ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ២០២២ បាន​បង្ហោះរូបភាពពាក់នាឡិកាអាស៊ាន ផលិតនៅកម្ពុជា​ ដែលសម្តេច បានបញ្ជាក់ថា នឹងពាក់​នៅ​ក្នុង​អំឡុង​ពេលប្រជុំកំពូលអាស៊ាននៅភ្នំពេញ​ដែលកម្ពុជាធ្វើជាម្ចាស់ផ្ទះ ​ចាប់ពីថ្ងៃទី១០ ​ដល់ទី១៣ វិច្ឆិកា​ខាងមុខនេះ និងបន្តពាក់នៅកិច្ចប្រជុំG20 នៅប្រទេសឥណ្ឌូនេស៊ី និង​កិច្ចប្រជុំ APEC​នៅ​ប្រទេសថៃ នាពេលខាងមុខផងដែរ។ សម្តេចតេជោ ​ក៏បានបញ្ជាក់បន្ថែមដែរថា «ខ្មែរធ្វើបាន»។

សូមអាននូវសំណេរទាំង​ស្រុងរបស់​សម្តេចតេជោ ហ៊ុន សែន ដែល​បានបង្ហោះតាម​រយៈទំព័រ​ហ្វេសប៊ុក​ផ្លូវការ​នៅរសៀលថ្ងៃទី០៧ ខែ វិច្ឆិកា ឆ្នាំ២០២២នេះ ​ដែល​មាន​ខ្លឹមសារថា «ប្រធាន​អាស៊ាន​ឆ្នាំ២០២២ចាប់ផ្តើមពាក់នាឡិកាមានផ្លាកសញ្ញាអាស៊ានផលិតនៅកម្ពុជាមុនគេ។

ខ្ញុំនឹងពាក់នាឡិកានេះក្នុងការប្រជុំអាស៊ាន​នៅភ្នំពេញ និងបន្តពាក់នៅឥណ្ឌូនេស៊ីពេលប្រជុំG20 ថ្ងៃ១៥​ ដល់១៦ បន្ទាប់​មកពាក់ចូលរួមប្រជុំ APECនៅថៃថ្ងៃ១៧ និង១៨វិច្ចកា​២០២២​ព្រោះខ្ញុំចូលរួម​ទាំងនៅឥណ្ឌូនេស៊ី និងថៃក្នុងនាមជាប្រធានអាស៊ាន ឆ្នាំ២០២២ដែរ (ខ្មែរធ្វើបាន)»។

សូមបញ្ជាក់ថា​ កម្ពុជា​បានផលិតនាឡិកាដៃចំនួន ២៥គ្រឿងសម្រាប់ជា​វត្ថុ​អនុស្សាវរីយ៍ជូន​ប្រធាន​គណៈប្រតិភូ​ដែលអញ្ជើញមកចូលរួមប្រជុំកំពូលអាស៊ាន នៅកម្ពុជាឆ្នាំ២០២២​ ខណៈដែល​នាឡិកា​នេះ ត្រូវបានរៀបចំផ្គុំឡើងដោយអ្នកបច្ចេកទេសខ្មែរ​សុទ្ធសាធដែលជាផ្នែក​មួយនៃ​ការរីក​ចំរើន​ខាងវិទ្យាសាស្រ្ត និងបច្ចេកទេសរបស់កម្ពុជា៕