កណ្តាល៖ នៅថ្ងៃទី៣ ខែវិច្ឆិកានេះ មន្ត្រីជំនាញកសិកម្មរុក្ខាប្រមាញ់ និងនេសាទខេត្តកណ្តាល និង​អ្នកជំនាញក្រុមហ៊ុនកសិកម្មឯកជន​ បានសហការប្រារព្ធ «ទិវាស្រែ»បង្ហាញពីការប្រៀបធៀប​ទិន្នន័យ និងប្រសិទ្ធភាពសេដ្ឋកិច្ចរវាងពូជស្រូវផ្សេងៗគ្នាតាមរយៈការធ្វើស្រែបង្ហាញ​ស្រូវសន្ទូង និង​ស្រូវពង្រោះដោយប្រើជីធម្មជាតិ និងជីគីមី។

លោក ប៊ុន ទួនស៊ីម៉ូណា ប្រធានមន្ទីរកសិកម្ម រុក្ខាប្រមាញ់ ​និងនេសាទ ​ខេត្តកណ្តាល ថ្លែងថា នៅ​ក្នុង«ទិវាស្រែ»បង្ហាញនៅក្នុងភូមិស្រែអំពិល​ ស្រុកកៀនស្វាយ​ គឺយើងបង្ហាញពូជស្រូវបីប្រភេទ រួមមាន៖ ពូជស្រូវសែនក្រអូប ពូជស្រូវជប៉ុន Japan nika ​និងពូជស្រូវOMហាបួនហាមួយ និង បង្ហាញ​ជីធម្មជាតិច្រើនប្រភេទទៀត។

សម្រាប់ពូជស្រូវមានគុណភាពជម្រុញកសិកប្រើប្រាស់នោះ គឺក្រុមហ៊ុន ហ៊ានប្រមូលទិញក្នុង១​មួយ​គីឡូក្រាម តំលៃពី​ ៨០០ទៅ ១៥០០រៀល។

បើតាមបណ្តាតំណាងក្រុមហ៊ុនកសិកម្ម ជ​ម្រុញការផលិតពូជស្រូវក្នុងស្រុក​ បានថ្លែងថា ការ​ផលិត​ពូជស្រូវមានគុណភាពខ្ពស់សុទ្ធ​ ជាក់ស្តែងណាស់គឺទាមទារ ​ការប្រើប្រាស់​គ្រឿងយន្តកសិកម្ម ដើម្បី​ផលិត និង​បន្សុទ្ធ​វា​ឲ្យបានល្អ ​ទើបធ្វើឲ្យផលស្រូវប្រមូលបានច្រើន។

សូមបញ្ជាក់ថា​ ពូជស្រូវអង្ករសែនក្រអូប ​និងពូជស្រូវជប៉ុន ​ដាំដុះដោយប្រើជីធម្មជាតិ ដែល​គេធ្វើការបង្ហាញ គឺមួយហិចតា ​អាចប្រមូលផលបានជាង​ ៥តោន ​ដោយឡែក ពូជស្រូវ​ហាបួនហាមួយ គឺ១ហិកតាប្រមូលផលបានជិត៨តោន៕អត្ថបទ៖ ស៊ុម សុខជា