កំពត៖ កងកម្លាំងមជ្ឈមណ្ឌលសកម្មភាពកម្ចាត់មីនកម្ពុជា (CMAC) ​គ្រោងនឹងបញ្ចប់ការបោស​សំអាត​គ្រាប់មីន ​និងយុទ្ធភណ្ឌមិនទាន់ផ្ទុះ ក្នុងភូមិសាស្ត្រខេត្តកំពត ​នៅក្នុងអំឡុងខែមីនា ឆ្នាំ២០២៣ខាង ខណៈផ្ទៃដីចម្ការមីន ​ក្នុងខេត្តមួយនេះ ​នៅសល់មិនដល់១ពាន់ហិកតានោះទេ ។

យោងតាមទិន្នន័យថ្នាក់ជាតិ បានបង្ហាញថា ​ផ្ទៃដីសរុបក្នុងខេត្តកំពត ដែលរងផលប៉ះពាល់​ដោយ​សារគ្រាប់មីននៅសល់មានចំនួន ​៩៧៥ហិកតា កម្លាំងស៊ីម៉ាក់បានទទួលអនុវត្តរំដោះខេត្តកំពត ដោយបានចាប់ផ្តើមអនុវត្តនៅដើមខែសីហា​ ឆ្នាំ២០២២ ។

គិតត្រឹមចុងខែកញ្ញាកន្លងទៅនេះ កម្លាំងស៊ីម៉ាក់ បានសម្រេចសមិទ្ធផលបោស​សម្អាតផ្ទៃដី​សរុប​ចំនួន ១៩៩ហិកតា ហើយបានរកឃើញគ្រាប់មីនប្រឆាំងមនុស្សចំនួន ​១៣៥គ្រាប់ និងយុទ្ធភណ្ឌ​មិនទាន់ផ្ទុះ១៦០គ្រាប់ ហើយតាមផែនការត្រៀមបញ្ចប់បញ្ហាគ្រាប់មីន ​ប្រឆាំងមនុស្សនៅខេត្តកំពត ក្នុងចុងខែមីនា ​ឆ្នាំ២០២៣ ។

ក្នុងឱកាសជួបសំណេះសំណាលកងកម្លាំងស៊ីម៉ាក់ ​កំពុងប្រតិបត្តិការនៅខេត្តកំពត នាថ្ងៃទី៣​ខែវិច្ឆិកា ឆ្នាំ២០២២ ឯកឧត្តម ហេង រតនា ​អគ្គនាយកមជ្ឈមណ្ឌលសកម្មភាពកំចាត់មីន​កម្ពុជា មាន​ប្រសាសន៍ថា នៅខេត្តកំពត កម្លាំងស៊ីម៉ាក់បានដាក់ពង្រាយកម្លាំងប្រតិបត្តិការចំនួន ​១៥ក្រុម ទៅ​លើ​ស្រុកមួយចំនួន ​មានស្រុកបន្ទាយមាស ​អង្គរជ័យឈូក ​និង​ស្រុកជុំគិរីជាដើម ។

គួរបញ្ជាក់ថា កម្លាំងស៊ីម៉ាក់​ បានទទួលការគាំទ្រពីគម្រោងសម្តេចតេជោ​ ក្នុងជំហានទី១ សម្រាប់​អនុវត្តភារកិច្ចបញ្ចប់ខេត្តចំនួន៥​ ជាខេត្តអស់គ្រាប់មីនប្រឆាំងមនុស្ស ​រួមមានខេត្តតាកែវ កំពត កំពង់ឆ្នាំង​ កំពង់ចាម និងខេត្តស្វាយរៀង ​ដែលផ្ទៃដីចម្ការមីនសរុបជិត ៣ ០០០ហិកតា ៕ អត្ថបទ៖ បានសុខរិទ្ធ