ភ្នំពេញ៖ នៅរសៀលថ្ងៃទី៨ ខែវិច្ឆិកា ឆ្នាំ២០២២នេះ រដ្ឋាភិបាលកម្ពុជា និងរដ្ឋាភិបាលវៀតណាម បាន​សហការគ្នារៀបចំវេទិកាជំរុញវិនិយោគ និងពាណិជ្ជកម្មកម្ពុជា-វៀតណាម ២០២២ ដោយ​មាន​ការ​អញ្ជើញ​ចូលរួមមកពីស្ថាប័នរដ្ឋ និងឯកជនចំនួនប្រមាណ ៣០០នាក់។

​ក្រសួងពាណិជ្ជកម្ម បានឲ្យដឹងថា វេទិកានេះរៀបចំឡើងក្នុងគោលបំណង ដើម្បីពង្រឹង និង​ពង្រីក​បន្ថែមទៀត​នូវ​កិច្ចសហប្រតិបត្តិការវិនិយោគ និងពាណិជ្ជកម្ម រវាងព្រះរាជាណាចក្រកម្ពុជា និង​សាធារណរដ្ឋ​សង្គម​និយមវៀតណាម នាឱកាសដំណើរទស្សនកិច្ចផ្លូវការរបស់ ឯកឧត្តម ផាម ម៉ិញជិញ នាយករដ្ឋមន្ត្រី នៃសាធារណរដ្ឋសង្គម និយមវៀតណាម ពីថ្ងៃទី៨ និងទី៩ ខែវិច្ឆិកា ឆ្នាំ២០២២ នៅប្រទេសកម្ពុជា។

យោងតាមរបៀបវារៈនៃវេទិកានេះ បានឲ្យដឹងថា នៅរសៀលនេះ មានការថ្លែង​ជា​សុន្ទរកថា​របស់​មន្រ្តី​ជាន់​ខ្ពស់ រវាងរដ្ឋាភិបាលកម្ពុជា និងរដ្ឋាភិបាលវៀតណាម ក្នុងនោះ រវាងឯកឧត្តម សុខ ចិន្តា​សោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា និង​ឯកឧត្តម ង្វៀន ជីយុង រដ្ឋមន្រ្តីក្រសួងផែនការ និងវិនិយោគវៀតណាម ស្តីពី​កិច្ច​សហប្រតិបត្តិការ​វិនិយោគ​របស់​ប្រទេសទាំងពីរ និងរវាងឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា និង​ឯកឧត្តម ង្វៀន ហុងស៊ាន រដ្ឋមន្រ្តីក្រសួងឧស្សាហកម្ម និងពាណិជ្ជកម្មវៀតណាម ស្តីពី​ការ​ជំរុញ​ពាណិជ្ជកម្ម នៃ​ប្រទេសទាំងពីរ។

ដោយឡែក នៅពេលល្ងាចថ្ងៃទី៨ ខែវិច្ឆិកានេះដដែល នឹងមានការអញ្ជើញ​ដល់​របស់​នាយករដ្ឋ​មន្រ្តី​ នៃ​ប្រទេសទាំងពីរ គឺសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃ​ព្រះរាជាណាចក្រ​កម្ពុជា និងឯកឧត្តម ផាម មិញជិញ នាយករដ្ឋមន្រ្តី នៃ​សាធារណរដ្ឋ​សង្គម​និយម​វៀតណាម។ ក្នុងនោះ ក៏មានការអញ្ញើញដល់ និងចូលរួមថ្លែងសុន្ទរកថាផងដែររបស់ អ្នក​ឧកញ៉ា គិតម៉េង ប្រធានសភាពាណិជ្ជកម្មកម្ពុជា និងលោក ង្វៀន ថាញ់យុង ប្រធាន​ក្លឹបធុរកិច្ច​វៀតណាម​នៅ​កម្ពុជា។

សូមបញ្ជាក់ថា តាមរយៈកិច្ចសហប្រតិបត្តិការពាណិជ្ជកម្មកម្ពុជា-វៀតណាម ត្រូវបានពង្រឹង និង​ពង្រីក​ជា​បន្តបន្ទាប់ក្រោមការដឹកនាំប្រកបដោយចក្ខុវិស័យ និងស្មារតី​សហប្រតិបត្តិការ​របស់​ថ្នាក់​ដឹកនាំ​កំពូល នៃប្រទេសទាំងពីរ។ យោងតាមរបាយការណ៍ចុងក្រោយរបស់អគ្គនាយករដ្ឋានគយ និងរដ្ឋាករកម្ពុជា បានឲ្យដឹងថា គិតក្នុងត្រីមាសទី៣ ឆ្នាំ២០២២នេះ ទំហំពាណិជ្ជកម្មរវាងកម្ពុជា-វៀតណាម សម្រេចបានចំនួនប្រមាណ ៤,៦៣ពាន់លានដុល្លារ កើនឡើងប្រមាណ ២២ភាគរយ ប្រៀបធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ការនាំចេញ​របស់​កម្ពុជា​ទៅ​កាន់​វៀតណាម មានតម្លៃទឹកប្រាក់ប្រមាណ ១,៥៥ពាន់លានដុល្លារ បានកើនឡើង ៣,១ភាគរយ។ ចំណែកឯការនាំចូលពីវៀតណាម មកកម្ពុជា មានតម្លៃទឹកប្រាក់ប្រមាណ ៣,០៧ពាន់​លាន​ដុល្លារ​៕