ក្រសួងទេសចរណ៍កម្ពុជា បានឲ្យដឹងថា គិតចាប់ពីថ្ងៃទី៣១ ខែតុលា ដល់ថ្ងៃទី៦ ខែវិច្ឆិកា ឆ្នាំ​២០២២​នេះ ក្នុងចំណោមខេត្តនានា សម្រាប់ខេត្តកំពត​បានទាក់​ទាញ​ភ្ញៀវ​មក​ដើរ​កម្សាន្ត​ច្រើន​ជាង​គេ រហូតចំនួនជាង ២០ម៉ឺននាក់ បន្ទាប់គឺខេត្តព្រះសីហនុចំនួនជាង ១៦ម៉ឺននាក់។

នៅក្នុងបណ្តាញសង្គមហ្វេកប៊ុក នាព្រឹកថ្ងៃទី៨ ខែវិច្ឆិកានេះ ក្រសួងទេសចរណ៍បានរៀបរាប់ថា តួលេខ​ភ្ញៀវទេសចរផ្ទៃក្នុង រយៈពេល៧ថ្ងៃកន្លងមកនេះ មានចំនួនសរុបជាង ៨០ម៉ឺននាក់ ក្នុង​នោះ​ភ្ញៀវជាតិ​មានចំនួនជាង ៧៧ម៉ឺននាក់ និងភ្ញៀវបរទេសផ្ទៃក្នុង ចំនួនជាង ៣ម៉ឺននាក់។ ប្រភព​ដដែលបានឲ្យដឹងទៀតថា សម្រាប់គោលដៅទេសចរណ៍សំខាន់ៗ ក្រៅពីខេត្តកំពត និង​ព្រះសីហនុ​ដែលទាក់ទងភ្ញៀវមកដើរកម្សាន្តច្រើនជាងគេនោះ រួមមាន៖ ខេត្តបន្ទាយមានជ័យ មាន​ចំនួនជាង ១២ម៉ឺននាក់, ខេត្តកំពង់ធំជាង ១០ម៉ឺននាក់, ខេត្តសៀមរាបជាង ៤ម៉ឺន ៣ពាន់​នាក់, ខេត្តតាកែវជិត ៣ម៉ឺននាក់ និងខេត្តរាជធានីភ្នំពេញចំនួនជាង ២ម៉ឺន ២ពាន់នាក់។

ជុំវិញ​តួលេខខាងលើនេះ ក្រសួងទេសចរណ៍ បានបញ្ជាក់ថា មិនទាន់រាប់​បញ្ចូល​ភ្ញៀវ​ទេសចរ​ សម្រាប់​ថ្ងៃ​ឈប់​សម្រាកព្រះរាជ្យពិធីបុណ្យអុំទូក បណ្តែតប្រទីប និងសំពះព្រះខែ​អកអំបុក​នោះទេ​។ នាសប្តាហ៍កន្លងមក បណ្តាខេត្តមួយចំនួន ដូចជាខេត្តកំពង់ធំ បន្ទាយមានជ័យ និងកំពត បានរៀបចំ​ពិធី​ប្រណាំងទូក បណ្តែតប្រទីប អុជកាំជ្រួច ការតាំងពិព័រណ៍ និងព្រឹត្តិការណ៍​កម្សាន្ត​ជា​ច្រើន​ទៀត។ ក្រសួងបានបន្ថែមទៀតថា ប្រជាពលរដ្ឋបាន​ចាក​ចេញ​ពី​រាជ​ធានី​ភ្នំពេញ​ទៅ​ស្រុក​កំណើត ក៏ដូចជាផ្តើមដំណើរកម្សាន្តតាំងពីថ្ងៃសៅរ៍មកម្ល៉េះ និងបន្តរហូត​ដល់​ថ្ងៃឈប់​សម្រាក​ព្រះ​រាជ​ពិធី​បុណ្យ​អុំទូ​កផ្លូវការ និងអាចបន្តរហូតដល់ចុងសប្តាហ៍នេះផងដែរ៕