បាត់ដំបង៖ រថយន្តដឹកលើសទម្ងន់កំណត់ដោយច្បាប់ចំនួន៧គ្រឿង ដែល​មន្ត្រី​ជញ្ជីង ចល័តចាប់​បាន និងរក្សាទុកនៅស្ថានីយជញ្ជីងថ្លឹងរថយន្តពុកឆ្មា ស្រុកសង្កែ ខេត្តបាត់ដំបង ត្រូវបានប្រគល់ជូនម្ចាស់វិញបន្ទាប់ពីរក្សាទុករយៈពេលមួយឆ្នាំ។

ក្នុងឱកាសចុះទៅប្រគល់រថយន្តទាំង៧គ្រឿងនេះ ជូនម្ចាស់វិញ ជាមួយអាជ្ញាធរពាក់ព័ន្ធ​ក្នុង​ខេត្តបាត់ដំបង លោក ឯក រដ្ឋ អនុរដ្ឋលេខាធិការក្រសួងសាធារណការ​ និងដឹកជញ្ជូន ទទួល​បន្ទុក​លើការងារបង្ក្រាបរថយន្តដឹកលើសទម្ងន់កំណត់បានពន្យល់ពីទិដ្ឋភាពច្បាប់ដឹកជញ្ជូនផ្លូវគោកស្តីពីទម្ងន់កំណត់ ​និងបង្ហាញពីផលប៉ះពាល់ដល់ផ្លូវថ្នល់ដែលបណ្តាលមកពីការដឹកលើសទម្ងន់កំណត់ ព្រមទាំងបានផ្តាំផ្ញើ​ដល់ម្ចាស់រថយន្តឱ្យ​បញ្ឈប់​ការដឹកលើសទម្ងន់។

លោក បានគូសបញ្ជាក់ថា ក្រសួងនៅតែចាត់វិធានការក្តៅចំពោះរថយន្តដឹកលើស​ទម្ងន់​កំណត់​ទាំងអស់​។ ក្នុងនោះសម្រាប់រថយន្តដែលធ្លាប់បានចាប់ហើយ ប្រសិនបើរកឃើញប្រព្រឹត្ត​ល្មើស​លើកទី២ នឹងរងទណ្ឌកម្មកាន់តែធ្ងន់ធ្ងរ។

ក្រៅតែពីការផាកពិន័យ និងឃាត់រថយន្តទុកមួយឆ្នាំហើយនោះ អ្នកបើកបររថយន្តប្រឈម​នឹង​ការ​ដកបណ្ណបើកបរ​ហើយឈានទៅបិទអាជីវកម្មដឹកជញ្ជូន។

លោក ឯក រដ្ឋ បញ្ជាក់បន្ថែមថា បន្ទាប់ពីមានចំណាត់ក្តៅ ​ជាពិសេសចាប់រថយន្តរក្សាទុកនេះ បាន​ធ្វើឱ្យអ្នករកស៊ីដឹកជញ្ជូន​ភ្ញាក់រលឹក​ចូលរួមអនុវត្តន៍ច្បាប់ស្តីពីការដឹកជញ្ជូន ខណៈការដឹកជញ្ជូន​លើសទម្ងន់កំណត់ដោយច្បាប់មានការថយចុះច្រើននៅក្នុងឆ្នាំ២០២២។

លោក ឯក រដ្ឋ បានបញ្ជាក់ជំហរពីការបន្តចាត់វិធានការក្តៅចំពោះរថយន្តដឹកលើស​ទម្ងន់កំណត់នេះ​ដោយគ្មានការលើកលែង ឬអនុគ្រោះនោះឡើយ។ ប្រតិបត្តិការនេះ​ធ្វើឡើងដោយស្មើភាព មិនមាន​ការអនុគ្រោះ ឬលើកលែងចំពោះអ្នកធំ អ្នកមានអំណាច​ មានឥទ្ធិពលនោះឡើយ។ ពោលរាល់​រថយន្ត​ដឹកលើសទម្ងន់​កំណត់ត្រូវតែផាកពិន័យ​ ហើយដឹកលើសទម្ងន់កំណត់ចាប់ពី ២០ភាគ​រយឡើងទៅ ត្រូវតែផាកពិន័យ ​និងឃាត់រថយន្តរថយន្តទុកមួយឆ្នាំ។

លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានបញ្ជាក់ឱ្យដឹងថា​ រថយន្តដឹកលើសទម្ងន់ដែលបានឃាត់រក្សាទុកនៅស្ថានីយថ្លឹងរថយន្តពុកឆ្មា​ ខេត្តបាត់ដំបង ចំនួនសរុបមានចំនួន២៩គ្រឿង ដែលរក្សាទុករយៈពេល១ឆ្នាំ និងត្រូវបានប្រគល់ជូនម្ចាស់វិញចំនួន ៧ គ្រឿង ខណៈនៅសល់២២គ្រឿងទៀតនិងត្រូវប្រគល់ជូននៅពេលក្រោយ។

លោក បានអំពាវនាវដល់បងប្អូនអាជីវករ ​ជាពិសេសអ្នកប្រកបអាជីវកម្មដឹកខ្សាច់ ថ្ម ស៊ីម៉ងត៍​សូមគោរពច្បាប់ទាំងអស់គ្នា និងបញ្ឈប់ការដឹកជញ្ជូន​លើសទម្ងន់​ដើម្បីថែរក្សាផ្លូវថ្នល់​ឱ្យ​ប្រើប្រាស់បានយូរអង្វែង ​ជាពិសេសកាត់បន្ថយការខាតបង់ថវិកាជាតិ៕អត្ថបទ៖ នឿត​ សុភ័ក្ត្រ