេះ ព្រោះគ្រួសារជាច្រើន​បានដាក់​ពាក្យស្នើសុំបណ្ណសមធម៌រួចទៅហើយ។ នេះជាការបញ្ជាក់ថែមរបស់ ឯកឧត្តម កែវ អ៊ូលី។

ចំពោះការបើកសាច់ប្រាក់វិញ គឺក្រសួងសង្គមកិច្ច អតីតយុទ្ធជន​ និងយុវនីតិសម្បទា ជាអ្នក​ទទួលខុសត្រូវ ​ដោយរង់ចាំទិន្នន័យពីក្រសួងផែនការ។

ឯកឧត្តម ឈួរ សុបញ្ញា ​ជាប្រតិភូរាជរដ្ឋាភិបាល ​ទទួលបន្ទុកជាអគ្គនាយកមូលនិធិជាតិជំនួយសង្គម លើកឡើងថា ការបើកសាច់ប្រាក់នឹងបន្តបើកនៅតាមបញ្ជរវីង​ដដែល​ តែមិនបើកជារៀងរាល់​ខែ​នោះទេ។

ការបើកសាច់ប្រាក់ សម្រាប់កម្មវិធី​ឧបត្ថម្ភ​សាច់ប្រាក់​ជូន​គ្រួសារ​រងហានិភ័យ ក្នុង​អំឡុង​សម្ពាធអតិផរណា ​អាចនឹងចាប់ផ្ដើមអនុវត្តក្នុងពេលឆាប់ៗ​ខាងមុខ បន្ទាប់​ពី​ការ​កំណត់អត្តសញ្ញាណគ្រួសារគោលដៅរួចរាល់៕ អត្ថបទ៖ គឹមហុក