កោះកុង៖ ក្រុមយុវសិស្សនៅវិទ្យាល័យចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង បាននាំគ្នាកែច្នៃត្រឡោកដូងទៅជាគ្រឿងសង្ហារឹមលក់តាមប្រព័ន្ធអនឡាយ ដើម្បីយកថវិកាមកផ្គត់ផ្គង់ការសិក្សា។

យុវសិស្សនៅវិទ្យាល័យចាំយាម បានផ្តើមរួមគ្នាប្រមូលត្រឡោកដូងចាស់ៗគេបោះបង់មកកែច្នៃ​ធ្វើជា​គ្រឿងសង្ហារឹមស្អាតគួរឱ្យចាប់អារម្មណ៍ដាក់តាំងលក់តាមប្រព័ន្ធអនឡាយ ទំនេរក្រៅតែពីការ​សិក្សានៅសាលារបស់ពួកគេ។

ក្នុងចំណោមមិត្តភក្តិចំនួន៦នាក់ យុវជន វីង មុនទ្រី និងយុវតី ដឿន ស្រីវិត លើកឡើងថា ជាង៥ខែ​មកហើយ ដែលពួកគេមានគំនិតកែច្នៃត្រឡោកទៅជាគ្រឿងសង្ហារឹម ដោយសារតែមូលដ្ឋាន​រស់នៅ​សំបូរ​ទៅដោយត្រឡោកដែលគេវាទុកចោល ទើបយកមកកែច្នៃទៅគោមភ្លើង ​ថូផ្កា ​ប្រអប់​ដាក់ប៊ិច ត្រឡោករបាំ និងឧបករណ៍ម៉ាស្សាបាតជើង។

គំនិតច្នៃប្រឌិត​ពាសពេញ​ទៅដោយទៅសមត្ថភាពបូករួមការ​អត់ធ្មត់តស៊ូ ​ពាក់​កណ្តាលខែតុលា កន្លងទៅ ​យុវសិស្សវិទ្យាល័យចាំយាមទាំង៦នាក់នេះ បានជាប់ចំណាត់ថ្នាក់លេខ១​ទូទាំង​ប្រទេស​ក្នុងកម្មវិធីទិវាសហគ្រិនកម្ពុជា ​និងធុរកិច្ចសម្រាប់យុវជនកម្ពុជាឆ្នាំ២០២២ នៅឯវិទ្យាស្ថាន​បច្ចេកវិទ្យារាជធានីភ្នំពេញ។

លោក ទៅ សុខឃី ជាគ្រូបង្គោលដឹកនាំក្រុមយុវសិស្សជាប់ជ័យលាភីខាងលើ បង្ហាញ​ពី​មោទនភាព​របស់ខ្លួនចំពោះយុវជនជំនាន់ចេះមានគំនិតច្នៃប្រឌិតអ្វីដែលថ្មីៗ​សម្រាប់ជំនាញចំណេះដឹង និង​ស្វែងរកថវិកាមកដោះស្រាយការរៀនសូត្រ ​ដោយចំណាយពេលវេលាទំនេរអត់ប្រយោជន៍។

ក្រុមយុវសិស្សវិទ្យាល័យចាំយាម បានផលិតគ្រឿងសង្ហារឹមដែលច្នៃពីត្រឡោកសរុបប្រមាណជិត​១០០គ្រឿង​មានដូចជា៖ គោមភ្លើង ​ថូផ្កាតាំងលើតុ ​ឧបករណ៍ដាក់ប៊ិចខ្មៅដៃ ឧបករណ៍​ម៉ាស្សា​បាត់ជើង ​ដោយទទួលបាន​ថវិកា​ប្រមាណ ៥០០ដុល្លារ ​អំឡុងពេល៥ខែនេះ ​ភាគច្រើន​មាន​អតិថិជន​បញ្ជា​ទិញពីហ្វេសប៊ុកឈ្មោះថា ​«ត្រឡោកទាន់សម័យ​ Online Shop»។

បើតាមគម្រោងរបស់យុវសិស្សទាំងនេះ​ ពួកគេត្រៀមកែច្នៃដបទឹកទៅជាគ្រឿងសង្ហារឹម​ដ៏ទាក់ទាញ​បន្ថែមទៀត ​ដើម្បីបង្កើនចំនួនផលិតផលដែលសម្រេចបាន​ ក៏ដូចជាចំណូលថវិកានៃលក់ចេញ។ តែទោះយ៉ាងណា ​អាស្រ័យលើពួកគេមានពេលវេលាគ្រប់គ្រាន់នឹងរួមគ្នាធ្វើឱ្យចេញជារូបរាង៕អត្ថបទ៖ ឈឹម មករា