ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ត្រីក្រសួងការពារជាតិ បានថ្លែងថា ថ្ងៃទី០៩ ខែវិច្ឆិកា ឆ្នាំ២០២២នេះ គឺមានរយៈពេល ៦៩ឆ្នាំហើយ ដែលកងយោធពលខេមរភូមិន្ទបានចាប់បដិសន្ធិ បន្ទាប់ពីកកើតកងទ័ព បានរក្សាខ្ជាប់ឥតប្រែប្រួលនូវអត្តសញ្ញាណរបស់ខ្លួន ប្រឹងប្រែងលះបង់ អស់ពីកម្លាំងកាយចិត្ត ប្រាជ្ញា ស្មារតី បំរើឧត្តមប្រយោជន៍«ជាតិ សាសនា ព្រះមហាក្សត្រ» ថែរក្សាការពារ សន្តិភាព សន្តិសុខ សណ្ដាប់ធ្នាប់សាធារណៈ ការពារអធិបតេយ្យ បូរណភាពទឹកដី នៃកម្ពុជា រួមចំណែក អភិវឌ្ឍប្រទេសជាតិ ឲ្យកាន់តែសម្បូររុងរឿងលើគ្រប់វិស័យថែមទៀតរហូតដល់សព្វថ្ងៃនេះ។
ថ្លែងនៅក្នុងឱកាសអញ្ជើញជាអធិបតីភាពពិធីអបអរសាទរខួបអនុស្សាវរីយ៍លើកទី៦៩ ទិវាកំណើតកងយោធពលខេមរភូមិន្ទ ៩ វិច្ឆិកា ១៩៥៣ /៩ វិច្ឆិកា ២០២២ ដែលបានធ្វើឡើងកាលពីថ្ងៃទី០៨ ខែវិច្ឆិកា ម្សិលមិញនេះ នៅទីស្តីការក្រសួងការពារជាតិ សម្តេចពិជ័យសេនាទៀ បាញ់ បានបញ្ជាក់ថា តាមរយៈពេល ៦៩ឆ្នាំកន្លងមកនេះ កងយោធពលខេមរភូមិន្ទបានឆ្លងកាត់ដំណាក់កាលជាប្រវត្តិសាស្ត្រយ៉ាងច្រើន ទាំងដំណាក់កាលប្រកបដោយមោទនភាពផង ទាំងដំណាក់កាលប្រកបដោយភាពបត់បែន លំបាកស្មុគស្មាញ និងគ្រោះថ្នាក់ជាទីបំផុតផង។
ប៉ុន្តែទោះបីស្ថិតក្នុងកាលៈទេសៈណាក្ដី ក៏កងយោធពលខេមរភូមិន្ទនៅតែរក្សា ខ្ជាប់នូវគោលបំណង និងឧត្តមគតិរបស់ខ្លួន ដើម្បីកសាង និងការពារប្រទេសកម្ពុជាជាមួយឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម។ ពេលប្រទេសជាតិត្រូវធ្លាក់ទៅក្នុងគ្រោះមហន្តរាយ ដែលរបបប្រល័យពូជសាសន៍ ប៉ុល ពត បានបង្កឡើង មានតែកងយោធពលខេមរភូមិន្ទដ៏បរិសុទ្ធដែលស្មោះត្រង់ នឹងគោលបំណង និងឧត្តមគតិរបស់ជាតិប៉ុណ្ណោះ ដែលបានក្រោកឈរឡើងធ្វើការតស៊ូ ដឹកនាំដោយសមមិត្ត ហ៊ុន សែន ធ្វើដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត «២០ មិថុនា ១៩៧៧- និងប្រមូលផ្តុំ រាល់កម្លាំងស្នេហាជាតិ បង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា »១២ ឧសភា ១៩៧៨ បង្កើតរណសិរ្សសាមគ្គីសង្គ្រោះជាតិកម្ពុជា ២ ធ្នូ ១៩៧៨ ដើម្បីប្រយុទ្ធផ្តួលរំលំរបបដ៏យង់ឃ្នងនេះរហូតទទួលបានជ័យជម្នះជាប្រវត្តិសាស្ត្រនៅថ្ងៃទី៧ ខែមករា ឆ្នាំ១៩៧៩ ដែលបានសង្គ្រោះជាតិឱ្យរស់រានមានជីវិតឡើងវិញទាន់ពេលវេលា នាំយកសិទ្ធិសេរីភាពដែលត្រូវបាត់បង់ទាំងស្រុងក្នុងរបបប៉ុល