ភ្នំពេញ៖ មន្ត្រីជាន់ខ្ពស់នៃនិយ័តករមូលបត្រកម្ពុជា បានបញ្ជាក់ថា នៅពេលខាងមុខឆាប់ៗនេះ នឹងដាក់ឲ្យអនុវត្តនូវបទបញ្ញត្តិ ស្តីពីការអនុញ្ញាតក្នុងការបោះផ្សាយលក់មូលនិធិ ដើម្បីរួមចំណែកអភិវឌ្ឍហិរញ្ញប្បទាននិរន្តរភាព តាមរយៈការកៀរគរទុនពីផ្សារមូលបត្រកម្ពុជា។
ឯកឧត្តម សៀង ធីរិទ្ធ អគ្គនាយករង នៃនិយ័តករមូលបត្រកម្ពុជា នៅក្នុងសិក្ខាសាលាស្តីពី “ហិរញ្ញប្បទានប្រកបដោយនិរន្តភាព” កាលពីព្រឹកថ្ងៃទី២ ខែវិច្ឆិកា ឆ្នាំ២០២២នេះ បានមានប្រសាសន៍ថា គិតមកដល់បច្ចុប្បន្ន ផ្សារមូលបត្រកម្ពុជា បានបន្តទៅមុខជាលំដាប់តាមរយៈការចុះបញ្ជីលក់មូលបត្រ និងការចូលរួមរបស់តួអង្គពាក់ព័ន្ធផ្សេងៗទៀត។ ឯកឧត្តម បានបន្តថា ដូច្នេះទាក់ទងការបោះផ្សាយលក់មូលនិធិនេះ គឺសំដៅទៅដល់ការបោះផ្សាយ ដោយធ្វើឡើងតាមរយៈក្រុមហ៊ុន និងតួអង្គពាក់ព័ន្ធដែលទទួលបានអាជ្ញាប័ណ្ណ និងការអនុញ្ញាតពីក្រសួង ស្ថាប័នមូលបត្រ ហើយនឹងធ្វើការបោះផ្សាយស្របតាមបទប្បញ្ញត្តិដែលចេញជាធរមាននាពេលឆាប់ៗខាងមុខ។
ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃផ្សារមូលបត្រកម្ពុជា បានបញ្ជាក់ថា គិតមកដល់ពេលនេះ កម្ពុជាមានក្រុមហ៊ុនចុះបញ្ជីចំនួន១៧ ដែលរួមមានក្រុមហ៊ុនចំនួន៩ បានចុះបញ្ជីជាភាគហ៊ុន និង៨ទៀត បានចុះបញ្ជីជាសញ្ញាបណ្ណសាជីវកម្ម។
ឯកឧត្តមបានឲ្យដឹងទៀតថា បច្ចុប្បន្ន ក៏មានក្រុមហ៊ុនមួយដែលកំពុងបំពេញនីតិវិធីបោះផ្សាយសញ្ញាបណ្ណបៃតង ដែលប្រតិបត្តិការចម្បងផ្តល់សេវាកម្មជួលការិយាល័យ។ ឯកឧត្តមលើកឡើងបន្តថា សញ្ញាបណ្ណបៃតងសង្គម និងសញ្ញាបណ្ណនិរន្តរភាព គឺជាឧបករណ៍ហិរញ្ញវត្ថុថ្មី មានភាពទាក់ទាញ និងផ្តល់ជាប្រយោជន៍ជាច្រើនមកកាន់សង្គម និងសេដ្ឋកិច្ចជាតិ ស្របពេលដែលទីផ្សាររបស់កម្ពុជាទទួលបានការចាប់អារម្មណ៍ ជាមួយនឹងការកើនឡើងយ៉ាងខ្លាំងនូវចំនួនវិនិយោគិន និងទំហំជួញដូរ។
សូមបញ្ជាក់ថា ផ្សារមូលបត្រកម្ពុជា ត្រូវបានបង្កើតឡើង និងចាប់ផ្តើមដំណើរការជួញដូរជាលើកដំបូងនៅក្នុងឆ្នាំ២០១២ជាមួយនឹងវត្តមានរបស់ក្រុមហ៊ុនតែមួយគត់ គឺរដ្ឋាករទឹកស្វយ័តក្រុងភ្នំពេញ ដែលជាសហគ្រាសសាធារណៈក្រោមការគ្រប់របស់រដ្ឋ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
