ភ្នំពេញ៖ កម្មវិធីប្រកួតប្រជែងប្រសិទ្ធភាពថាមពលកម្ពុជា បានរកឃើញ នៃការចូលចូលរួមសន្សំថាមពល ជាមធ្យមប្រមាណ ១០ ភាគរយ ដោយបានកាត់បន្ថយនូវខ្ទង់ការចំណាយមួយចំនួន សម្រាប់ការធ្វើអាជីវកម្ម ជាពិសេសការផ្លាស់ប្ដូរឥរិយាបទរបស់បុគ្គលិកក្រុមហ៊ុន និងទទួលយកវប្បធម៌ប្រសិទ្ធភាពថាមពលដ៏ទូលំទូលាយនៅក្នុងប្រព័ន្ធអេកូការងារ។
លោក យក់ សេដ្ឋា នាយកធនធានមនុស្សក្រុមហ៊ុន Thalias លើកឡើងនៅក្នុងសន្និសីទសារព័ត៌មាន ស្តីពីការបញ្ចប់កម្មវិធីប្រកួតប្រជែងប្រសិទ្ធភាពថាមពលកម្ពុជា ក្នុងរដូវកាលទី១ នៅថ្ងៃទី២ ខែ វិច្ឆិកា ឆ្នាំ២០២២ នេះថា ការប្រកួតប្រជែងប្រសិទ្ធភាពថាមពលកម្ពុជា គឺជាមធ្យោបាយលើកទឹកចិត្ត និងច្នៃប្រឌិត សម្រាប់ក្រុមហ៊ុននានា ដែលជាការលើកកម្ពស់ការយល់ដឹងអំពីប្រសិទ្ធភាពថាមពល និងសន្សំសំចៃថាមពល និងជាផ្នែកមួយនៃការចូលរួមលើកកម្ពស់ និងការប្រកួតប្រជែងរបស់រោងចក្រ សហគ្រាសនានា ដែលកំពុងប្រតិបត្តិការអាជីវកម្ម នៅក្នុងព្រះរាជាណាចក្រកម្ពុជា។
លោក យក់ សេដ្ឋា បន្តថា ជាក់ស្តែងការប្រកួតប្រជែងប្រសិទ្ធភាពថាមពលកម្ពុជានេះ ភោជនីយដ្ឋាន Topaz របស់ក្រុមហ៊ុន Thalias គ្រុប គឺទទួលបានជ័យលាភីលេខ៣, ដែលការចូលរួមនេះ ពិតជាមានសារៈសំខាន់ណាស់ ក្នុងការចូលរួមលើកកម្ពស់បរិស្ថាន តាមរយៈការកាត់បន្ថយនៃការបញ្ចេញការបូនឌីអុកស៊ីត ទៅលើបរិយាកាស ជាពិសេសការអនុវត្តតាមកម្មវិធីប្រកួតប្រជែងនេះ មិនត្រឹមតែការសន្សំសំចៃថាមពលប៉ុណ្ណោះទេ ជាការបង្កើនចំណេះដឹងដល់បុគ្គលិកឲ្យយល់ដឹង ពីការសន្សំសំចៃថាមពល នៅក្នុងក្រុមហ៊ុន ជាពិសេសការយកទៅអនុវត្ត នៃការប្រើប្រាស់ថាមពលនៅក្នុងក្រុមគ្រួសារ និងនៅក្នុងសហគមន៍រស់នៅរបស់ពួកគាត់។
ចំណែក លោក ប៉ូរ៉ូ ណូខាសវ៉ូវឡេន ប្រធាននាយកប្រតិបត្តិហិរញ្ញវត្ថុ អេ.អេម.ខេ លើកឡើងឲ្យដឹងថា ទាក់ទងការសន្សំថាមពលនេះ គ្រឹះស្ថានមីក្រូហិរញ្ញវត្ថុ អេ អឹម ខេ សាខាខេត្តស្ទឹងត្រែង គឺទទួលបានជ័យលាភីលេខ១ ក្នុងការប្រកួតប្រជែង ដែលតាមរយៈនេះបង្ហាញឲ្យឃើញថា បុគ្គលិករបស់ក្រុមហ៊ុន មានការផ្លាស់ប្តូរឥរិយាបទជាច្រើន ដូចជា ការប្រើប្រាស់ភ្លើងដែលមិនមានការចាំបាច់នៅក្រៅម៉ោងធ្វើការ, ការប្រើប្រាស់ម៉ាស៊ីនត្រជាក់ក្នុងកម្រិតអង្សាសមរម្យ, ជាពិសេសការរៀបចំ នៅក្នុងសាខា ឬតាមការិយា ល័យ ត្រូវប្រើប្រាស់អំពូលភ្លើង ដែលជួយសន្សំសំចៃថាមពលជាដើម។
សូមបញ្ជាក់ថា៖ ការប្រកួតប្រជែងប្រសិទ្ធភាពថាមពលកម្ពុជា បានរៀបចំដោយក្រុមហ៊ុន Sevea និងវិទ្យាស្ថានបច្ចេកវិទ្យាកម្ពុជា (ITC), ដោយបានអនុវត្តក្នុងរយៈពេល ១ឆ្នាំ។ កម្មវិធីនេះ គឺជាការសម្របខ្លួនក្នុងតំបន់ នៃការប្រកួតប្រជែង ដែលផ្តួចផ្តើមដោយវិទ្យាស្ថានបារាំង សម្រាប់ការសាងសង់ (IFPEB) ជាការដេញថ្លៃ ដើម្បីកាត់បន្ថយការបញ្ចេញកាបូននៅប្រទេសបារាំង, ក្នុងនោះនៅក្នុងរដូវការទី១ នៃការប្រកួតប្រជែងប្រសិទ្ធភាពថាមពលកម្ពុជានេះ មានក្រុមហ៊ុនដែលបានចូលរួមមានចំនួន ១៤ ត្រូវប្រមាណ ២២ អគារ និងមាននិយោជិកចូលរួមជាង ២ ៣០០នាក់ ចំពោះលទ្ធផលចុងក្រោយ បានរកឃើញការសន្សំសំចៃនៅតាមអគារ ជាមធ្យមប្រមាណ ១០ ភាគរយ ត្រូវប្រមាណជា ២០ ម៉ឺនគីឡូវ៉ាត់ម៉ោងក្នុងការសន្សំសំចៃ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
