ឧត្ដរមានជ័យ៖ ក្រុមការងារអភិរក្សសំណង់បុរាណ នៃក្រសួងវប្បធម៌ និងវិចិត្រសិល្បៈ សហការ​ជាមួយមន្ទីរវប្បធម៌ និងវិចិត្រសិល្បៈ ​ខេត្តឧត្តរមានជ័យ បន្តគម្រោងជួសជុលកែលម្អហេដ្ឋា​រចនា​សម្ព័ន្ធស្ពានទ័ព ដែលរងការខូចខាត​ឲ្យមានភាពល្អប្រសើរឡើងវិញ ដើម្បីបម្រើដល់វិស័យ​ទេសចរណ៍។

លោក ហុង យឿន ប្រធានមន្ទីរវប្បធម៌ និងវិចិត្រសិល្បៈ ខេត្តឧត្តរមានជ័យ ​បានឲ្យដឹងថា ស្ពានទ័ព ត្រូវបានកសាងឡើងក្នុងរាជព្រះបាទជ័យវរ្ម័នទី៧ ​មានបណ្តោយប្រវែង១៥០ម៉ែត្រ ​ទទឹងប្រវែង ១៦,៥០ម៉ែត្រ ​និងកម្ពស់១០ម៉ែត្រ ដែលជាស្ពានបុរាណដ៏វែងជាងគេមួយក្នុងប្រទេសកម្ពុជា មាន​ទីតាំង ស្ថិតនៅក្នុងភូមិសាស្ត្រស្រុកចុងកាល់។ ស្ពាននេះ កន្លងមក មិនសូវមានអ្នកស្គាល់នោះទេ ដោយសារព្រៃ ដុះហ៊ុំព័ទ្ធជិត ​និងមានការបែកបាក់ខូចខាតហេដ្ឋារចនាសម្ព័ន្ធមួយចំនួនផង ។

លោក បានឱ្យដឹងថា បច្ចុប្បន្ន ស្ពាននេះ ត្រូវបានគេស្គាល់ច្រើនហើយ ​បន្ទាប់ពីមានការផ្សព្វផ្សាយ និងការជួសជុល ដែលរំពឹងថា ​ទៅអនាគត ស្ពាននេះ នឹងក្លាយជាគោលដៅទេសចរណ៍មួយរបស់​ខេត្តជាយដែននេះ ​និងផ្ដល់ផលប្រយោជន៍ដល់សហគមន៍ផង។

លោកស្រី ម៉ម វណ្ណារី ប្រធានការិយាល័យនាយកដ្ឋានការពារ ​និងអភិរក្សសំណង់បុរាណ ​របស់​ក្រសួងវប្បធម៌ និងវិចិត្រសិល្បៈ ​បានបញ្ជាក់ថា ​នេះគឺជាគម្រោងលើកទី៧ហើយ សម្រាប់ក្រុមការ​ងារ​អភិរក្ស ​សំណង់បុរាណ។ ​ការជួសជុលស្ពានទ័ពនេះ ​គឺផ្ដោតលើចំណុចរលុះថ្មផ្នែកខាងកើត ដោយសារទឹកហូរបុក​ ខ្លាំងអំឡុងរដូវវស្សាម្តងៗ ​។ ចំណែកផ្នែកខាងលិច មិនសូវរលុះថ្មចេញ​ប៉ុន្មាននោះទេ។

ក្រុមការងារ ត្រូវជីក រណ្តៅជម្រៅ៤ម៉ែត្រចុះក្រោម ​ដើម្បីដាក់ថ្មតាមជញ្ជាំងដែលពុកផុយ ដោយ​បាន​យកថ្មថ្មីប្រភេទថ្មបាយ ក្រៀម មកក្រាលធ្វើជាគ្រឹះជើងសរសរចាស់នីមួយៗ ដើម្បីឲ្យមានភាពរឹងមាំ​ធន់នឹងទឹកហូរ ៕អត្ថបទ៖ ឃិន សារិទ្ធ