ភ្នំពេញ៖ កម្ពុជា-ថៃ ចុះហត្ថលេខាលើកិច្ចព្រមព្រៀងឥណទានសម្បទាន មានទំហំទឹកប្រាក់សរុប ៩៨៣ លានបាត ត្រូវប្រមាណ ៣០ លានដុល្លារអាមេរិក សម្រាប់គម្រោងលើកកម្រិតផ្លូវជាតិលេខ ៦៧ ប្រវែងប្រមាណ ១៣៥គីឡូម៉ែត្រ (សៀមរាប-អន្លង់វែង-ជាំ/សាង៉ាំ)។
ឯកឧត្តម Perames Vudthitornetiraks ប្រធានទីភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ច នៃបណ្តាប្រទេសជិតខាង (NEDA) លើកឡើងនៅក្នុងពិធីចុះហត្ដលេខា លើកិច្ចព្រមព្រៀងឥណទានសម្បទាន គម្រោងលើកកម្ពស់កម្រិតផ្លូវជាតិលេខ ៦៧ (សៀមរាប-អន្លង់វែង-ជាំ/សាង៉ាំ) នៅថ្ងៃទី៤ វិច្ឆិកា ឆ្នាំ២០២២ នេះថា បច្ចុប្បន្ន NEDA កំពុងដើរតួនាទីជាដៃគូអភិវឌ្ឍន៍ដ៏សកម្មមួយរបស់កម្ពុជា ដោយផ្តោតសំខាន់ទៅលើគម្រោងអភិវឌ្ឍន៍ហេដ្ឋារចនាសម្ព័ន្ធ ក្នុងគោលដៅពន្លឿនការតភ្ជាប់រវាងប្រទេសទាំងពីរ ឱ្យកាន់តែប្រសើរឡើង ក្នុងនោះ ផ្លូវជាតិលេខ ៦៧ នេះ គឺជាច្រកមួយដ៏សំខាន់ ក្នុងការបម្រើឱ្យគោលដៅនេះ។
ឯកឧត្តម បន្តថា ក្រៅពីកិច្ចសហប្រតិបត្តិការវិនិយោគ លើវិស័យហេដ្ឋារចនាសម្ព័ន្ធ, NEDA ក៏មានបំណងបង្កើតកិច្ចសហប្រតិបត្តិការជាមួយកម្ពុជា លើវិស័យផ្សេងៗទៀតផងដែរនាពេលអនាគតរួមមាន៖ កិច្ចសហប្រតិបត្តិការលើវិស័យរចនាសម្ព័ន្ធរូបវន្តសាធារ ណ:, ថាមពល, សុខាភិបាល និងការអភិវឌ្ឍទីក្រុងជាដើម។
ឯកឧត្ដម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ចនិងហិរញវត្ថុ បានសម្តែងនូវក្តីសោមន្សរីករាយ ដែលរាជរដ្ឋាភិបាលថៃ បានអនុម័តឥណទានសម្រាប់គម្រោងលើកកម្រិតផ្លូវជាតិលេខ៦៧ ព្រោះផ្លូវជាតិលេខ៦៧ នេះ គឺជាច្រកដ៏សំខាន់មួយ ក្នុងការតភ្ជាប់ប្រទេសកម្ពុជានិងប្រទេសថៃ ដោយតភ្ជាប់ខេត្តសៀមរាប និងភាគខាងជើងនៃប្រទេសកម្ពុជា ទៅនឹងខេត្តស៊ីសាកេត និងភាគឦសាននៃប្រទេសថៃ។ ការធ្វើឱ្យប្រសើរឡើងវិញនូវផ្លូវដ៏សំខាន់នេះ នឹងជួយធ្វើឱ្យការធ្វើចរាចរណ៍ និងការដឹកជញ្ជូនកាន់តែមានសុវត្ថិភាព ប្រសិទ្ធភាព សេដ្ឋកិច្ច និងចំណាយតិចជាងមុន ដែលនឹងជួយសម្រួលដល់ការធ្វើពាណិជ្ជកម្មឆ្លងព្រំដែន និងជំរុញទេសចរណ៍រវាងប្រទេសទាំងពីរ ព្រមទាំងអាចផ្តល់ជាឱកាសវិនិយោគ និងធុរកិច្ច និងលើកកម្ពស់ជីវភាពរបស់ប្រជាពលរដ្ឋទាំងពីរប្រទេសផងដែរ។
ជាងនេះទៅទៀត ផ្លូវនេះ មិនត្រឹមតែធ្វើឲ្យប្រសើរឡើង នូវការតភ្ជាប់ផ្ទៃក្នុងរបស់កម្ពុជា ជាមួយប្រទេសថៃប៉ុណ្ណោះទេ ថែមទាំងជំរុញការតភ្ជាប់ក្នុងតំបន់នៅក្នុងតំបន់ GMS និងអាស៊ានផងដែរ។
ឯកឧត្តម បន្តឲ្យដឹងថា ផ្លូវជាតិលេខ៦៧ ធ្លាប់ត្រូវបានស្តារ និងសាងសង់ឡើងវិញ ក្រោមហិរញ្ញប្បទានសម្បទានរបស់រាជរដ្ឋាភិបាលថៃ នៅឆ្នាំ២០០៦ និងត្រូវបានសម្ពោធដាក់ឱ្យប្រើប្រាស់ នៅខែកក្កដា ឆ្នាំ២០០៩។
បន្ទាប់ពីបានដាក់ប្រើប្រាស់ជាងមួយទសវត្សរ៍ ផ្លូវនេះត្រូវការ ជួសជុល និងកែលម្អឡើងវិញ ដើម្បីឆ្លើយតបទៅនឹងតម្រូវការនៃការអភិវឌ្ឍកម្ពុជានាពេលបច្ចុប្បន្ន។ ចំណែកការធ្វើឱ្យប្រសើរឡើង នៃការតភ្ជាប់ហេដ្ឋារចនាសម្ព័ន្ធ នឹងប្រែក្លាយតំបន់ព្រំដែនប្រទេសទាំងពីរ ឱ្យទៅជាតំបន់ឧស្សាហកម្ម ផលិតកម្ម និងទេសចរណ៍ ក៏ដូចជានឹងជួយលើកកម្ពស់ភាពប្រកួតប្រជែង និងកិច្ចសម្រួលពាណិជ្ជកម្ម និងការវិនិយោគក្នុងតំបន់ផងដែរ។
សូមបញ្ជាក់ថា៖ គិតត្រឹមឆ្នាំ២០២២ រាជរដ្ឋាភិបាលថៃ បានផ្តល់ឥណទានសម្បទានដល់កម្ពុជាសរុប ៣ ០១៩លានបាត ស្មើប្រមាណ ៨៦លានដុល្លារអាមេរិក សម្រាប់អនុវត្តគម្រោងចំនួន ០៣ ក្នុងនោះ គម្រោងសាងសង់ផ្លូវឆ្លងកាត់ស្ទឹងបត់ និងផ្លូវចូលទៅកាន់គម្រោងផ្លូវជាតិលេខ៥ ដែលកំពុងដំណើរការ និងគម្រោងស្តារផ្លូវជាតិលេខ៦៧ នេះផងដែរ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
