កោះកុង៖ មន្រ្តីជំនាញបច្ចេកទេសនៃធនាគារអភិវឌ្ឍន៍អាស៊ី និងក្រុមមន្រ្តីជំនាញនៅខេត្តកោះកុង បានកំពុងតែពិនិត្យពិគ្រោះយោបល់គ្នា ដើម្បីធ្វើយ៉ាងណាកែលម្អអភិវឌ្ឍន៍សង្វាក់តម្លៃវិស័យ​ធនធាន​ជលផលដែលឆ្លើយតបទៅនឹងគ្រោះមហន្តរាយ។

លោក Steven Goldfinch មន្រ្តីជំនាញខាង​បម្រែបម្រួល​អាកាស​ធាតុ​របស់​ធនាគារ​អភិវឌ្ឍន៍​អាស៊ី បាន​សិក្សារកឃើញថា ​បញ្ហាប្រឈម​ និងហានិភ័យពាក់ព័ន្ធនឹងតំបន់ឆ្នេរ ក៏ដូចជា​ហេដ្ឋា​រចនា​សម្ព័ន្ធ​នេសាទ​បន្តជួប​ការ​គំរាមកំហែង​ និង​ងាយរងផល​ប៉ះពាល់​ពេល​មានការ​ប្រែប្រួល​អាកាធាតុតាម​បណ្តោយឆ្នេរសមុទ្រ​នៅ​ប្រទេសកម្ពុជា។

លោក Steven បានឱ្យដឹងនៅថ្ងៃទី៣ ខែវិច្ឆិកា បន្តទៀតថា ​ការដែល​បង្កើន​កិច្ចសហការពិនិត្យ​ពិភាក្សា​រួមគ្នា​ជា​មួយមន្រ្តីជំនាញនៅក្នុងខេត្តកោះកុង ​នៅពេលនេះ ​ក៏ព្រោះតែចង់ប្រមូលព័ត៌មាន និង​ដាក់​ចេញនូវយន្តការពង្រឹងភាពធន់​នឹងការ​ប្រែប្រួល​អាកាសធាតុ​លើវិស័យជលផលក្នុងសមុទ្រ និងផ្តោត​សំខាន់​សំណង់ផែនេសាទឡើង​ផល​នេសាទទៅកាន់ទីផ្សារ។

ក្នុង​សិក្ខាសាលាណែនាំស្តីពីហេដ្ឋារចនាសម្ព័ន្ធ​នេសាទ​ដែលធន់​នឹងគ្រោះមហន្តរាយ ​លោក ខូវ គួង អនុប្រធានរដ្ឋបាលជលផល​ ថ្លែងថា​ ការ​ពង្រឹង​ផ្នែក​ចំណេះដឹង​លើវិស័យ​ជលផលនេះ​ នឹងផ្តល់​ជា​សេចក្តី​ណែនាំ​មួយ​ស្តីពី​ហេដ្ឋា​រចនា​សម្ព័ន្ធ​ធន់​នឹង​គ្រោះ​មហន្តរាយនៅកម្ពុជា ​នាពេលខាងមុខ សម្រាប់​ជំនួយ​សារត្មីដល់អ្នកពាក់ព័ន្ធលើការកំណត់វិនិយោគ ​កែ​លម្អ​អភិវឌ្ឍន៍ធ​នធាន​ជលផល​តាមតំបន់ឆ្នេរសមុទ្រ ​និងសកម្មភាពប្រតិបត្តិការចំគោលដៅយូរអង្វែង។

ដោយឡែកលោកស្រី នារីនេត អភិបាលរងខេត្តកោះកុង លើកឡើងថា ធនធានជលផលសមុទ្រ​លើ​ពិភព​លោក និងនៅកម្ពុជាប្រឈម​នឹងការ​គំរាមកំហែង​ផ្នែកប្រព័ន្ធអេកូឡូស៊ី ដោយសារតែការ​ប្រែប្រួលអាកាសធាតុ រួមមាន៖ ការកើនឡើងកម្ពស់ទឹកសមុទ្រ ខ្យល់ព្យុះកំបុតត្បូង និងព្រឹត្តការណ៍​គ្រោះមហន្តរាយនានា។

លោកស្រីអភិបាលរងខេត្ត ​ជឿជាក់ថា រាល់ការពិគ្រោះយោបល់អំពី​ហេដ្ឋា​រចនាសម្ព័ន្ធតំបន់ឆ្នេរ និង​ជលផលរវាងគ្នានិងគ្នាក្រោមវិជ្ជាមាននេះ នឹងក្លាយយធាតុចូលដ៏សំខាន់បម្រើដល់ការចូលរួម​ចំណែក​ធានា​បាននូវសន្តិសុខស្បៀងអាហារ ​ព្រមទាំងអាហារូបត្ថម្ភ ដែលឆ្លើយតបទៅ​នឹង​គ្រោះមហន្តរាយ៕អត្ថបទ៖ ឈឹម មករា