​រុស្ស៊ី៖ ប្រទេស​រុស្ស៊ី​ទំនងជា​កំពុង​ប្រមូលផ្តុំ​កងទ័ព​រាប់ម៉ឺន​នាក់​នៅក្នុង​ទីក្រុង Kherson ភាគខាងត្បូង​ប្រទេស​អ៊ុយ​ក្រែ​ន ខណៈ​អ៊ុយ​ក្រែ​ន​បាន​បង្កើន​ការវាយលុក​នៅ​ភាគ​ខាងកើត និង​ខាងត្បូង​របស់​ប្រទេស​។ ​​កងកម្លាំង​អ៊ុយ​ក្រែ​ន​បាន​ប្រកាស​កាលពី​ថ្ងៃអាទិត្យ​ថា ពួកគេ​បាន​បណ្ដេញ​ទាហាន​រុស្ស៊ី​ដោយ​ជោគ​ជ័យ​នៅ​ក្នុង​ស្រុក​ចំនួន 10 នៃ​តំបន់ Donetsk ភាគ​ខាងកើត​។

អ៊ុយ​ក្រែ​ន​ត្រូវ​បាន​គេ​ជឿ​ថា​ កំពុង​រុល​ចូល​ទៅកាន់​ទី​ក្រុង Kherson ជាទី​ក្រុង​សំខាន់​មួយ​។ ប្រព័ន្ធ​ផ្សព្វផ្សាយ​អ៊ុយ​ក្រែ​ន​បាន​រាយការណ៍​កាលពី​ថ្ងៃ​សៅរ៍​ ពី​ការ​លើក​ឡើង​របស់​មន្ត្រី​កំពូល​នៃ​អង្គភាព​ស៊ើបការណ៍​យោធា​របស់​ប្រទេស​ថា រុស្ស៊ី​កំពុង​បញ្ជូន​ទាហាន ៤០.០០០​នាក់​មកកាន់​ទីក្រុង Kherson​។​ ​កងទ័ព​ជាច្រើន​ត្រូវ​បាន​គេ​ជឿ​ថា ​ជា​របស់​អង្គភាព​ដែល​បាន​ជ្រើស​រើស រួមមាន​ទាំង​កងកម្លាំង​ទ័ព​អាកាស​។ មន្ត្រី​និយាយ​ថា វា​ទំនងជា​នឹង​ចំណាយ​ពេល​ប្រហែល​មួយ​ខែ​ សម្រាប់​កងទ័ព​អ៊ុយ​ក្រែ​ន​ដើម្បី​រំដោះ​យក​មក​វិញ​ទីក្រុង Kherson។​

​នៅ​ក្នុង​បទសម្ភាសន៍​ជាមួយ​ទូរទស្សន៍ NHK រដ្ឋមន្ត្រី​ការពារជាតិ​អ៊ុយ​ក្រែ​ន​លោក Oleksii Reznikov បាន​បង្ហាញ​ពី​ទស្សនៈ​ស្រដៀង​គ្នា​ថា យោធា​រុស្ស៊ី​កំពុង​ដាក់​ពង្រាយ​អង្គភាព​នៅ​ទីក្រុង​ Kherson និង​តំបន់​ជុំវិញ​នោះ​។ ទន្ទឹម​នឹង​នេះ​រុស្ស៊ី​បាន​ប្រកាស​ថា ខ្លួន​បាន​ផ្អាក​មិន​កំណត់​ការចូលរួម​របស់​ខ្លួន​នៅ​ក្នុង​កិច្ចព្រមព្រៀង​ ដែល​ជួយ​សម្រួល​ដល់​ការនាំចេញ​កសិផល​ពី​ប្រទេស​អ៊ុយ​ក្រែ​ន​។ ទីក្រុង​មូ​ស្គូ និយាយ​ថា ខ្លួន​មិន​ធានា​សុវត្ថិភាព​របស់​នាវា​ដឹកទំនិញ ​ដែល​ចូលរួម​ក្នុង​កិច្ចព្រមព្រៀង​នេះ​ទៀត​ទេ៕

អត្ថបទ៖ ប៊ុនថន