ភ្នំពេញ៖ ឯកឧត្តម វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា បានអះអាងថា ភាគីចិនសន្យា​បន្ត​កាគាំទ្រ ចំពោះការអភិវឌ្ឍសង្គមសេដ្ឋកិច្ចរបស់កម្ពុជា និងបន្តធ្វើជាដៃគូពាណិជ្ជកម្មធំជាងគេ ប្រទេសប្រភពវិនិយោគធំជាងគេ និងដៃគូជំនួយអភិវឌ្ឍន៍ធំជាងគេរបស់ប្រទេសកម្ពុជា ក្នុងរយៈពេលច្រើនឆ្នាំជាប់ៗគ្នា ។

ក្នុងសិក្ខាសាលាស្ដីពី “សហគមន៍ជោគវាសនារួមកម្ពុជាចិន ​ប្រកៀកស្មាគ្នាឆ្ពោះទៅមុខក្នុងដំណើរថ្មី” រៀបចំឡើងដោយវិទ្យុមិត្តភាពកម្ពុជាចិននៃអគ្គស្ថានីយវិទ្យុ និងទូរទស្សន៍​មជ្ឈិម​ចិន ​ព្រឹទ្ធសភាកម្ពុជា សមាគមស្រាវជ្រាវវឌ្ឍនភាពកម្ពុជា-ចិន កាលពីថ្ងៃទី៣ ​ខែវិច្ឆិកា ឆ្នាំ២០២២ ឯកអគ្គរដ្ឋទូតចិន បាន​ថ្លែងថា កម្ពុជា-ចិន រក្សាបានទំនាក់ទំនងកម្រិតខ្ពស់យ៉ាងស្អិតរមួតជាប់ជានិច្ច​ និងពង្រឹងការដឹកនាំ​ជា​យុទ្ធសាស្ត្រនូវទំនាក់ទំនងទ្វេភាគី ​និងឈរលើគោលការណ៍គោរពគ្នា ​ស្វែងយល់គ្នា រាប់អានគ្នា​ដោយសមធម៌ មិនជ្រៀតជ្រែក​កិច្ចការផ្ទៃក្នុងគ្នាទៅវិញទៅមក​ ភាគីទាំងពីរបានគោរពមាគ៌ា​អភិវឌ្ឍន៍ ដែល​គ្រប់ភាគីជ្រើសរើសទៅវិញទៅមក និ​ងប្រកាន់គោលជំហរគាំទ្រគ្នាទៅវិញទៅមក នៅ​លើ​បញ្ហាទាក់ទងដល់ផលប្រយោជន៍ធំនៃភាគីនីមួយៗ ។

ឯកឧត្តម បន្តថា ភាគីទាំងពីរតែងតែជំរុញកិច្ចសហប្រតិបត្តិការជាក់ស្ដែងទាំងអស់ ដោយឈរលើ​គោលការណ៍​ឈ្នះឈ្នះ ផ្ដល់ផលប្រយោជន៍ឱ្យគ្នាទៅវិញទៅមក ​ជំរុញការអភិវឌ្ឍរួម និង​សម្រេចបានវិបុលភាពរួមគ្នាក្នុងការស្វែងរកវឌ្ឍនភាពរៀងៗខ្លួន ។

ទូតចិន​ បានបញ្ជាក់ថា ភាគីចិន អនុវត្តការសន្យាគាំទ្រការអភិវឌ្ឍសង្គមសេដ្ឋកិច្ចកម្ពុជា​យ៉ាងយក​ចិត្តទុកដាក់ ​បន្តធ្វើជាដៃគូពាណិជ្ជកម្មធំជាងគេ​ ប្រទេសប្រភពវិនិយោគធំជាងគេ និងដៃគូជំនួយ​អភិវឌ្ឍន៍​ធំជាងគេរបស់ប្រទេសកម្ពុជា ក្នុងរយៈពេលច្រើនឆ្នាំជាប់ៗគ្នា ហើយគាំទ្រឱ្យផលិតផល​កសិកម្ម​គុណភាពខ្ពស់របស់ប្រទេសកម្ពុជា នាំចូលទៅទីផ្សារប្រទេសចិន រួមទាំងផ្ដល់ ជំនួយ​ឥតសំណង​របស់ប្រទេសចិន​ និងគម្រោងវិនិយោគធំៗរបស់សហគ្រាសចិន នៅកម្ពុជា បានសម្រេចលេចចេញរូបរាងឡើងជាបន្តបន្ទាប់ ។

លោក អាន ស៊ីយូ ប្រធានមជ្ឈមណ្ឌលកម្មវិធីភាសាតំបន់អាស៊ី ​និងអាហ្រ្វិកនៃអគ្គស្ថានីយវិទ្យុ និង​ទូរទស្សន៍មជ្ឈិមចិន​ បានឲ្យដឹងថា សហគមន៍ជោគវាសនារួមកម្ពុជា-ចិន មិនមែនជាទ្រឹស្ដីមិន​ច្បាស់លាស់​នោះទេ ពោលគឺវាបានចូលទៅក្នុងជីវភាពរស់នៅប្រចាំថ្ងៃ របស់ប្រជាជន​នៃ​ប្រទេស​ទាំងពីរ​ និងទាក់ទងដោយផ្ទាល់ដល់វឌ្ឍនភាព មានរយៈពេលវែងនៃសង្គមសេដ្ឋកិច្ច​នយោបាយ​របស់​ប្រទេសទាំងពីរ ។

ឯកឧត្តម អ៊ុ សារឹទ្ធ អគ្គលេខាធិការព្រឹទ្ធសភា មានប្រសាសន៍ថា សិក្ខាសាលានេះ នឹង​ធ្វើឱ្យអ្នក​ចូលរួម​បានយល់កាន់តែស៊ីជម្រៅពីសមាជលើកទី២០ របស់បក្សកុម្មុយនិស្តចិន ហើយក៏បានចូលរួម​ឆ្លុះបញ្ចាំង​ភាពរឹងមាំនៃចំណងមិត្តភាព អមតៈរវាងកម្ពុជា-ចិន ដែលបាននឹងកំពុងវិវត្តជាសកល និង​ជាសកម្មភាពជំរុញចំណងមេត្រីភាពជាប្រពៃណីរវាងប្រទេសទាំងពីរ ដើម្បីបង្កើនល្បឿនចូលរួម​ជាមួយ​គ្នា​ក្នុងការកសាងសហគមន៍ជោគវាសនារួម ។

ឯកឧត្តម បានបន្តថា​ ភាគី​ទាំង​ពីរ​បន្តចាប់​ដៃគ្នា​កសាង​នូវភាព​សុខដុមរមនា​ សន្តិសុខ​គ្រប់ទីកន្លែង ការ​បើកទូលាយ យោគយល់គ្នា និង​ស៊ីជម្រៅនូវ​ទំនាក់ទំនង​រវាងប្រទេសទាំង​ពីរ​ដែលបាន​ប្រសិទ្ធ​នាម​ថា «ចំណងមិត្តភាពដែកថែប» ជាពិសេសរវាងសភានៃប្រទេសទាំងពីរ​បង្កើតបាន​ទំនាក់ទំនង​កិច្ច​សហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ ធានាដល់ដំណើរការនៃការកសាង​យុទ្ធសាស្ត្រខ្សែក្រវាត់​ និងផ្លូវប្រព្រឹត្តទៅដោយរលូនការពាររក្សា​ សន្តិសុខ​ស្ថេរភាព និង​អត្ថប្រយោជន៍​នៃការអភិវឌ្ឍ ៕ អត្ថបទ បាន សុខរិទ្ធិ