ភ្នំពេញ៖ តាមរយៈវេទិកាជំរុញវិនិយោគ និងពាណិជ្ជកម្ម រដ្ឋាភិបាលកម្ពុជា និងរដ្ឋាភិបាលវៀតណាម បាន​ប្តេជ្ញារួមគ្នាថា នាពេលអនាគតខាងមុខ នឹងខិតខំប្រឹងប្រែងយ៉ាងណាបង្កើនទំហំពាណិជ្ជកម្ម រវាង​ប្រទេស​ទាំងពីរឲ្យកើនដល់ ៥ពាន់លានដុល្លារអាមេរិក និងផ្តល់ប្រយោជន៍​ថែម​ទៀត​ដល់​ប្រជាជន​ នៃ​ប្រទេស​ទាំងពីរ។

ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា នៅក្នុងវេទិកា នារសៀលថ្ងៃទី៨ ខែវិច្ឆិកា ឆ្នាំ​២០២២​នេះ បានមានប្រសាសន៍ថា គិតក្នុងឆ្នាំ២០២១កន្លងទៅ ទំហំពាណិជ្ជកម្ម​ទ្វេភាគី​សរុប​រវាង​កម្ពុជា និងវៀតណាម សម្រេចបានប្រមាណជាង ៣ ៦០០លានដុល្លារអាមេរិក កើនឡើងប្រមាណ២១% បើ​ធៀប​នឹង​ឆ្នាំ២០២០ ដែលសម្រេច បានត្រឹមតែជាង ៣ ០២០ លានដុល្លារអាមេរិកប៉ុណ្ណោះ។ ឯកឧត្តម​បាន​បន្ត​ថា យ៉ាងណាមិញ ក្នុងឆ្នាំ២០២១ ការនាំចេញពីកម្ពុជា ទៅវៀតណាម​នៅ​មាន​ទំហំ​ទឹក​ប្រាក់​សរុប​ត្រឹម​តែ ៥០៧លានដុល្លារអាម៉េរិក បើធៀបនឹងការនាំចូលពីវៀតណាមមកកម្ពុជា មានចំនួនប្រមាណ ៣ ១៥៩ លានដុល្លារអាមេរិក។

តាមឯកឧត្តម ង្វៀន ហុងស៊ាន រដ្ឋមន្រ្តីក្រសួងឧស្សាហកម្ម និងពាណិជ្ជកម្មវៀតណាម បានបញ្ជាក់ថា ដើម្បី​ជំរុញពាណិជ្ជកម្មកាន់តែរីកចម្រើនថែមទៀតនោះ ស្នើ​ឲ្យ​រដ្ឋាភិបាល​ប្រទេស​ទាំង​ពីរ​បន្ត​ពង្រឹង​ហេដ្ឋា​រចនា​សម្ព័ន្ធ​នានា ដើម្បី​ពង្រីកដល់ការនាំចេញនាំចូល និងយកចិត្តទុកដាក់បន្ថែមលើ​ផលិតផលកែច្នៃ ក៏​ដូច​ជា​ការ​កសាងក្របខណ្ឌគតិយុត្តិ ដើម្បីសម្រួលបរិស្ថានធុរកិច្ចជាដើម។

សូមបញ្ជាក់ថា គិតត្រឹមរយៈពេល ៧ខែ ក្នុងឆ្នាំ២០២២ ទំហំពាណិជ្ជកម្មរវាងកម្ពុជា-វៀតណាម សម្រេច​បាន​ជាង ២ ៨០០លានដុល្លារអាមេរិក មានកំណើនប្រមាណជាង ៣៤% បើធៀបទៅ​នឹង​រយៈ​ពេលដូច​គ្នា ក្នុងឆ្នាំ២០២១ ដែលមានទឹកប្រាក់ប្រមាណជា ២ ១០០លានដុល្លារអាមេរិក។ ក្នុងនោះដែរ ទំនិញ​សំខាន់ៗ​របស់​កម្ពុជា នាំចេញទៅវៀតណាម មានដូចជា កៅស៊ូ ធម្មជាតិ សំលៀកបំពាក់ សម្ភារៈអេឡិច​ត្រូនិក និងគ្រឿងបន្លាស់ ផ្លែឈើ និងគ្រាប់ធញ្ញជាតិ ស្បែកជើង នាឡិកា ថ្នាំជក់ឆៅ ម៉ូទ័រអគ្គីសនី កាហ្វេ និងតែជាដើម៕ អត្ថបទ៖ ឈិត បូរ៉ាវី