សៀមរាប៖ ប្រជាពលរដ្ឋជាច្រើនកុះករ បានសម្ដែងការសប្បាយរីករាយ ដែលបានចូលរួមទស្សនា​ក្នុងពិធីប្រណាំទូកលក្ខណៈប្រពៃណ ការប្រណាំងទូក​នៅបារាយណ៍ខាងលិច ក្រុងសៀមរាប។

ពួកគាត់ បានលើកឡើងថា បន្ទាប់ពីខកខានរយៈពេល២ឆ្នាំកន្លងមកនេះ​ ប្រជាពលរដ្ឋ បានទៅ​ទស្សនាច្រើន ជាពិសេសពួកគាត់នៅមូលដ្ឋាន ទទួលបានប្រាក់ចំណូល ពីការបង្កើតការលក់ដូរ​នៅក្នុងពិធី។

ប្រជាពលរដ្ឋបានបន្ដថា ការបង្កើតកម្មវិធីសប្បាយៗនេះ បង្ហាញថា ប្រទេសកម្ពុជាបានរួចផុតការ​ឆ្លងជំងឺកូវីដ១៩ហើយ ​ជាពិសេសពិធីអុំទូកនេះ​ បានបង្ហាញថា កម្ពុជា បង្កើតការសប្បាយដល់​ប្រជាពលរដ្ឋ និងរំលឹកឡើងវិញនៃពិធីបុណ្យអុំទូកក្នុងតំបន់រមណីយដ្ឋានអង្គរ។

ព្រះគ្រូ នឿម វុទ្ធី ព្រះគ្រូចៅអធិការវត្ដមហានទីរតនារាម ហៅវត្ដស្វាយរមៀត​ ស្ថិតនៅសង្កាត់ទឹកវិល ក្រុងសៀមរាប ​ដែលជាប្រធានរៀបចំពិធីប្រណាំងទូកលក្ខណៈប្រពៃណីនេះ ព្រះអង្គមាន​សង្ឃដីកា​ថា ពិធីអុំទូកលក្ខណៈប្រពៃណីនេះ ​ដើម្បីអបអរពិធីបុណ្យកឋិនទាន ​និងដើម្បីឱ្យមាន​ទាក់ទាញ​អ្នក​ទេសចរណ៍ ជាពិសេសរក្សាប្រពៃណីបុរាណខ្មែរឱ្យបានគង់វង្ស ព្រមទាំង​បង្កើត​បរិយាកាស​កម្សាន្ត​សប្បាយ​ដល់ប្រជាពលរដ្ឋនៅមូលដ្ឋាន។

ដោយសារការយកចិត្តទុកដាក់និងការលះបង់ខ្ពស់របស់ប្រមុខថ្នាក់ដឹកនាំរាជរដ្ឋាភិបាល ទើបទាំង​អស់គ្នាមានឱកាសជួបជុំ​និង​ប្រារព្ធ​ពិធីផ្សេងៗ ​ឡើងវិញក្រោមម្លប់សុខសន្តិភាពតែមួយ។

ជាមួយគ្នានោះ ពិធីនេះ​មានការហែអង្គកឋិនទាន ​តាមទូកឆ្លងកាត់ទឹកបារាណ៍ចូលវត្ដផងដែរ ។

ពិធីអុំទូកនេះ ធ្វើឡើងមានរយៈពេលពីរថ្ងៃ​ ចាប់ពីថ្ងៃទី៥ ដល់ថ្ងៃទី៦ ​ខែវិច្ឆិកា​ឆ្នាំ២០២២នេះ នៅ​បាយរាណ៍ខាងលិច ​ដោយមានទូកអុំចំណុះ៦នាក់​ចំនួន២៦គូរ​ធ្វើការ​ប្រគួតប្រជែង​យកជ័យ​លាភីផង៕អត្ថបទ៖ឈិត សាវី