ស្ទឹងត្រែង៖ ដងផ្លូវសាធារណៈជុំវិញរង្វង់មូលមាត់ទន្លេ និងផ្សារសាមគ្គីស្ទឹងត្រែង ត្រូវបាន​ធ្វើឱ្យ​បាត់បង់​សណ្ដាប់ធ្លាប់ ដោយសារការដាក់តាំងលក់ដូររបស់ក្រុមអាជីវករមកពីតាមជនបទ និង​អាជីវករក្នុងផ្សារសាមគ្គីស្ទឹងត្រែង​ ដែលមានតូបក្នុងផ្សារហើយ តែនាំគ្នាមកដាក់តាំងលក់​ដូរ​លើផ្លូវសាធារណៈបន្ថែមទៀត។

អាជ្ញាធរខេត្តស្ទឹងត្រែង ចាប់ផ្ដើមពីម្សិលមិញ បានដាក់កម្លាំងចុះរៀបចំសណ្ដាប់ធ្នាប់ (យុទ្ធនាការ រយៈពេល៣ខែ) និងត្រូវអនុវត្តជារៀងរាល់ព្រឹក ដើម្បីរំដោះដងផ្លូវទាំងនេះមកវិញ សម្រាប់បម្រើដល់ការ ធ្វើដំណើររបស់ប្រជាពលរដ្ឋ និងអ្នកដំណើរ។ គណៈកម្មការគ្រប់គ្រងផ្សារ មិនត្រូវបានគេមើលឃើញថា យកចិត្តទុកដាក់ទប់ស្កាត់បញ្ហានេះឡើយ។

ដោយមើលឃើញភាពរញ៉េរញ៉ៃ និងបាត់បង់នៅសណ្ដាប់តាមដងផ្លូវសាធារណៈ និងមានការរិះ គន់ពីសំណាក់មហាជន ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង បានបង្កើតក្រុមការងារចម្រុះ ចុះរៀបចំសណ្ដាប់ធ្នាប់ ណែនាំក្រុមអាជីវករ ដែលកំពុងលក់ដូរឥតសណ្ដាប់ធ្នាប់ តាមដងផ្លូវជុំវិញបរិវេណ ផ្សារសាមគ្គីស្ទឹងត្រែង និងនៅលើផ្លូវជុំវិញរង្វង់មូលមាត់ទន្លេសេកុង រួមទាំងដងផ្លូវមួយចំនួនផ្សេងទៀត។

ឧត្ដមសេនីយ៍ត្រី ឌៀប ចាន់ធី ស្នងការរងទទួលបន្ទុកផែនសណ្ដាប់ធ្នាប់ និងចរាចរណ៍ផ្លូវទឹក បាន ឲ្យដឹងថា ការចុះរៀបចំសណ្ដាប់ធ្នាប់តាមដងផ្លូវសាធារណៈទាំងនេះ គឺមានកម្លាំងអាជ្ញាធរខេត្ត អាជ្ញាធរ ក្រុង និងកម្លាំងសមត្ថកិច្ចជំនាញពាក់ព័ន្ធទាំងអស់ ៕អត្ថបទ៖ មាស ផល្លា