ព្រះសីហនុ៖ នៅថ្ងៃទី៧ខែវិច្ឆិកានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានកិច្ចប្រជុំ​ត្រួត​ពិនិត្យវឌ្ឍនភាពការងារត្រៀមរៀបចំពិធីបុណ្យសមុទ្រលើកទី៩ ជុំទី៣នៅខេត្តព្រះសីហនុ និងរៀបចំមហាសន្និបាតក្លឹបឆ្នេរសមុទ្រស្អាតបំផុតលើពិភពលោក នៅសាលាខេត្តព្រះសីហនុ។ នៅក្នុងកិច្ចប្រជុំនេះ បានបង្ហាញពីខេត្តព្រះសីហនុត្រៀមរួចរាល់ក្នុងការរៀបចំបុណ្យសមុទ្រ និង​មហាសន្និបាតក្លឹបឆ្នេរស្អាតពិភពលោក​ ដែលមានប្រតិភូជាន់ជិត៣០ ប្រទេសចូលរួម។

តាមការឲ្យដឹងពី លោក ឡុង ឌីម៉ង អភិបាលរងខេត្តព្រះសីហនុ ថ្លែងថា នៅសល់​ប្រមាណ​១ខែទៀត​ប៉ុណ្ណោះ ព្រឹត្តិការណ៍បុណ្យសមុទ្រលើកទី៩ ជុំទី៣នៅខេត្តព្រះសីហនុ ចាប់​ពីថ្ងៃទី៩ដល់ថ្ងៃទី១១ ខែធ្នូ ហើយមហាសន្និបាតក្លឹបឆ្នេរសមុទ្រស្អាតបំផុតលើពិភពលោក ចាប់​ពីថ្ងៃទី៩ ដល់ថ្ងៃទី១៤ ខែធ្នូឆ្នាំ២០២២ នឹងឈានចូលមកដល់ ​ ។ រហូតមកពេលនេះ មាន​ប្រតិភូជាតិអន្តរជាតិមកពីបណ្តាប្រទេសជិត២៥ប្រទេស ​បានឆ្លើយតបថា គេនឹងអញ្ជើញចូលរួម ក្នុងនោះ​ប្រតិភូក្លឹបឆ្នេរស្អាតលើពិភពលោកនឹងចូលរួមជិត១៥ប្រទេស ស្នើនឹង២៨ឆ្នេរស្អាត សរុប១២០រូប។

លោក បន្តថា អភិបាលខេត្តព្រះសីហនុ បានថ្លែងថា មកដល់ពេលនេះ ខេត្តបានត្រៀមខ្លួនរួចរាល់​ដើម្បីទទួលប្រតិភូជាតិអន្តរជាតិចូលរួមព្រឹត្តិការណ៍បុណ្យសមុទ្រ និងព្រឹត្តិការណ៍ក្លឹបឆ្នេរស្អាតបំផុត​លើពិភពលោក ក្នុងនោះការងាររៀបចំសន្តិសុខសណ្តាប់ធ្នាប់ ​ការធ្វើបដិសណ្ឋារកិច្ចប្រតិភូជាន់ខ្ពស់ ការរៀបចំសោភ័ណភាព រៀបចំប្រគំដន្ត្រីច្រើនកន្លែង ​ដើម្បី​បញ្ចៀស​ភាព​ចង្អៀតណែន​មនុស្ស និង​ការរត់ជាន់គ្នា ​និងការរៀបចំទីតាំងស្នាក់នៅបោះតង់ ​សណ្ឋាគារ សម្រាប់មហាជន​ចូលរួម​ជាច្រើនទៀត ដែល​នឹងអញ្ជើញចូលរួមកម្សាន្តសប្បាយផងដែរ។

ឯកឧត្តម រដ្ឋមន្ត្រី ថោង ខុន កិច្ចប្រជុំត្រៀមរៀបចំព្រឹត្តិការណ៍បុណ្យសមុទ្រ អមដោយមាន​កម្ពុជា​ទទួលធ្វើម្ចាស់ផ្ទះរៀបចំមហាសន្និបាតក្លឹបឆ្នេរស្អាតជាងគេ​បំផុតលើពិភពលោក​ រំពឹងថា នឹង​មាន​ប្រតិភូជាន់ខ្ពស់ជាតិអន្តរជាតិប្រមាណជាង ១៣០០រូប​ មកពីបណ្តាប្រទសប្រមាណ២៥ចូលរួម យើងក៏រំពឹងថា ​នឹងមានមហាជនចូលរួមប្រមាណរាប់ម៉ឺននាក់ផ្សេងៗទៀត។

ឯកឧត្តម រដ្ឋមន្ត្រី បន្តថា ​ បុណ្យសមុទ្រនៅខេត្តព្រះសីហនុ មានស្តង់តាំងពិព័រណ៌ប្រមាណជាង ៣៥០ស្តង់ ក្នុងនោះ ៥០ស្តង់មានស្តង់ក្រសួងស្ថានប័ន​ ស្តង់ក្លឹបឆ្នេរស្អាត ស្តង់ផលិតផលក្នុងស្រុក ស្តង់វិស័យទេសចរណ៍កម្ពុជា​ ស្តង់ស្ថានទូតបរទេស ​គ្រឿងអេឡិចត្រូនិច​ និង៣០០ស្តង់ទៀត មាន​ស្តង់បង្ហាញភូមិម្ហូបអាហារ​ តង់វីថីមហាអាហារ​ ស្តង់អាហារខ្មែរ ​ ស្តង់សហគ្រាស ​សំភារៈគ្រឿចក្រ សំលៀកបំពាក់ គ្រឿងអេឡិចត្រូនិចនានាជាច្រើនទៀត ​អមដោយព្រឹត្តិការណ៍បាញ់កាំជ្រួច ប្រគំ​តន្ត្រីខ្នាតធំ ប្រកួតកីឡា៦ប្រភេទកីឡា ​និង​មានកម្មវិធីកម្សាន្តសប្បាយតូចៗជាច្រើនទៀត ៕

អត្ថបទ ស៊ុមសុខជា