ភ្នំពេញ៖ ឯកឧត្តមទេសរដ្ឋមន្រ្តី គន់ គីម អនុប្រធានទី១នៃគណៈកម្មាធិការជាតិគ្រប់គ្រង​គ្រោះ​មហន្តរាយ តំណាងដ៏ខ្ពង់ខ្ពស់សម្តេចតេជោ នាយករដ្ឋមន្ត្រី បានអំពាវនាវដល់ដៃគូជាតិ អន្តរជាតិ និងសប្បុរសជននានា បន្តជួយគាំទ្រការងារគ្រប់គ្រងគ្រោះមហន្តរាយឱ្យកាន់តែសកម្មថែមទៀត​ដើម្បីជួយសង្គ្រោះទប់ស្កាត់នូវគ្រោះមហន្តរាយនានា ដែលកើតជាយថាហេតុ។

ការអំពាវនាវនេះធ្វើឡើងក្នុងឱកាសឯកឧត្តមទេសរដ្ឋមន្រ្តី និងនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជា​ប្រធានលេខា​ធិការ​ដ្ឋាន​គ្រប់គ្រងគ្រោះ​មហន្តរាយរបស់ក្រសួងការពារជាតិ អញ្ជើញចូលរួមជាអធិបតីក្នុងពិធីអបអរ​សាទរ​ទិវាជាតិ​គ្រប់គ្រងគ្រោះមហន្តរាយ ​១៣ តុលា ២០២២ ក្រោមមូលបទ “រួមគ្នា ដើម្បីលើកកម្ពស់​តុល្យការសកម្មភាពមូលដ្ឋានីយកម្ម សម្រាប់ភាពធន់ទៅ នឹងគ្រោះមហន្តរាយ" ។

ពិធីនេះដែរក៏មានការចូលរួមពីតំណាង​មន្ត្រីជាន់ខ្ពស់ក្នុងលេខាធិការដ្ឋានគ្រប់គ្រង​គ្រោះមហន្តរាយ​តាមក្រសួង-ស្ថាប័ន​ ជាសមាជិកគណៈកម្មាធិការជាតិគ្រប់គ្រង ​គ្រោះមហន្តរាយ ​អង្គការដៃគូជាតិ អន្តរជាតិ និងស្ថាប័នឯកជនផងដែរ។

ក្នុងឱកាសនោះឯកឧត្តមទេសរដ្ឋមន្រ្តី គន់ គីម មានប្រសាសន៍ថា សម្តេចតេជោ ហ៊ុន សែន នាយក​រដ្ឋមន្ត្រី ​និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ បានដាក់ចេញ​នូវ​អនុសាសន៍​៩​ចំណុចឱ្យគណៈកម្មាធិការជាតិគ្រប់គ្រងគ្រោះមហន្តរាយ សហការ​សម្របសម្រួល​ជាមួយស្ថាប័ន​ផ្សេងៗ អាជ្ញាធរថ្នាក់ក្រោមជាតិ ដៃគូជាតិ និងអន្តរជាតិ ​ជាពិសេសកងប្រតិបត្តិការរុករក និងសង្គ្រោះ ព្រមទាំងកងកម្លាំងគ្រប់ប្រភេទ ដើម្បីប្រតិបត្តិការជួយសង្គ្រោះពី​ផលប៉ះពាល់ដល់​ប្រជាជន​ដែលរងគ្រោះដោយសាទឹកជំនន់ ​និងគ្រោះមហន្តរាយផ្សេងៗ។

ឯកឧត្តមទេសរដ្ឋមន្ត្រី ​បញ្ជាក់ថា ដើម្បីឱ្យការងារទប់ស្កាត់ ​និងជួយសង្គ្រោះមានប្រសិទ្ធភាព និង​ជោគជោគជ័យទាមទារឱ្យមានការចូលរួមពីសប្បុរសជន និងដៃគូនានាតាមរយៈថវិកា ​សម្ភារ និង​បច្ចេកទេស។

ក្នុងឱកាសអបអរសាទរទិវាជាតិគ្រប់គ្រងគ្រោះមហន្តរាយ១៣ តុលា ឆ្នាំ២០២២ តាម​រយៈសារ​លិខិត​របស់សម្តេចតេជោ​ ហ៊ុនសែន ​នាយករដ្ឋមន្ត្រី ​បានបញ្ជាក់ថា ដើម្បីឱ្យការងារ​គ្រប់គ្រងគ្រោះ​មហន្តរាយ​នៅពេលខាងមុខឱ្យទទួលបានជោគជ័យសម្តេចតេជោ​ បានអំពាវនាវចំនួន៩ចំណុច ក្នុងនោះមាន៖ ការចូលរួមបន្តទប់ស្កាត់ជំងឺកូវីដ១៩ , ពង្រឹងសមត្ថភាពចំណេះដឹងពី​គ្រោះ​មហន្តរាយ ,ម្ចាស់ការលើការគ្រប់គ្រងគ្រោះមហន្តរាយជា​បុគ្គល​ និងគ្រួសារ ,សម្រាប់វិនិយោគិន ធុរជន ម្ចាស់សហគ្រាស ​សូមវិភាជទុនបង្កើនប្រព័ន្ធការពារគ្រោះថ្នាក់ការងារ បង្កើតហេដ្ឋា​រចនា​សម្ព័ន្ធ បង្កើតទីទួលមានសុវត្ថិភាព បណ្តោះបណ្តាលពីវិធានការទប់ស្កាតការពារគ្រោះមហន្តរាយ​ដល់បុគ្គលិក, គណៈកម្មាធិការជាតិគ្រប់គ្រងគ្រោះមហន្តរាយត្រូវរៀបំគោល​នយោបាយ​ជាតិ​ស្តីពី​កិច្ចទទួលខុសត្រូវផ្នែកសង្គមផ្នែកគ្រោះមហន្តរាយរបស់ផ្នែកឯកជន, ស្ថាប័ន​ពាក់ព័ន្ធ​ត្រូវ​សហការ​ជាមួយ ​គណៈកម្មាធិការជាតិគ្រប់គ្រងគ្រោះមហន្តរាយ និងដៃគូត្រូវផ្តល់ព័ត៌មានឱ្យ​បាន​ដឹង​មុន​ពីគ្រោះមហន្តរាយ, ក្រសួងសេដ្ឋកិច្ច និងហិរញ្ញវត្ថុ និងក្រសួង​កសិកម្មរុក្ខាប្រមាញ់ និងនេសាទ​ត្រូវ​ពង្រីក​ប្រព័ន្ធស្បៀងបម្រុង, ក្រសួងការពារជាតិ និង​កងយុធពលខេមរៈភូមិន្ទត្រូវសហការ​ជាមួយ​គណៈកម្មាធិការជាតិគ្រប់គ្រងគ្រោះមហន្តរាយស្នើសុំគម្រោងថវិកា​សម្ភារ ​សម្រាប់​បម្រើ​ឱ្យការ​សង្គ្រោះ ​និងគ្រប់ក្រសួង​ស្ថាប័ន​ត្រូវ​បន្តពង្រឹង​យន្តការ​ផែនការ ​និង​សកម្មភាព​ដែល​មានស្រាប់​ឱ្យ​មានប្រសិទ្ធភាពជាដើម៕