ភ្នំពេញ៖ ឯកឧត្តមទេសរដ្ឋមន្រ្តី គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ ថ្លែងថា រាជរដ្ឋាភិបាលគ្រោងចំណាយថវិកាជិត៥០ម៉ឺនដុល្លារ ដើម្បីបង្កើតកងរុករក និងសង្គ្រោះជនរងគ្រោះដែលលិចលង់ក្នុងសមុទ្រ ទន្លេ ឬបឹងបួរ។

ការថ្លែងរបស់ឯកឧត្តមទេសរដ្ឋមន្រ្តី គន់ គីម អនុប្រធានទី១ នៃគណៈកម្មាធិការជាតិ​គ្រប់គ្រង​គ្រោះមហន្តរាយ បន្ទាប់ពី​អញ្ជើញ​ក្នុងទិវាជាតិគ្រប់គ្រងគ្រោះមហន្តរាយ ​នៅថ្ងៃទី០១ ខែ វិច្ឆិកា ឆ្នាំ២០២២ ​នៅ​មជ្ឈមណ្ឌល​សន្និបាតកោះពេជ្យ។

ឯកឧត្តមទេសរដ្ឋមន្រ្តី បាន​គូសបញ្ជាក់ថា ​ដោយមានការយកចិត្តទុកដាក់ពីសម្តេចតេជោ ហ៊ុន សែន ​នាយករដ្ឋមន្រ្តី ​បានណែនាំឲ្យគណៈកម្មាធិការជាតិគ្រប់គ្រងគ្រោះមហន្តរាយ តាម​រយៈការចូលរួម​របស់សប្បុរសជនឧបត្ថម្ភជាង ២០ម៉ឺនដុល្លា និងថវិកាជាតិ ​ដោយនឹងបង្កើតកងរុករក និងសង្គ្រោះក្នុងផ្ទៃសមុទ្រ​ ទន្លេ ឬបឹង។

ក្នុងទិវាជាតិគ្រប់គ្រងគ្រោះមហន្តរាយ ឯកឧត្តមទេសរដ្ឋមន្ត្រី បានឱ្យដឹងថា សម្រាប់កម្ពុជាស្ទើរ​ជា​រៀងរាល់ឆ្នាំ បានរងផលប៉ះពាល់ដោយសារទឹកជំនន់ រាំងស្ងួត ​ខ្យល់កន្ត្រាក់ ​រន្ទះបាញ់ បាក់ច្រាំង​ទន្លេ និងគ្រោះមហន្តរាយផ្សេងៗទៀត។

ឯកឧត្តមទេសរដ្ឋមន្រ្តី បន្តថា ទោះជាយ៉ាងណារាជរដ្ឋាភិបាលបានផ្តល់អាងីភាពលើការងារ​គ្រប់គ្រង​គ្រោះមហន្តរាយ ដោយបានពុះពារគ្រប់ឧបសគ្គប្រយុទ្ធលើគ្រប់សមរភូមិម្ចាស់​ការបាន​លើ​គ្រប់ទិដ្ឋភាព និងគ្រប់កាលៈទេសៈ។

ឯកឧត្តមទេសរដ្ឋមន្ត្រី បញ្ជាក់ថា មូលបទរួមគ្នា ដើម្បីលើកកម្ពស់​តល្យការ​សកម្មភាព​មូលដ្ឋានីយកម្ម​សម្រាប់ភាពធន់​ នឹងគ្រោះមហន្តរាយ ដែលបានប្រារព្ធនាពេលនេះពិតជា​សាកសម​បំផុតជាមួយ​នឹងការប្រឈម​ ដែលកាន់តែកើនឡើងនៃមុខសញ្ញាគ្រោះថ្នាក់ និងការប្រែប្រួល​អាកាសធាតុ​នៅក្នុងពិភពលោក៕ អត្ថបទ សេក ឧត្តម