Meta Platforms បាននិយាយកាលពីថ្ងៃពុធ ទី៩ ខែវិច្ឆិកាថា​ ខ្លួន​នឹង​កាត់បន្ថយការងារជាង 11,000 ​កន្លែង ឬ 13 ភាគរយនៃកម្លាំងពលកម្ម​របស់ខ្លួន ​ជាការកាត់​បន្ថយ​ចំនួន​ដ៏​ច្រើន​បំផុត​​នៅឆ្នាំនេះ​ ដោយសារតែ ​ក្រុម​ហ៊ុន​​មេ​​របស់​Facebook ​បានខាត​បង់​​​ច្រើន និង​​ទីផ្សារផ្សាយពាណិជ្ជកម្មធ្លាក់ចុះ និងអតិផរណាខ្ពស់មិនធ្លាប់មាន។

លោក​​ Mark Zuckerberg អគ្គនាយកក្រុម​ហ៊ុន​នេះ បាននិយាយនៅក្នុង​​លិខិត​មួយ​ផ្ញើទៅកាន់​​​បុគ្គលិក​កាលពី​ថ្ងៃពុធ​ថា ក្រុម​​ហ៊ុន​ Meta ​​​បាន​សម្រេច​កាត់​បន្ថយ​បុគ្គលិក​ចំនួន ​​​11,000​​នាក់ ​​ ស្មើ​​ប្រហែល​១៣​% ​​នៃ​កម្លាំង​ពលកម្ម​​ ខណៈប្រាក់ចំណូលធ្លាក់ចុះ​​។

ការ​កាត់​បន្ថយ​ចំនួននេះ ​បាន​កើតឡើង ​ត្រឹម​តែមួយ​សប្ដាហ៍​ប៉ុណ្ណោះ ​ បន្ទាប់ពី​​​ក្រុម​ហ៊ុន​​បណ្ដាញ​សង្គម​​ Twitter របស់​​មហាសេដ្ឋី​លោក Elon Musk ​បាន​កាត់​បន្ថយ​បុគ្គលិក​របស់ខ្លួន​ប្រមាណ 7,500 ​ នាក់​។ ​មាន​ការកាត់បន្ថយ​​ចំនួន​បុគ្គលិក​ ​​​យ៉ាង​ច្រើន​​នៅក្រុម​ហ៊ុន​​បច្ចេកវិទ្យា​ផ្សេងទៀត​​ ដែល​បាន​ជួល​ភ្លាមៗ​​ អំឡុង​ជំងឺរាតត្បាតសកល​។

លោក Zuckerberg ​បាន​និយាយ​ថា លោក​បាន​សម្រេចចិត្ត​​ជួល​​​បុគ្គលិក​បន្ថែម​យ៉ាងច្រើន ដោយ​រំពឹង​ពី​កំណើន​ដ៏ឆាប់រហ័ស​​ បន្ទាប់ពី​ជំងឺរាតត្បាត​សកល​​បាន​បញ្ចប់​ទៅ ​តែ​គួរ​ឲ្យស្ដាយ​​អ្វីៗ​​​មិនដូច​ការរំពឹង​ទុក​​​របស់ខ្ញុំ​ ៕សុខមាន