ភ្នំពេញ៖ ខណៈកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនឹងចាប់ផ្តើមក្នុងពេលខាងមុខនេះ ការរៀបចំសោភ័ណភាពនៅរាជធានីភ្នំពេញ សម្រេចបានប្រមាណ៩០ភាគរយ។

លោក ម៉េត មាសភក្តី អ្នកនាំពាក្យសាលារាជធានីភ្នំពេញ ​នៅថ្ងៃទី២ខែវិច្ឆិកានេះ មានប្រសាសន៍ប្រាប់BTVថា បច្ចុប្បន្នការរៀបចំតុបតែងលំអសោភ័ណភាពនៅរាជធានីភ្នំពេញ សម្រេចបានប្រមាណ ៩០ភាគរយ​ ដើម្បីត្រៀមធ្វើជាម្ចាស់ផ្ទះកិច្ចប្រជុំកំពូលអាស៊ាន និងកិច្ច​ប្រជុំពាក់ព័ន្ធ ដែលនឹងចាប់ផ្តើមនៅសប្តាហ៍ក្រោយ ​ហើយការរៀបចំសោភ័ណភាពនេះ នឹងត្រូវរួចរាល់មុនកិច្ចប្រជុំមកដល់។

កន្លងទៅ ឯកឧត្តម ឃួង ស្រេងអភិបាលរាជធានីភ្នំពេញ ​បានជំរុញឲ្យអាជ្ញាធរខណ្ឌទាំង១៤ និង​កម្លាំង​មានសមត្ថកិច្ចក្នុងជួរគណៈបញ្ជាការឯកភាពរដ្ឋបាលរាជធានីភ្នំពេញត្រូវយកចិត្តទុកដាក់ខ្ពស់ និង​ម៉ឺងម៉ាត់បំផុត ក្នុងកិច្ចការពារសន្តិសុខ សណ្តាប់ធ្នាប់ និងសុវត្ថិភាពសាធារណៈ ក្នុងកិច្ច​ប្រជុំ​កំពូល​អាស៊ាន និងកិច្ចប្រជុំពាក់ព័ន្ធឆ្នាំ២០២២ ​ខណៈដែលកិច្ចប្រជុំនេះ ថ្នាក់ដឹកនាំ​ប្រទេស​មហា​អំណាចមួយចំនួននៅលើពិភពលោកនឹងអញ្ជើញមកប្រទេសកម្ពុជា​ ដើម្បីចូលរួមក្នុងកិច្ចប្រជុំនេះ។

ការរៀបចំកិច្ចប្រជុំកំពូលអាស៊ានលើកទី៤០ និង ៤១ ​និងកិច្ចប្រជុំកំពូលពាក់ព័ន្ធ នឹងចាប់ផ្តើម​ពីថ្ងៃ​ទី១០-១៣ ខែ វិច្ឆិកា ឆ្នាំ២០២២ នៅរាជធានីភ្នំពេញ។​ កម្ពុជាបានក្លាយជាសមាជិកអាស៊ាន កាល​ពីខែមេសា ឆ្នាំ១៩៩៩ ហើយបានធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ាន​ ពីរដងរួចមកហើយ ពោលគឺនៅឆ្នាំ២០០២ និង ២០១២៕ អត្ថបទ៖ទូច សោភ័ណ