ភ្នំពេញ៖ ដើម្បីរក្សាបាននូវសន្តិសុខ របៀប​រៀបរយ សណ្តាប់ធ្នាប់ ​នាកិច្ចប្រជុំកំពូលអាស៊ាន ដែល​នឹងរៀបចំឡើង នៅក្នុងព្រះរាជាណាចក្រកម្ពុជា ​នាពេលខាងមុខនេះ​ ស្នងការដ្ឋាននគរបាល រាជធានីភ្នំពេញ បានត្រៀមកងកម្លាំងគ្រប់ប្រភេទ​រាប់ពាន់នាក់ ក្នុងការថែរក្សា​សន្តិសុខ​សណ្តាប់ធ្នាប់​ នាកិច្ចប្រជុំកំពូលអាស៊ាន ឱ្យបានល្អប្រសើរ ។

វរសេនីយ៍ឯក សាន សុខសីហា អ្នកនាំពាក្យ ស្នងការដ្ឋាននគរបាលរាជធានីភ្នំពេញ ​បានឱ្យដឹងថា ដោយអនុវត្តតាមបទបញ្ជា និងការណែនាំរបស់លោកឧត្តមសេនីយ៍ឯក ស ថេត អគ្គស្នងការ​រងនគរបាលជាតិ ​និងជាស្នងការនគរបាលរាជធានីភ្នំពេញ ​សមត្ថកិច្ចគ្រប់ផ្នែក​ ជាពិសេស នគរបាល​ចរាចរណ៍គ្រប់បណ្តាគោលដៅ ​ដោយសហការជាមួយតាមបណ្តាប៉ុស្តិ៍នគរបាលរដ្ឋបាល ត្រៀមខ្លួនរួចជាស្រេចក្នុងការ ​ជួយសម្រួលចរាចរណ៍ ​មិនឱ្យមានកកស្ទះឡើយ នាកិច្ចប្រជុំកំពូល​អាស៊ាន ​ដែលនឹងរៀបចំឡើង នៅក្នុងព្រះរាជាណាចក្រកម្ពុជា នៅសប្ដាហ៍ក្រោយនេះ ។

ក្រៅពីនេះ ​ស្នងការដ្ឋាននគរបាលរាជធានីភ្នំពេញ ​ក៏នៅមានកម្លាំងអន្តរាគមន៍ពិសេស​ ការិយា ល័យជំនាញពាក់ព័ន្ធ និងសមត្ថកិច្ចជំនាញពន្លត់អគ្គិភ័យត្រៀមចាំជួយអន្តរាគមន៍គ្រប់ពេលវេលា ៕