ក្រចេះ ៖ ឧបករណ៍នេសាទល្មើសច្បាប់ និងកូនត្រីច្រុះជាច្រើនគីឡូ ត្រូវបានខណ្ឌរដ្ឋបាល ជលផលក្រចេះ ប្រលែងចូលក្នុងបឹងអាងធម្មជាតិ បន្ទាប់ពីបង្ក្រាបបាន។
ប្រតិបត្តិការនេះ ធ្វើឡើង កាលពីនៅថ្ងៃទី១៨ ខែតុលា ម្សិលមិញនេះ ដឹកនាំដោយ លោក ម៉ុក ពន្លក នាយខណ្ឌជលផល សហការជាមួយ គណៈបញ្ជាការឯកភាពស្រុកឆ្លូង បានចុះត្រួតពិនិត្យ និងបង្ក្រាបបទល្មើស ជលផល នៅចំណុចបឹងប្រាំង ឃុំកញ្ជរ ស្រុកឆ្លូង ខេត្តក្រចេះ ដោយរឹបអូសបានវត្ថុតាង និងបានប្រលែងកូនត្រីចម្រុះជាច្រើនចូលក្នុងអាងបឹងធម្មជាតិវិញ។
លោក ម៉ុក ពន្លក បានឲ្យដឹងថា ប្រតិបត្តិការបង្ក្រាបនេះ គឺបានរុះរើ និងដកហូតបាន របាំងស្បៃមុងចំនួន ២១ខ្សែ ប្រវែងប្រមាណជា ១៣០០ម៉ែត្រ , លូស្បៃមុងចំនួន ២១មាត់លូ, របាំងសាច់អួននីឡុងក្រឡាញឹក ៣ខ្សែ ប្រវែងប្រមាណជា ២០០ម៉ែត្រ, លបសាច់អួនក្រឡាញឹក ចំនួន ៣គ្រឿង, បង្គោលចម្រឹងឫស្សី ៣១៥ដើម, ចាក់លែងត្រីចម្រុះចូលបឹងធម្មជាតិប្រមាណ ៧០គីឡូក្រាម។
លោកនាយខណ្ឌ បានបញ្ជាក់ថា វត្ថុតាងមួយចំនួនរួមមាន លូស្បៃមុង និងលបសាច់អួន ក្រឡាញឹក ត្រូវបានសមត្ថកិច្ចចម្រុះធ្វើការបំផ្លាញចោលនៅ និងកន្លែង ។ ដោយឡែក របាំងស្បៃមុង និងសាច់អួនក្រឡាញឹក បានដឹកយកទៅថែរក្សាទុកនៅផ្នែករដ្ឋបាលជលផល ព្រែកប្រសព្វ ដើម្បីទុកជូនអាជ្ញាធរមូលដ្ឋាន និងប្រជាពលរដ្ឋយកទៅប្រើប្រាស់ ក្នុងការងារកសិកម្ម នៅពេលមានការស្នើសុំ។
លោក ម៉ុក ពន្លក ក្នុងនាមជាមន្ត្រីជំនាញ បានអំពាវនាវ និងសំណូមពរ ដល់បងប្អូនប្រជាពលរដ្ឋឲ្យចូលរួមគ្នា ជាពិសេសប្រជានេសាទ សូមយោគយល់ និងសុំអោយមានការចូលរួមដើម្បីថែរក្សា ការពារ នូវធនធានជលផលទាំងអស់គ្នា ជាពិសេសមិនត្រូវយកឧបករណ៍នេសាទខុសច្បាប់ ដែលច្បាប់ស្ដីពីជលផល បានធ្វើការហាមឃាត់ ដូចជា ឧបករណ៍ ឆក់ត្រី និងឧបករណ៍នេសាទស្បៃម៉ុង ជាឧបករណ៍នេសាទខុសច្បាប់ យ៉ាងធ្ងន់ធ្ងរ ហើយកុំយកមកធ្វើការនេសាទក្នុងដែនដីនេសាទ ទាំងបឹង,ទន្លេ,ព្រែក, ស្ទឹង និងអូរ ព្រោះថា ឧបករណ៍ទាំងនេះបានបំផ្លិចបំផ្លាញ ទាំងត្រីមេពូជ និងកូនត្រីតូចៗ សូម្បីតែកូនកំពឹស ក៏មិនសេសសល់ដែរ៕
អត្ថបទ ៖ ម័រ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
