បាត់ដំបង៖ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ មានប្រសាសន៍​ថា បច្ចុប្បន្ននេះកម្ពុជាមានធនធានមនុស្សសមល្មមសម្រាប់បន្ត​អភិវឌ្ឍន៍​ប្រទេសជាតិ ខណៈគុណ​ភាព​អប់រំ នៅកម្ពុជាពីមុនស្ថិតក្រោមបណ្ដាប្រទេសនានា ​ប៉ុន្តែបច្ចុប្បន្ន បានតាមទាន់​ស្មើមុខស្មើមាត់​ជាមួយបណ្ដាប្រទេសមួយចំនួន។

ក្នុងពិធីសម្ពោធដាក់ឱ្យប្រើប្រាស់អគារសិក្សា១ខ្នង ២ជាន់ ១២បន្ទប់ នៃវិទ្យាល័យសម្ដេចតេជោ ហ៊ុន សែន ភ្នំសំពៅ ក្នុងស្រុកបាណន់ ខេត្តបាត់ដំបង នៅថ្ងៃទី០២ ​ខែវិច្ឆិកា​នេះ ​សម្ដេចក្រឡាហោម ស ខេង បានមានប្រសាសន៍ថា នៅពេលខាងមុខ កម្ពុជាត្រូវការធនធានមនុស្សបន្ថែមទៀតឱ្យកាន់​តែ​សម្បូរបែប ដើម្បីពង្រាយនៅគ្រប់ទីកន្លែង ​ចាប់ពីថ្នាក់ជាតិ ​រហូតដល់ថ្នាក់ក្រោមជាតិ ដើម្បីអភិវឌ្ឍន៍​ប្រទេសជាតិឱ្យកាន់តែរីកចម្រើនបន្តជាលំដាប់ ។

ក្នុងឱកាសនេះដែរសម្ដេចក្រឡាហោម ស ខេង បានបន្តណែនាំដល់ប្រជាពលរដ្ឋឱ្យទៅចាក់វ៉ាក់ សាំងបង្ការជំងឺកូវីដ-១៩ឱ្យបានគ្រប់ដូសតាមកាលកំណត់ ដើម្បីពង្រឹងភាពស៊ាំក្នុងសហគមន៍ និងទប់ស្កាត់ការចម្លងជំងឺកូវីដ-១៩។

សម្ដេចបានជំរុញអាជ្ញាធរ និងកងកម្លាំងសមត្ថកិច្ច ឱ្យខិតខំសហការគ្នា បង្រ្កាបបទល្មើសល្បែង​ស៊ីសង ​អំពើជួញដូរមនុស្ស គ្រឿងញៀន​ និងអំពើចោរកម្មផ្សេងៗ​ឱ្យមានប្រសិទ្ធភាពខ្ពស់។ បានណែនាំ​ដល់ប្រជាពលរដ្ឋ ​ដែលគ្រប់អាយុចុះឈ្មោះបោះឆ្នោត ​មិនទាន់បានចុះឈ្មោះ ទៅ ចុះ​ឈ្មោះឱ្យបានទាន់ពេលវេលា ​ដើម្បីមានសិទ្ធិបោះឆ្នោតជ្រើសរើសថ្នាក់ដឹកនាំ​ ដែលខ្លួនពេញចិត្ត នៅថ្ងៃទី២៣ ខែកក្កដា ឆ្នាំ២០២៣ ៕អត្ថបទ៖ នឿត សុភ័ក្ត្រ