ក្រុមអ្នកស៊ើបអង្កេត ដែលកំពុងស្រាវជ្រាវករណីប្រជ្រៀតជាន់គ្នាស្លាប់មនុស្ស១៥៦ នាក់ អំឡុងពិធីបុណ្យ Halloween នៅក្នុងប្រទេសកូរ៉េខាងត្បូង បានឆ្មក់​ចូល​ប៉ុស្តិ៍​នគរបាល​ទូទាំង​ទីក្រុង​សេអ៊ូលកាលពីថ្ងៃពុធ។

ទីភ្នាក់ងារនគរបាលទីក្រុងសេអ៊ូល បាននិយាយថា ក្រុមអ្នកស៊ើបអង្កេត បានឆ្មក់ចូល​ប៉ុស្តិ៍​នគរបាល​ចំនួន៨ កន្លែង និងបានរឹបអូសរបាយការណ៍ផ្ទៃក្នុង និង ឯកសារមួយ​ចំនួនពាក់ព័ន្ធ​របាយការណ៍​ធ្វើ​ឡើងដោយសាធារណជនដែលបានហៅទូស័ព្ទ សុំ​ជំនួយ​សង្រ្គោះ​បន្ទាន់​តា​ម​ខ្សែ​ទូរស័ព្ទ hotline 112។   

ក្នុងចំណោមការិយាល័យដែលត្រូវបានឆ្មក់ចូលនោះ គឺមានប៉ុស្តិ៍នគរបាលនៅស្រុក Yongsan ដែល​ស្ថិត​នៅក្បែរខាងនឹងតំបន់កម្សាន្តសម្រាប់ពេលរាត្រី Itaewon ជាទី​ដែល​ការ​ប្រជ្រៀត​ជាន់​គ្នា​បាន​កើតឡើង។

ការឆ្មក់ចូលនេះ បានកើតមានឡើង ខណៈក្រុមអាជ្ញាធរកូរ៉េខាងត្បូង ប្រឈមនឹង​សម្ពាធ​ពី​សាធារណ​ជន​កាន់តែខ្លាំងឡើង ស្របពេលមានការលើកឡើងថា មានការ​គ្រប់​គ្រង​ហ្វូង​មនុស្ស​បាន​តិចតួច​ប៉ុណ្ណោះ ក្នុងតំបន់ Itaewon នៅយប់កើតហេតុ ទោះបីជា​នគរបាល​បាន​ទទួល​ការ​ព្រមាន​ជា​មុនក៏ដោយ៕