ភ្នំពេញ៖ សណ្ឋាគារសុខាភ្នំពេញជាទីតាំងសំខាន់មួយ ក្នុងចំណោមសណ្ឋាគារជាច្រើនកន្លែងទៀត ដើម្បីរៀបចំទីកន្លែងប្រជុំ និងស្នាក់នៅរបស់គណៈប្រតិភូជាតិ និងអន្តរជាតិសម្រាប់ កិច្ចប្រជុំកំពូល​អាស៊ាន និងកិច្ចប្រជុំកំពូលពាក់ពន្ធ័ ដែលនឹងប្រព្រឹត្តិទៅចាប់ពីថ្ងៃទី ១០ ដល់ ថ្ងៃទី ១៣ ខែវិច្ឆិកា ឆ្នាំ២០២២។

លោក ផ្លុង ចន្ទ័ដារិទ្ធគ្រីស នាយកស្តីទីចាត់ការទូទៅនៃសណ្ឋាគារសុខាភ្នំពេញ បានបញ្ជាក់ប្រាប់អ្នកសារព័ត៌មានBTVអោយដឹងនៅថ្ងៃទី ០៧ខែវិច្ឆិកា ឆ្នាំ២០២២នេះ មកដល់​ពេលនេះ សណ្ឋាគារសុខាភ្នំពេញ បានរៀបចំស្ទើរតែរួចរាល់ទាំងស្រុងហើយ ដើម្បីត្រៀម​ទទួល​វត្តមាន​របស់គណៈប្រតិភូជាតិ និងអន្តរជាតិ ដែលនឹងអញ្ជើញចូលរួមប្រជុំ ​និងស្នាក់នៅ ក្នុង​អំឡុងពេលដែលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ពន្ធ័លើកទី ៤០ និង ៤១។

លោក បានបន្ថែមថា ក្រោយពីទទួលបានការទុកចិត្តពីរាជរដ្ឋាភិបាលកម្ពុជា ​ទាំងថ្នាក់ដឹនាំ និង បុគ្គលិក​របស់​សណ្ឋាគារសុខា ​បានត្រៀមមុន១ខែមកម្ល៉េះ ដើម្បីរៀបចំទាំងបន្ទប់ប្រជុំតូច ​មធ្យម ​និង ធំ បន្ទប់ស្នាក់នៅចំនួន ៧៤៤បន្ទប់​ ម្ហូបអាហារសម្រាប់ភ្ញៀវមកពីតំបន់អាស៊ាន​ អាស៊ី និង អឺរ៉ុបជាដើម។

លោក ផ្លុង ចន្ទ័ដារិទ្ធគ្រីស បានបញ្ជាក់ទៀតថា យោងតាមបទពិសោធន៍​ដែលសណ្ឋាគារធ្លាប់​ធ្វើ​កន្លងមក​ដូចជាកិច្ចប្រជុំរដ្ឋមន្ត្រីការបរទេសអាស៊ាន ​វេទិកា​សេដ្ឋកិច្ចពិភពលោក ព្រមទាំង​កិច្ច​ប្រជុំខ្នាត​អន្តរជាតិធំៗជាច្រើន​ទៀត​ធ្វើអោយក្រុមការងារ បុគ្គលិក​របស់សណ្ឋាគារសុខា​មាន​សមត្ថភាព​គ្រប់គ្រាន់​ក្នុងការទទួលខុសត្រូវលើការងារ​ប្រជុំអាស៊ាននេះ ដោយខិតខំ​ធ្វើយ៉ាង​ណាផ្តល់សេវាកម្មអោយល្អអស់ពីសមត្ថភាពដើម្បីមុខមាត់របស់កម្ពុជា ​និង ប្រជាជនកម្ពុជា​ទាំងមូល៕អត្ថបទ៖ សូដាវណ្ណ