​បាល់ទាត់៖ ​អ្នកចាត់ការ​ក្រុម West Bromwich Albion លោក Sam Allardyce បាន​លើក​ឡើង​ថា ​ជ័យជំនះ​ពីរ​ប្រកួត​ផ្ទួនៗ​បាន​ធ្វើ​ឲ្យ​ក្រុម​ទាំងមូល​មាន​ក្តី​សង្ឃឹម ​ដើម្បី​គេច​ឲ្យ​ផុត​ពី​តំបន់​គ្រោះថ្នាក់បន្ត​វត្ត​មាននៅ English Premier League រដូវ​កាល​ក្រោយ​។

​​បន្ទាប់ពី​ជ័យជំនះ​ដ៏​ភ្ញាក់ផ្អើល​នៅ​ទឹកដី Chelsea សប្ដាហ៍​មុន ៥-២ West Brom ក៏​រក​បាន​ជ័យជំនះ​មួយទៀត​យប់មិញ​ទៅលើ​ក្រុម​ភ្ញៀវ Southampton ៣-០​។ ​​គ្រាប់​បាល់​ពិន័យ ១១​ម៉ែត្រ​របស់ Matheus Pereira និង Matt Phillips នៅ​វគ្គ​ទី​១ និង​មួយ​គ្រាប់​ទៀត​នៅ​វគ្គ​ទី២ ដោយ Callum Robinson បាន​ធ្វើ​ឲ្យ​ West Brom ឈ្នះ​លើ​គូប្រកួត​ធំ​បំផុត​ក្នុង​ផ្ទះ​នៅ Premier League ជា​លើកដំបូង​គិត​ពី​ខែ​វិច្ឆិកា​ ឆ្នាំ​២០១៦​។ ​​អ្នក​ចាំ​ទី Sam Johnston ក៏​ជា​ចំណែង​សំខាន់​ក្នុង​ជ័យជំនះ​របស់ West Brom យប់មិញ​ដែរ ​បន្ទាប់ពី​ជួយ​សង្គ្រោះ​បាល់ ១១​ម៉ែត្រ​របស់ Southampton ដែល​ស៊ុត​ដោយ​មិត្ត​រួម​ជាតិ​អង់គ្លេស James Ward-Prowse​។

​​ថ្វីបើ​ឈ្នះ​ពីរ​ប្រកួត​ជាប់​គ្នា​ក៏​ពិត​មែន West Brom នៅ​ត្រូវ​ដើរ​ផ្លូវ​វែងឆ្ងាយ​ទៀត​ដោយ​កំពុង​ឈរ​លេខ ១៩ ក្នុង​តារាង​ដេញ​ពីក្រោយ​តំបន់​សុវត្ថិភាព​លេខ ១៧ Newcastle ដល់​ទៅ ៨​ពិន្ទុ​ទៀត ខណៈ​នៅ​សល់ ៧​ប្រកួត​ទៀត​ចប់​រដូវ​កាល​។ ​មួយ​គូ​ទៀត​យប់មិញ​រវាង Brighton និង Everton បញ្ចប់​ទៅ​លទ្ធផល​ស្មើគ្នា ០-០៕

​អត្ថបទ​៖​នាង សុភា​វុ​ធ