ភ្នំពេញ៖ ក្រុមប្រឹក្សារាជធានីភ្នំពេញ នៅថ្ងៃទី ៣ខែវិច្ឆិកានេះ បានរៀបចំវេទិកាសាធារណៈដោយ​ជួប​ជាមួយប្រជាពលរដ្ឋក្នុងខណ្ឌមានជ័យ ​ដោយផ្ទាល់​ដើម្បីទទួលនូវបញ្ហា និងសកវែងរក​ដំណោះ​ស្រាយជូន។

វេទិកាសាធារណៈនេះរៀបចំឡើងដោយមានវត្តមានប្រជាពលរដ្ឋ ​មន្រ្តីថ្នាក់មូលដ្ឋាន រួមទាំង​សង្គមស៊ីវិល ដើម្បីបើកឱកាសអោយប្រជាពលរដ្ឋលើកឡើងនូវបញ្ហា ​ផលវិបាក ដែលកំពុងជួប​ប្រទះ ដើម្បីស្វែងរកនូវដំណោះស្រាយជូនពួកគាត់វិញ។

ក្នុងវេទិកាសាធារណៈនេះ​ គឺផ្តោតលើចំណុចសំខាន់ចំនួន ៤ រួមមាន​ បញ្ហាសន្តិសុខសណ្ដាប់ធ្នាប់ បញ្ហាបរិស្ថាន ​បញ្ហាការអភិវឌ្ឍ និងបញ្ហាសេវា​សាធារណៈ។

តាមរយៈវេទិកានេះ ​ប្រជាពលរដ្ឋភាគច្រើនលើកឡើងជាការស្នើសុំអោយ​មានការសាងសង់​ជួសជុល​ផ្លូវប្រព័ន្ធលូ ​ខណៈមានពលរដ្ឋខ្លះស្នើសុំអោយមានការរៀបចំ​សណ្ដាប់ធ្នាប់តាមផ្លូវ និង​បញ្ហាជនអនាថា ក្នុងមូលដ្ឋានរស់នៅរបស់ខ្លួន។

ជាការឆ្លើយតបទៅនឹងការស្នើសុំទាំងនេះ លោក ហែម​ ដារិទ្ធិ អភិបាលខណ្ឌមានជ័យ បានបញ្ជាក់​ប្រាប់​ពលរដ្ឋថា ការស្ថាបនាសាងសង់ផ្លូវ និង​ការជួសជុល​ប្រព័ន្ធលូ ​គឺ​នឹងធ្វើទាំងអស់ គ្រាន់តែ​ចំណុចខ្លះអាចធ្វើមុននិងចំណុចខ្លះត្រូវធ្វើក្រោយ។

ក្នុងឱកាសវិទិកានេះ លោក នួន ផារ័ត្ន អភិបាលរងរាជធានីភ្នំពេញ ​បានឆ្លើយតបដែរថា ក្រុម​ការងារគឺនឹងសិក្សា និងរៀបចំការផ្តល់ជូនទៅតាមសំណូមពរ​តាមលទ្ធភាពជាក់ស្ដែង។

ចំពោះប្រជាពលរដ្ឋដែលបានចូលរួមក្នុងវេទិកានេះ ​គឺសុទ្ធតែពេញចិត្ត។ ភាពពេញចិត្តដោយសារ ពួកគេ​អាចលើកឡើងនូវបញ្ហា ក្ដីកង្វល់ ​ជូនថ្នាក់ដឹកនាំដោយផ្ទាល់ ដើម្បីស្វែងរកដំណោះស្រាយ​ជូនពួកគាត់៕ អត្ថបទ៖ គឹមហុក