ឧត្ដរមានជ័យ៖ អំណោយរបស់ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកង​យោធពល​ខេមរភូមិន្ទ មេបញ្ជាការកងទ័ពជើងគោក ជាប្រភេទគ្រឿងយន្ត និងសម្ភារប្រើប្រាស់មួយ​ចំនួនទៀត ​ត្រូវបាននាំយកទៅ ​ប្រគល់ជូនកងពលតូចថ្មើរជើងលេខ៤១ ដែលមានទីតាំង​ក្នុង​ស្រុកអន្លង់វែង ខេត្តឧត្តរមានជ័យ សម្រាប់ប្រើប្រាស់បំពេញភារកិច្ចជួយប្រជាពលរដ្ឋ និងការពារជាតិ។

អំណោយរបស់អំណោយរបស់ឧត្តមសេនីយ៍ឯក ហ៊ុន ម៉ាណែត រួមមាន គោយន្ត និងរ៉ឺម៉កសណ្ដោង ចំនួន៨គ្រឿង-ឈុត ម៉ូតូចំនួន១១គ្រឿង, វិទ្យុទាក់ទង ​១៥គ្រឿង/ឈុត ​និងស័ង្កសី ចំនួន ៧,០០០សន្លឹក ត្រូវបានប្រគល់ជូន ​កងពលតូចថ្មើរជើងលេខ៤១ ​ដែលការ​ផ្ដល់​សម្ភារប្រើប្រាស់នេះ គឺជា​ការ​ឆ្លើយតប ​និងបំពេញសេចក្តីត្រូវ ​ការចាំបាច់សម្រាប់បម្រើការងារប្រចាំថ្ងៃ ការងារចុះជួយ​សង្គ្រោះគ្រោះមហន្តរាយជូនប្រជាពលរដ្ឋ ​និងការងារពង្រឹងវិស័យខឿនការពារជាតិ ។

ឧត្តមសេនីយ៍ទោ នាង ឃីម មេបញ្ជាការកងពលតូចថ្មើរជើងលេខ៤១ តាំងនាមឲ្យថ្នាក់ដឹកនាំ នាយ​ទាហាន នាយទាហានរង ​និងពលទាហានទាំងអស់ ​បានសម្ដែងនូវការដឹងគុណ ​និងអរគុណចំពោះ ឧត្តមសេនីយ៍ឯក ​ហ៊ុន ម៉ាណែត ដែលបានចំណាយធនធានផ្ទាល់ខ្លួនជួយសម្រួលដល់​ការលំបាក​ខ្វះខាត ដល់កងពលតូចថ្មើរជើងលេខ៤១​ ក្នុងស្មារតីជាតិនិយម​ ការគិតគូរខ្ពស់ពីសុខទុក្ខ និងការ​ដោះស្រាយ​ បញ្ហាប្រឈមនានា ​ប្រកបដោយព្រហ្មវិហារធម៌។

ឧត្តមសេនីយ៍ទោ បានចាត់តាំងប្រគល់ជូនដល់បណ្តាលស្ថាប័នកងឯកភាព ​និងវរសេនាតូច​ចំណុះយកទៅប្រើប្រាស់​ និងបានណែនាំឱ្យយកចិត្តទុកដាក់ក្នុងការថែទាំសម្ភារទាំងអស់នេះ ដោយ​ស្មារតី ទទួលខុសត្រូវខ្ពស់៕អត្ថបទ៖ ឃិន សារិទ្ធ