ភ្នំពេញ៖ កាលពី​ល្ងាចថ្ងៃទី៧ ខែវិច្ឆិកាម្សិលមិញ​នេះ ឯកឧត្តម ថោង ខុន រដ្ឋមន្ត្រី​ក្រសួងទេសចរណ៍ បានអញ្ជើញ​ទស្សនាស្តង់តាំងពិព័រណ៍​ទេសចរណ៍ ម្ហូបអាហារ ភេសជ្ជៈ និង​គ្រឿង​សម្ភារៈ​ប្រើប្រាស់ Cambodia Biz fair ឆ្នាំ២០២២ រៀបចំដោយ​សមាគមន៍​ទេសចរណ៍​អាស៊ីប៉ាភិច​ PATA នៅខេត្តព្រះសីហនុ។ រដ្ឋមន្ត្រីទេសចរណ៍បានចាត់ទុកថា ពិព័រណ៍​នេះ​គឺ​មាន​សារៈ​សំខាន់​ក្នុងការជំរុញការស្តារវិស័យទេសចរណ៍ឲ្យងើបឡើងវិញក្រោយវិបត្តិកូវីដ។

ឯកឧត្តម រដ្ឋមន្ត្រី ថោង ខុន ថ្លែងថា ជាក់ស្តែងណាស់​ក្រសួង​ទេសចរណ៍​ចង់​ជំរុញ​ឲ្យ​សមាគមន៍​PATA និងភាគីពាក់ព័ន្ធទាំងអស់សហការរៀបចំពិព័រណ៍​អន្តរជាតិបែបនេះឲ្យបានច្រើនថែមទៀត ដើម្បីបង្កើតឱកាសឲ្យអ្នកលក់ផលិតផលទេសចរណ៍នៅក្នុងស្រុកយើង ជួបជា​មួយបណ្តាអ្ន​ក​ទិញ​ដែល​ជា​ម្ចាស់​ក្រុមហ៊ុនអន្តរជាតិមកពីតាមបណ្តាប្រទេស មកទាក់ទងទិញ ឬនាំ​យក​ផលិតផល​ទេសចរណ៍​ទៅ​ផ្សព្វផ្សាយនៅក្រៅប្រទេស ដើម្បីជំរុញ​ទេសចរ​អន្តរជាតិ​មក​ទស្សនា​កម្ពុជា​ឡើង​វិញ​។

លោក ធួន ស៊ីណាន ប្រធានសមាគមPATA ប្រចាំនៅកម្ពុជា ថ្លែងថា នៅព្រឹត្តិការណ៍​តាំង​ពិព័រណ៍​ផលិត​ផល​ទសចរណ៍ ម្ហូបអាហារ ភេសជ្ជៈនិងគ្រឿងសម្ភារៈប្រើប្រាស់ នៅឆ្នេរពូយជំទាវម៉ៅ ចាប់​ពី​​​ថ្ងៃ​ទី៥ដល់ថ្ងៃទី៩ ខែវិច្ឆិកានេះ គឺមានស្តង់ប្រមាណជាង២៥០ស្តង់ ហើយមានម្ចាស់ និង​តំណាង​ម្ចាស់​ក្រុមហ៊ុនអន្តរជាតិមកពីបណ្តាប្រទេសចំនួន ៨ប្រទេស ក្នុងតំបន់អាស៊ាន និង​មាន​ឥណ្ឌា តួគី ចិន ជាដើមបានអញ្ជើញចូលរួម និងទាក់ទងយកផលិតផលទេសចរណ៍ និង​គោល​ដៅ​ទេសចរណ៍កម្ពុជាទៅផ្សព្វផ្សាយឲ្យទេសចរអន្តរជាតិមកទស្សនាកម្ពុជា។

សូមបញ្ជាក់ថា បើតាមបណ្តាតំណាងក្រុមហ៊ុនទេសចរណ៍បណ្តាប្រទេសចូលរួម បាន​ថ្លែង​ពី​ការ​ចាប់​អារម្មណ៍​ខ្ពស់​​ចំពោះផលិតផលទេសចរណ៍កម្ពុជា ជាពិសេសការអភិវឌ្ឍ​គោលដៅ​ទេសចរណ៍​តាម​តំបន់ឆ្នេរសមុទ្រកម្ពុជា មានភាពស្អាតទាក់ទាញ ម្ហូបអាហារឆ្ងាញ់ប្លែកទាក់ទាញ ជាដើម ហើយនៅ​ពេល​គេត្រឡប់​ទៅ​ប្រទេស​គេ​វិញគេ​នឹង​រៀបចំ​កញ្ចប់​ទេសចរណ៍​ផ្សព្វផ្សាយ​លក់ជូន​ភ្ញៀវទេសចរអន្តរជាតិមកទស្សនាកម្ពុជា ជាពិសេសគោលដៅតំបន់ឆ្នេរ ខេត្តសៀម​រាម​អង្គរ និងតំបន់ទេសចរណ៍ប្រណិតនានាទៀត។ អត្ថបទ៖ ស៊ុម សុខជា