ភ្នំពេញ៖ ក្នុងរយៈពេលមួយឆ្នាំនៃបើកប្រទេសឡើងវិញ ការប្រកបរបររបស់ប្រជាពលរដ្ឋ​រស់នៅ​រាជ​ធានីភ្នំពេញ មានភាពល្អប្រសើរជាងមុន។ នេះបើតាមការលើកឡើងរបស់ប្រជាពលរដ្ឋ។

ថ្ងៃទី១ខែវិច្ឆិកា ឆ្នាំ២០២២នេះ គឺជាខួប១ឆ្នាំ នៃការបើកប្រទេសឡើងវិញ បន្ទាប់ពីរាជរដ្ឋាភិបាល​គ្រប់គ្រង​ស្ថានភាពជំងឺកូវីដ-១៩បាន តាមរយៈគោលនយោបាយចាក់វ៉ាក់សាំងបង្ការជំងឺកូវីដ ស្រោចទៅលើប្រជាពលរដ្ឋ។

សម្រាប់ពលរដ្ឋរស់នៅក្នុងរាជធានីភ្នំពេញ​យល់ឃើញថា ​ក្នុងរយៈពេល១ឆ្នាំនៃការបើកប្រទេស​ឡើវិញនេះ ​ការរស់នៅ និងការប្រកបរបរប្រចាំថ្ងៃមានភាពល្អប្រសើរជាងឆ្នាំមុន ​ព្រោះជំងឺកូវីដ-១៩ មានភាពស្ងប់ស្ងាត់។ លើសពីនេះ​ ពួកគាត់បានអរគុណដល់សម្តេចតេជោ ហ៊ុន សែន នាយករដ្ឋ​មន្រ្តីកម្ពុជា ​ដែលបានដាក់ចេញយុទ្ធសាស្រ្តចាក់វ៉ាក់សាំង​បង្ការជំងឺកូវីដ-១៩ជូនប្រជាពលរដ្ឋ។

បើតាមសេចក្តីព្រាងច្បាប់ ស្តីពីការគ្រប់គ្រងហិរញ្ញវត្ថុឆ្នាំ ​២០២៣​ របស់ក្រសួងសេដ្ឋកិច្ច និង​ហិរញ្ញវត្ថុ បានបង្ហាញថា សេដ្ឋកិច្ចកម្ពុជា ក្នុងឆ្នាំ ២០២២នេះ ​នឹងបន្តនិន្នាការកើនឡើង ធៀបនឹង​កំណើន​នៅឆ្នាំ ២០២១ ដោយសម្រេចកំណើនក្នុងអត្រាប្រមាណ ៥,៤%, ហើយតាមព្យាករណ៍​នៅ​ឆ្នាំ២០២៣ នឹងសម្រេចបានអត្រាកំណើនក្នុងរង្វង់ ៦,៦% ខ្ពស់ជាងឆ្នាំ ​២០២២ ដោយគាំទ្រ​វិស័យ​សេដ្ឋកិច្ចសំខាន់ៗ​មួយចំនួនរួមមាន៖​ វិស័យឧស្សាហកម្ម វិស័យសេវាកម្ម ​វិស័យសំណង់ វិស័យ​ទេសចរណ៍ និងវិស័យកសិកម្មជាដើម៕ អត្ថបទ៖ទូច សោភ័ណ