ពត មកជូនប្រជាជនវិញបញ្ចប់សករាជ ដ៏ខ្មៅងងឹតបំផុត ហើយបើកឡើងនូវសករាជថ្មីរបស់កម្ពុជា ប្រកបដោយពន្លឺនិងក្តីសង្ឃឹម។ ប្រជាជនកម្ពុជាទាំង អស់ធ្លាប់រងទុក្ខវេទនាក្នុងរបបប្រល័យពូជសាសន៍ ក៏ដូចយុវវ័យជំនាន់ក្រោយតែងចងចាំជានិច្ចនូវអត្ថន័យដ៏ធំ ធេងនៃជ័យជម្នះជាប្រវត្តិសាស្ត្រនេះដែលធ្វើឱ្យមានអ្វីៗនៅថ្ងៃនេះ។
សម្តេចពិជ័យសេនាទៀ បាញ់ បានបញ្ជាក់បន្ថែមទៀតថា ចាប់ពីថ្ងៃរំដោះប្រទេសជាតិ ចេញពីយុគ្គ ខ្មៅងងឹតនៃកម្ពុជាប្រជាធិបតេយ្យ ប្រទេសកម្ពុជាបានឆ្លងកាត់នូវឧបសគ្គស្មុគស្មាញជាទីបំផុត ក្នុងដំណើរ ការស្តារ និងកសាងប្រទេស ដែលចាប់ផ្តើមពីចំណុចសូន្យរហូតមានការអភិវឌ្ឍដូចពេលបច្ចុប្បន្ន។
ក្នុងដំណើរឈានទៅមុខលើមាគ៌ាដ៏វែងឆ្ងាយលំបាកលំបិននេះ កងទ័ពបានចូលរួមជាមួយរាជរដ្ឋាភិបាលបង្កើត នូវសមិទ្ធផលជាច្រើនរាប់មិនអស់ ដោយបានបូជាសាច់ស្រស់ឈាមស្រស់ ការពារជាតិមាតុភូមិ ប្តូរយក ភាពសុខសាន្តជូនប្រជាពលរដ្ឋ និងសង្គមជាតិទាំងមូល។
យ៉ាងណាក៏ដោយសម្តេចពិជ័យសេនា ទៀ បាញ់ ក៏បានសម្តែងនូវការគោរពដឹងគុណដ៏ស្មោះអស់ពីដួងចិត្ត ចំពោះបងប្អូនជនរួមជាតិទាំងអស់ ដែលបាន លះបង់កូនចៅ ប្ដីសី និងសាច់ញាតិជាទីស្រឡាញ់របស់ខ្លួនឱ្យចូលបម្រើក្នុងជួរកងទ័ព ដើម្បីការពារជាតិមាតុភូមិ និងបានបង្កលក្ខណៈសម្បត្តិគ្រប់បែបយ៉ាងជួយឧបត្ថម្ភគាំទ្រដល់សកម្មភាពរបស់កងយោធពលខេមរភូមិន្ទ តាំងពីដើមរហូតដល់ពេលបច្ចុប្បន្ន។
ជាមួយគ្នានោះដែរ សម្តេចពិជ័យសេនា ក៏បានផ្តាំផ្ញើសួរសុខទុក្ខប្រកបដោយមនោសញ្ចេតនា គោរពស្រឡាញ់ និងការដឹងគុណយ៉ាងជ្រាលជ្រៅចំពោះយោធិនពិការ យោធិនចូលនិវត្តន៍ បាត់បង់សមត្ថភាពការងារ គ្រួសារយោធិនពលីមរណៈ និងអតីតយុទ្ធជនកម្ពុជាទាំងអស់។ សូមឧទ្ទិសនូវទឹកចិត្តកតញ្ញូកតវេទីជូនចំពោះវិញ្ញាណក្ខន្ធថ្នាក់ដឹកនាំ ក្រសួងការពារជាតិ ថ្នាក់ដឹកនាំអគ្គបញ្ជាការដ្ឋាន មេបញ្ជាការ ប្រធានស្ថាប័នគ្រប់ជំនាន់ ដែលបានធ្វើពលិកម្ម ដើម្បីបុព្វហេតុការពារជាតិ និងសេចក្តីសុខក្សេមក្សាន្តរបស់ប្រជាពលរដ្ឋ។
ក្នុងឱកាសខួបលើកទី៦៩ឆ្នាំ នៃការកកើតកងទ័ពនេះ សម្តេចពិជ័យសេនា ក៏បានជូនពរដល់នាយទាហាន នាយទាហានរង និងពលទាហាននៃកងយោធពលខេមរភូមិន្ទ ដែលកំពុងបំពេញបេសកកម្មទាំងក្នុង និងក្រៅប្រទេស សូមសម្រេចបានជោគជ័យគ្រប់ភារកិច្ចផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
