កណ្ដាល៖ គណៈអចិន្ត្រៃយ៍ គណបក្សខេត្តកណ្តាល បានដាក់ចេញនូវកម្មវិធីការងារសំខាន់ៗ ដើម្បីឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ដោយបានកំណត់ពេលវេលា និងកម្មវិធីការងារសំខាន់ៗ មុនពេលយុទ្ធនាការឃោសនាបោះឆ្នោត, ក្នុងពេលបោះឆ្នោត និងក្រោយពេលបោះឆ្នោត ដើម្បីឲ្យគណបក្សប្រជាជនកម្ពុជា ទទួលបានជ័យជម្នះយ៉ាងធំធេង នៅក្នុងនីតិកាលថ្មីនេះជាបន្តទៀត។
អគ្គបណ្ឌិតសភាចារ្យ អូន ព័ន្ធមុនីរ័ត្ន សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកណ្តាល ថ្លែងលើកឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការអគារ សាលប្រជុំរំដួល, អគារស្នាក់នៅ និងផ្សព្វផ្សាយសេចក្តីសម្រេចស្ដីពីផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នៅថ្ងៃទី៣០ ខែតុលា ឆ្នាំ ២០២២ថា គណៈអចិន្ត្រៃយ៍គណៈកម្មាធិការកណ្តាល បានដាក់ចេញនូវសេចក្តីសម្រេចថ្មីៗនេះ ស្តីពីផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣។
ផ្អែកលើសេចក្តីសម្រេចនេះ, គណៈអចិន្ត្រៃយ៍ក្រុមការងារគណបក្សចុះមូលដ្ឋានខេត្តកណ្ដាល ក៏បានដាក់ចេញនូវសេចក្តីសម្រេចនាខែកញ្ញា ឆ្នាំ២០២២ ស្តីពីផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ២០២៣។
សេចក្ដីសម្រេចនេះ គឺជាឯកសារយុទ្ធសាស្ត្រគ្រប់ជ្រុងជ្រោយ និងជាការប្ដេជ្ញាចិត្តខ្ពស់ ដើម្បីដណ្ដើមប្រៀបឈ្នះ នៅក្នុងការបោះឆ្នោតនាពេលខាងមុខ ដោយបានចង្អុលបង្ហាញអំពីការងារជាអាទិភាព សម្រាប់អនុវត្តតាមដំណាក់កាលនីមួយៗ ដែលយើងទាំងអស់គ្នាត្រូវធ្វើ ចាប់ពីពេលនេះ រហូតដល់ថ្ងៃបោះឆ្នោត។
ទន្ទឹមនេះ គណៈអចិន្ត្រៃយ៍ គណបក្សខេត្ត ក៏បានដាក់ចេញនូវកម្មវិធីការងារសំខាន់ៗឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រ នីតិកាលទី ៧ ចាប់ពីខែតុលា ឆ្នាំ២០២២ ដល់ខែកក្កដា ឆ្នាំ ២០២៣ ដែលបានកំណត់ពេលវេលា និងកម្មវិធីការងារសំខាន់ៗ នៅមុនពេលយុទ្ធនាការឃោសនាបោះឆ្នោត, ក្នុងពេលបោះឆ្នោត និងក្រោយពេលបោះឆ្នោត ដែលទាំងទារឲ្យថ្នាក់ដឹកនាំ និងក្រុមការងារគណបក្សគ្រប់លំដាប់ថ្នាក់ ចូលរួមសហការអនុវត្តឲ្យបានល្អ ប្រកបដោយស្មារតីទទួលខុសត្រូវខ្ពស់ ដើម្បីឲ្យគណបក្សប្រជាជនកម្ពុជា ទទួលបានជ័យជម្នះយ៉ាងធំធេងបន្តទៀត ក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ខាងមុខនេះ។
ជុំវិញការបោះឆ្នោតនីតិកាលទី៧នេះ អគ្គបណ្ឌិតសភាចារ្យ បានសង្កត់ធ្ងន់នូវចំណុចសំខាន់ៗមួយចំនួនរួមមាន៖ ថ្នាក់ដឹកនាំក្រុមការងារគណបក្សចុះមូលដ្ឋានខេត្ត និងក្រុង/ស្រុកទាំងអស់ ត្រូវចូលរួមសហការជិតស្និទ្ធ ដើម្បីអនុវត្តសេចក្តីសម្រេចថ្មីនេះ ស្តីពីផែនការរួមឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ឲ្យបានពេញលេញ ដើម្បីទទួលលទ្ធផលល្អប្រសើរតាមការចង់បានរបស់គណបក្ស។
ក្រុមការងារគ្រប់ថ្នាក់ ត្រូវជំរុញការអនុវត្ត នូវសេចក្តីណែនាំរបស់គណៈកម្មាធិការកណ្ដាល ស្តីពីការធ្វើបញ្ជីរាយនាមសមាជិកគណបក្ស ដើម្បីគ្រប់គ្រងទិន្នន័យសមាជិកគណបក្សតាមប្រព័ន្ធបច្ចេកវិទ្យាព័ត៌មាន ដែលមានលក្ខណៈសុក្រឹត, ច្បាស់លាស់ និងត្រឹមត្រូវ។
បន្តពង្រឹងរចនាសម្ព័ន្ធគណៈកម្មាធិការគណបក្សមូលដ្ឋាន និងសាខាគណបក្ស មន្ទីរ អង្គភាពជុំវិញខេត្ត, ក្រុង/ស្រុក ពិសេសនៅថ្នាក់ឃុំ/សង្កាត់ និងភូមិ និងបន្តពង្រឹងគណៈចលនាមហាជន និងអង្គការមហាជនរបស់គណបក្សគ្រប់ថ្នាក់ ឲ្យសកម្ម សំដៅសម្រេចបាននូវតួនាទី និងភារកិច្ចរបស់ខ្លួន ជាពិសេសពង្រឹងការគ្រប់គ្រងរាល់អង្គការរបស់គណបក្ស និងពង្រឹងការគ្រប់គ្រងកម្មករនៅតាមរោងចក្រ និងសហគ្រាសនានា៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
