កំពង់ស្ពឺ ៖ ពិធីប្រណាំងទូកអបអរសាទរ ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែនៅខេត្តកំពង់ស្ពឺ បានចាប់ផ្តើមនៅថ្ងៃទី៧ និងទី៨ ខែវិច្ឆិកា ឆ្នាំ២០២២ ដោយមានការចូលរួមទស្សនាកម្សាន្តពីសំណាក់ប្រជាពលរដ្ឋ ភ្ញៀវទេសចរជាតិ អន្តរជាតិផ្ទៃក្នុងយ៉ាងច្រើនកុះករ លើសពីការរំពឹងទុក។ នេះបើយោងតាម ឯកឧត្តម វ៉ី សំណាង អភិបាលខេត្តកំពង់ស្ពឺ ដែលបានប្រាប់ឲ្យដឹងកាលពីរល្ងាចថ្ងៃទី០៨ ខែវិច្ឆិកា ឆ្នាំ២០២២។

ឯកឧត្តមបានបញ្ជាក់ថា ការប្រណាំងទូកនៅខេត្តកំពង់ស្ពឺរយៈពេលពីរថ្ងៃមកនេះ គឺមានការចូលរួមកម្សាន្តពីសំណាក់បងប្អូនប្រជាពលរដ្ឋយ៉ាងច្រើនកុះករ ហើយការដែលមានការចូលរួមកម្សាន្តដ៏ច្រើនកុះករ លើសពីការរំពឹងទុកនេះ ក៏មិនមែនចៃដន្យដែរ គឺកើតចេញទីកត្តាសុខសន្តិភាព និងជីវភាព, នយោបាយវ៉ាក់សាំងដ៏ត្រឹមត្រូវរបស់រាជរដ្ឋាភិបាល ពិសេសគឺការដឹកនាំដ៏ប៉ិនប្រសព្វរបស់សម្តេចតេជោ ហើយក៏ស្របពេលដែលមិនបានប្រារព្ធព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែនៅរាជធានីភ្នំពេញដែរ។

ឯកឧត្តម វ៉ី សំណាង បានបញ្ជាក់ទៀតថា ទន្ទឹមនឹងការរៀបចំឲ្យមានពិធីប្រណាំងទូកអបអរសាទរ ដ៏សប្បាយរីករានេះ ខេត្តបានបញ្ចូលបន្ថែមនូវការតាំងពិពណ៌ផលិតផលក្នុងស្រុក ក្រៅស្រុក ការប្រគុំតន្ត្រី និងជា Concert និងពិធីសប្បាយៗផ្សេងទៀត។ ក្រៅពីនេះ ក៏មានការផ្សព្វផ្សាយជំរុញឲ្យប្រជាពលរដ្ឋគោរពច្បាប់ចរាចរណ៍ ជំរុញឲ្យប្រជាពលរដ្ឋទៅចាក់វ៉ាក់សាំង ជំរុញឲ្យប្រជាពលរដ្ឋធ្វើអត្តសញ្ញាណបណ្ណ និងទៅចុះឈ្មោះបោះឆ្នោតឱ្យបានគ្រប់គ្រប់ៗគ្នាផងដែរ។

សូមជម្រាបដែរថា ទូកដែលបានចូលរួមការប្រកួតនៅខេត្តកំពង់ស្ពឺនេះមានចំនួន ៤៥គូ ក្នុងនោះមាន៖ ទូកខ្នាតផ្កាចារបុរសចំនួន ៣០ទូក, ទូកត្នោតបុរសចំនួន ២ទូក, ទូកខ្ទះបុរសចំនួន ៤ទូក, ទូកខ្ទះនារីចំនួន ៤ទូក, ទូកខ្នាតអន្តរជាតិបុរស មានចំនួន ៥ទូក, និងទូកកិត្តិយស ២ទូក។ ចំណែកប្រតិភូគ្រូបង្វឹកមានចំនួន ៨០នាក់, កីឡាករ កីឡាការិនីមានចំនួន ៤៤២នាក់ (ស្រី៤នាក់) សរុបទាំងអស់ចំនួន ៥២២នាក់។

តាមរបាយការរបស់រដ្ឋបាលខេត្ត បានបញ្ជាក់ថា ពិធីប្រណាំងទូករយៈពេលពីរថ្ងៃ គឺថ្ងៃទី៧ ទី៨ ខែវិច្ឆិកា ឆ្នាំ២០២២កន្លងទៅនេះ មានអ្នកចូលរួមទស្សនាសរុបចំនួន ២១៥,៨៣៤នាក់ ក្នុងនោះភ្ញៀវជាតិ​ចំនួន ២១៤,៩៥០នាក់ និងអន្តរជាតិ​ផ្ទៃក្នុងសរុប ៨៨៤នាក់។ បើប្រៀបធៀបថ្ងៃទី១ និងថ្ងៃទី២ គឺថ្ងៃទី១មានភ្ញៀវសរុបចំនួនជាង ៦,៨០០០នាក់ និងថ្ងៃទី២មានចំនួន ១៤៧,៣៦៨ នាក់៕ អត្ថបទ ៖ ពៅយី